Stanpante

Da Wikipedia, l'ençiclopedia libara.
Na stanpante a geto d'ingiostro

La stanpante la xe un marchingegno che stanpa su carta o altri materiali le informazion contegnue in un computer. Ghe xe vari tipi de stanpanti: le pi difondeste le xe quele a geto d'ingiostro, che le spianza un ingiostro a base de aqua sul fojo, che el le asorbe, e quele laser, che le funziona con un raggio laser infrarosso che el vien modulà seconda del color da stanpar, e el fa cascar sul fojo na polvarina fina asè fata de carbon, fero e resina, che dopo la vien scaldà e fusa in maniera che no la se destaca pi dal fojo. Sta tecnica la permete de stanpar piesè veloci rispeto a quele a geto d'ingiostro. Na olta xera doparà asè anca le stanpanti ad aghi, ma deso le se dopara solo in ànbiti particolari, parché le va pian o no le ga na gran qualità.

Oltre a le stanpanti normali, che se ocupa solo de stanpar, ghe xe anca le stanpanti multifunzion, che le conbina vari aparechi: oltre che da stanpante, le pol far anca da fax, fotocopiatrice e scanner.

De solito le stanpanti le vien comandà tramite el computer, parò da un poco de tenpo ghe xe anca dele stanpanti pensà par la stanpa de le foto da na fotocamara digital, anca col computer smorzà. La fotocamara la se colega diretamente co la stanpante col cavo USB, opure cavandoghe la schedina de memoria e metendola inte na fessura fata aposta; la stanpante la te far vedar le foto su un schermo picenin e te pol siegliar quele che te vol e stanparle, senza star lì a inpizar el computer.

Controło de autoritàLCCN (ENsh85106745 · GND (DE4150722-8 · BNF (FRcb11982047n (data)
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Stanpante&oldid=1081197"