Stàtua de ła Libartà

La Statua de la Libartà (Statue of Liberty) xé una de le statue pì famoxe de New York, n'tei Stati Unii, e de tuto el mondo. La se cata apunto a New York, n'te la rocioxa ixola cea de Liberty Island, a sud-est de Manhattan, a la foxa del fiume Hudson e rente al Ellis Island.

El nome de la òpara la xé La Libartà che la luxe al mondo (La Libertà che illumina il mondo in italian, Liberty Enlightening the World in inglexe, La Liberté éclairant le monde in fransexe).

L'è sta un regalo de la Fransa, n'tel XIX secoło, par i festejamenti del sentenaro de l'independensa mericana e on segno de amicisia fra i do popoli. L'è sta inaugurada el 28 de otobre del 1886, a la prexensa de Grover Cleveland, el presidente dei Stati Unii de chel tenpo. Sta statua la xé divegnesta el sinbolo de benvegnuo par tuti i imigrati eoropei (la jera la prima roba che i vedeva dopo ver traesà del Osèano Atlàntego), che i ndava in serca de libartà o opordunidà n'tel novo continente merican. Al dì de oncò la Statua de la Libartà la xé asociada ai Stati Unii come icona prinsipal, in cuanto la xé divegnesta sinbolo de emansipasion rispeto a l'opresion.

Sta òpara l'è stada fata dal scultore Frédéric-Auguste Bartholdi e da l'inxegner Gustave Eiffel che ga proxetà la parte drento de la Statua. L'architetto fransexe Eugène Viollet-le-Duc el ga comisionà la selta del rame da doparar par la costrusion de la Statua.

N'tel 15 de otobre del 1924 la xé stada dichiarada Monumento Nasional dei Stati Unii e n'tel 1984 la xé stada dichiarada Patrimonio de l'Omanità da l'UNESCO. N'tel 2005 la Statua de la Libartà e Ellis Island i ga risevuo on totale de 4.235.595 vixite.

Galeria de imaxine

• 
  Statua de la libertà da de drio
• 
  La nova scala a scioxo che ghe xé drento la Statua de la Libatà La ga 356 scalini e se va su finmente la corona
• 
  Drento a la Statua, su la corona, lato sanco.
• 
  Drento a la statua, so la corona, lato drito, dove che xé posibile vedar el braso che tien su la torsa.
• 
  I interni de la Statua in Rame.
• 
  La First Lady Nancy Reagan e so mario ex presidente dei Stati Unii Ronald Reagan sora a la corona de la Statua in ocaxion dei 100 ani de l'opera.
• 
  La Statua so l'Ixola de la Libartà (Liberty Island).