Baìcołi

Da Wikipedia, l'ençiclopedia libara.



I baìcołi i xe biscoti séchi tipici de Venesia. I se ciama baìcołi parché ła só forma ła ghe someja a queła del pésse baìcoło o bransin.

I va ben par èsser tociai nea ciocołata, inte el cafè, inte el tè o inte el vin dolse.

Riceta[canbia | canbia el còdaxe]

Par farli ghe vol tempo e boresso, ma ghe ne val la pena. Se pesa 70 g de farina de fior e se li mete a fontana sula tola e se ghe incorpora subito 15 g de levà de bira (se lo compra dal forner soto casa), destemperà in un poco de late tiepido. Se scominsia a impastar co forza, fin che se forma una specie de balòta.

Co un cortein se ghe incide una croxe par sora e po' se mete la pasta a levàr, par meza oreta, coverta co un tovagiol neto. Quando che se vede che la bala xe deventada quasi el dopio, se la rimete sula tola e se ghe incorpora oncora 300 g de farina de fior, meso eto de butiro descolà, na ciara sbatua, un pizegheto de sal. Se impasta tuto da novo e co forsa, ogni tanto se ghe zonta un giosseto de late tiepido, in maniera da far su na bela balòta de pasta elastica e consistente.

Questa po' se tagia in 4 parti, che se rodola fin a tirar fora un cilindro longo quasi 30 cm. Sti 4 cilindri i va messi sula piastra del forno, un pocheto onta, e un poco distanti uno da staltro. Se i coverse col solito tovagiol neto e se i lassa levar par 1 ora e meza. Passà el tempo giusto se impìra la piastra inte el forno, che sarà fato scaldar in precedensa, e lassarli dentro solo 10 minuti, cioè finchè la pasta deventa rosa, sensa che la fassa la crosta. Se cava la piastra dal forno e se lassa riposar i cilindri, coverti dal solito tovagiol neto, par 48 ore, cussì intanto i deventa fredi.

Dopo e fatidiche 48 ore, se scominzia a tagiar i cilindri de pasta a fetine sotii e, me racomando, de sbiego, come quando che se tagia el salame.

Ste fetine de pasta se ciama "baìcoli", e se li rimete sula piastra zà caldeta e se impira da novo sul forno caldo. I baìcoli ga da "biscotàrse" cioè ciapar un bel color de oro da tute do le parti. Prima de magnarli bisogna lassar che i deventa fredi.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Baìcołi&oldid=1110505"