Sistema nervoso

Desegno che'l mostra la destinsion in fra sistema nervoso sentrale, colorà in zalo, e deverse struture del perifèrico, colorà in seleste.

Strutura de un neuron del tipo multipolare, dove che se vede dentriti, corpo selulare e asson (secondo el verso che'l sèvita l'inpulso elètrico e l'informassion che i core longo sta sèlula). Ste sèlule, unità funsionali del'intiero sistema nervoso, le poe anca èssare longhe par metri.

Tajo de n'encèfalo drio el piano sagitale median: se vede la sostansa (ormai deventada) griza a livelo de la scorsa de sarvelo e sarveleto e anca in te i nùclei de la base. Tuto el resto xe sostansa bianca. Interessante xe come a livelo de la megola spinale e de la granda majoransa del tronco encefàlico se cata sostansa bianca par fora e grisa più par drento, a difarensa de quelo che se vede sui do organi de prima.

El sistema nervoso xe l'insieme dei òrgani formai da tessudo nervoso, overo da neuroni, sèlule gliali e le conbinassion de sti elementi, che le querze le funsion de métare in comunicassion quelo che sta fora da'l drento del corpo e anca le parte interne in fra lore. Le resposte omeostàtiche varentae da la funsion nervosa le se destingue da quele de altri sistemi, come quelo endòcrino, prima de tuto par la velossità del'adatamento prodoto dal'ativassion de sti tessudi, ma anca par el sterminà grado potensiale de conplessità del'intregassion del segnale. Par sta rezon, a le struture nervose, in particolare quele del sarvelo, xe tribuia la generassion de fenòmeni de difissile interpretassion propi de organismi conplessi come l'omo e alcune gnanca solo, come cossiensa, memoria, tension, sòno e veja, emossion, pensiero e tanti altri. L'organizassion anatòmega del sistema nervoso la destingue:

• sistema nervoso sentrale (SNC, anca ciamà nevrasse), par definission costituio da:
  • encèfalo, contegnuo in te la scàtola crànica e a so volta diviso in:
    • servelo (o sarvelo, zervel)
    • serveleto (o sarveleto, zerveleto)
    • tronco encefàlico
  • megola spinale, contegnua in te'l canale vertebrale
• sistema nervoso perifèrico (SNP) che'l xe definio dai òrgani che, dopo un trato drento, i salta fora da le protession schelètrica del SNC, e i xe:
  • gangli
  • nervi, che vissin al SNC i se organiza in plessi e raise

Sia el sistema nervoso sentrale che quelo perifèrico i xe fati in gran parte de tessudo nervoso, drento al quale se cata na destinsion fondamentale. La sostansa griza la xe conposta dai corpi selulari dei neuroni e dai so (in prevalensa) astrociti de sostegno e la toe el so nome dal fato che xe più vascolarizada (dopo qualche zorno dal tajo el rosa orizenale deventa de sto color): in te'l SNC se cata in struture dite scorse, nùclei (encèfalo) e corni (megola spinale), in te'l SNP la costituisse i gangli. La sostansa bianca, invesse, xe ciamada cussì par via de la mielina, sostansa lipìdica che la proteze i assoni dei neuroni sia del SNC, dove xe formada dai oligodendrociti, sia del SNP, dove xe formada da le sèlule de Schwann: le formassion de sostansa bianca le vien ciamade vie o fassi (càpsule e lemnischi in te'l encèfalo; cordoni in te la megola spinale) in te'l SNC, mentre in te'l SNP le forma i nervi. I oligodendrociti i xe propi del SNC, mentre le sèlule de Schwann del SNP: l'ùgnola ecession xe rapresentada dal secondo paro de nervi crànici (i nervi òtici) che par convension anatòmega i vien considarai perifèrissi, anca se. a tuti i efeti, i xe na protrusion del sistema nervoso sentrale verso la rètina del'ocio, gavendo drento oligodendrociti.

Vien considarae parte del sistema nervoso tessudi conetivi de sostegno al tessudo nervoso: in te'l SNC gavemo le meninge (stratificae in dura mare, aracnoide e pia mare, ndando da fora a drento), in te'l SNP ghe xe epinevrio, perinevrio e endonevrio. Mentre el tessudo nervoso l'orìzena dal'epitelio enbrionale del'ectoderma, i conetivi i salta fora dal mesoderma.

Dal ponto de vista funsionale ma anca anatòmego, el sistema nervoso, sentrale come perifèrico, se divide in:

• sistema nervoso somàtico o volontario (SNS), che'l controla le struture de suporto come i arti e le paredi de le cavità corpòree, donca pele, fasse, ossi, articolassion, mùscoli, ecc.
• sistema nervoso vegetativo o autònomo o visserale (SNV o SNA), che'l controla le funsion vidali ligade ai vìsseri (overo i òrgani interni) conpagno al sistema endòcrino e'l xe fato da:
  • sistema nervoso ortosinpàtico (o solo sinpàtico)
  • sistema nervoso parasinpàtico
  • sistema nervoso entèrico, st'ultimo descrito da manco tenpo, controlà dai do de prima, ma anca autònomo par funsionamento.

Ogni parte del sistema nervoso la ga come schema de strutura e funsionamento de base:

• na rama sensitiva o aferente o assendente: terminassion nervose lìbare o coligade a recetori specializai le tole su un segnale, overo na variassion energètica de qualsiasi tipo (fìsica, chìmica, ecc.) del'anbiente intorno, e ela converte in un potensiale elètrico che'l sale su pa'l nervo.
• na parte intregativa più o manco conplessa fata de neuroni messi in mezo e le so sinapsi.
• na rama motoria o eferente o dessendente che la produze la resposta: l'esenpio più sénpleze da pensare xe un mùscolo che'l se contrae o relassa, ma anca i movimenti de muscoladura lissa o le giàndole che le buta fora o drento al corpo na secression.