Shaka Zulu

Shaka Zulu

stanpa de el 1824, el re Shaka Zulu co el assegai, tipica lancia de i zulu
Nome orizenałe	(zu) Shaka kaSenzangakhona
Biografia
Nasimènto	s. lujo 1UTC 1787 Confederasion Mtetwa
Mòrte	22 de setenbre del 1828 ↔ 24 de setenbre del 1828 (41 ani) KwaDukuza (Regno Zulu)
Càuza de morte	Omisìdio
Liogo de sepełimento	Nonya (en)
Re Regno Zulu
1816 – 1828
Atività
Ocupasion	Monarca
Fameja
Cògnuze	nisun vałore
Zenitori	Senzangakhona kaJama (en)   e Nandi (en)
Fradełi	Mpande (it) , Dingane kaSenzangakhona (it) e Umhlangana kaSenzangakhona (en)

Shaka Zulu (1787 circa – setenbre 1828) el xe stà el pi inportante de i cai zulu e el vero fondatore de el regno zulu. En diexe ani de regno, el xe stà bon de unificar i vari clan zulu e de inglobar altri popoli che vivea rente de lori, par formar on regno esteso e bon de difendarse da i atachi de le potenze eoropee. A la so morte, el popolo zulu el contava 250 000 persone e 50 000 de questi i xera guerieri.

Storia

Shaka el xera fiolo de Tabile Raziya Senzangakhona, on cao zulu, e de Nandi, la fiola de Bhebhe, cao de i elangeni. Senbra che Shaka el fuse nato come ilegitimo, e che Senzangakhona el gabia parà via Nandi col fiol co el xera puteleto. Altri i dixe che Shaka el xera on fiol legitimo e che el sia ndà via de casa co che el xera za on gueriero. Quel che se sa de serto el xe che Shaka el fasea parte de l’esercito de Dingiswayo, cao de i mthethwa. I zulu i pagava on tributo a i mthethwa.

Dingiswayo el xera stà bon de unificar vari grupi picinini (mabhudu, dlamini, mkhize, qwabe e ndwandwe) par formar on picolo regno tra el kwaZulu e el Mozanbico de ancò. A la base de la società el ghera el ibutho, de frecuente tradoto co regimento. Se tratava parò de on grupo base par laorar e, se necesario, conbatar par difendarse. I vari ibutho i formava i impì', le conpanie de l’esercito.

A la morte de Seanzangakona, Dingiswayo el ga iutà Shaka a batar so fradel e tor el trono de so pare (circa 1812). Shaka el ga scominzià a alearse a vari grupeti che vivea in tel teritorio e, co el sostegno de i mthethwa, a mejorar el sistema de i ibutho. Shaka el volea esar forte par difendarse da i ndwandwe che i raziava i so teritori vegnendo zo da nord. En sto periodo, Shaka el ga tentà senpre la carta diplomàtega prima de rivar a la guera.

Co Zwide, el cao del clan nxumalo de i ndwandwe el ga copà Dingiswayo, Shaka el ga promeso de vendicar el so amigo. Zwide el xe stà bon de scanpar al primo ataco, ma Shaka el ga caturà la mare de Zwide, che la xera na sangoma (stregonessa, esperte de medicina tradisionale). Shaka el ga fato serar su la dona inte na capana co de le iene che la ga sbranà. La matina dopo el ga fato brusar la capana. La so vendeta la xe terminada co el ga copà Zwide a la bataja de Phongola (1825).

Dopo la bataja de Phongola, Shaka el ga traversà el fiume Tugela e fondà la sità de Bulawayo in tel teritorio de i qwabe, on clan sotomeso a lu. Shaka el ga continuà a inglobar altri clan, come i mkhize e i thuli. Shaka el ofriva protesion militare e sti popoli i ge dasea guerieri e tributi. Quei clan che i no ga volesto unirse a Shaka i ga conbatù contro de lu e, dopo verghe perso, i xe stà inglobà in tel grupo zulu. En sto modo el clan zulu el xe cresù fin a divantare on popolo pi grande de i altri clan.

Co Shaka el sà sentio forte inbastansa, el ga atacà i ndwandwe. La bataja decisiva la xe stà a la confluensa de i fiumi Mhlatuze e Mvuzane. Dopo do dì de guera, Shaka el xe riusìo a acerchiare i ndwandwe e vinzar. Subito dopo la bataja, Shaka el ga atacà l’acanpamento del re dopo na marcia forzada de 100 km. I rimasugli de i ndwanwe i xe scapà a nord al comando de Soshangane, del clan shangaan. I shangane i vive oncora ancò al confin tra Sudafrica e Mozanbico.

Morte de Shaka

I fratelastri de Shaka, Dingane e Mhlangana, i ga provà pi de na olta a copar Shaka. I fratelastri i volea tor el so posto, ma i xe stà costreti a coparlo parché, dopo la morte de so mare Nandi, Shaka el ga scominsià a mostrar segni de squilibrio. Shaka el ga ordinà a la zente de smetar le coltivazioni par on ano, de no mònzar le vache e che se copase tute le done incinte co i so marii. Shaka el ga anca ordinà de copare tuti quei che no dava segni de tristeza e de copar le vache che gavea dei vedèi, così chel vedèl el savese cosa volea dir esar sensa mare. Verso setenbre 1828, i do fratelastri i ga copà Shaka. El corpo el xe stà butà de pressia in on buso e cuerto de sasi e fango.

Dingane el ga fato copar l’altro fradel e altri sostenitori de Shaka. Dingane el ga conbatù contro n’altro fradel, Mpande, chel diventarà el novo re de i zulu in tel 1840. I zulu i xe stà i unici africani boni de batare i inglexi. A la bataja de Isandlwana, i inglexi i ga soferto la pi grande sconfita in tera d’Africa.

Riforme de Shaka

Shaka el deve al so suceso a de le riforme sociali e de tàtega de guera. Dal punto de vista sociale, Shaka el ga parmeso a i vinti de far parte del so clan. Così fasendo el ga fato diventar i zulu el grupo pi groso del so teritorio, e quindi bon de controlar i clan pi picenini.

Dal punto de vista militare, Shaka el ga introdoto ono scudo pi grande de quelo tradisionale che cuerzea el gueriero durante la bataja. El ga anca sostituìo la lancia (assegai) co na via de mezo tra lancia e spada (iklwa). I guerieri i scominziava l’ataco co i assegai. Co i rivava rente de i nemici i atacava co i scudi, spostando el scudo de i aversari a destra, verzendo così le difese e colpendo i aversari al costato co la iklwa.

I guerieri zulu i se preparava a la guera co longhe marce so teren sasoso sensa sandali. En sto modo i xera boni de corar par 50–60 km sensa fermarse. La formasion de ataco la prevedeva na linea dirita che, co la se vicinava a i aversari, la se spiegava come i corni del bufalo. El corpo sentrale el aretrava co le ali le ndava vanti e le tentava de acerchiar l’aversario. Dal corpo sentrale partia i atachi co trupe fresche lasade de drio a i primi conbatenti.

Mfecane

El regno de Shaka el xe cresù velocemente. I grupi etnici che i no volea diventar vitime de le razie de i zulu i ga dovù spostarse a nord. Stò movimento el xe conosudo come la mfecane. Grupi interi, come i ndebele, i xe scanpà da i so teritori par ndar verso el Botswana e su fin al Zinbabwe. Bisogna parò dir che i zulu i xe stà solo ono de i fatori de la mfecane. La cresita de i ndwandwe, l’arivo de i boeri e la presion de i schiavisti portoghexi in tel Mozanbico i xe altri fatori da considerar.

Linganbi foresti

• The South African Military History Society - The Zulu Military Organization and the Challenge of 1879
• Shaka: Zulu chieftan Archivià il 30 de setenbre 2007 in Internet Archive.

• The History of Shaka
• Statue proposal Archivià il 10 de agosto 2007 in Internet Archive.

Portałi:
• Portałe de Africa
|