Pablo Escobar

Pablo Escobar

Biografia
Nasimènto	(es) Pablo Emilio Escobar Gaviria 1° de disenbre del 1949 Rionegro (Cołónbia) (it)
Morte	2 de disenbre del 1993 (44 ani) Medellín (Cołónbia)
Càuza de morte	Feria de arma da fogo
Liogo de sepełimento	Medellín
Menbro de ła Càmara dei Raprezentanti de ła Cołónbia
20 de lujo del 1982 – 26 de otobre del 1983 (demision) Ełezesto in: 1982 Colombian parliamentary election (en)
Diretor cartello di Medellín (it)
Dati personałi
Altri nomi	El Patrón El Mágico El Zar de la Cocaína El Duro El Baron El Diablo El Padrino El Tutur Don Pablo El Doctor
Rełijon	Ceza catòłega
Atività
Ocupasion	sior de ła droga, pułìtego
Partio	Partio Libarałe Cołonbian
Menbro de	cartello di Medellín (it)
Altri
Cògnuze	María Isabel Santos Caballero (en) (1976–1993), morte
Convivente	María Isabel Santos Caballero (en) (vałor sconosesto–1976)
Fiołi	Sebastián Marroquín (it)  ( Pablo EscobarMaría Isabel Santos Caballero (en) ) Manuela Escobar  ( Pablo EscobarMaría Isabel Santos Caballero (en) )
Fradełi	Roberto Escobar Gaviria (it) e Luz María Escobar (en)
Condanà par	narcotràfego racket subornasion
Segno

Pablo Emilio Escobar Gaviria (ˈpaβlo eˈmiljo eskoˈβaɾ ɣaˈβiɾja^(ES)); Rionegro, 1º de disenbre del 1949 – Medellín, 2 de disenbre del 1993) el ze sta un crimenałe e pułìtego cołonbian e uno dei pì conosesti e richi trafeganti de cocaina e marijuana inte ła istòria del mondo.

Conosesto cofà El Rè de ła cocaina, el ze considarà èsar sta el crimenałe pì rico in asołuto, co un patrimoòio stimà de pì de 76 miliardi de dòłari inte i primi ani 80. Patrimònio erlevà de sevente, co na mèdia de guadagno che el ndazeva da torno dei 90 milioni al dì, o sia pì de 30 miliardi par ano. Oncora uncó el ze clasifegà cofà el pì potento e rico narcotrafegante de ła istòria, sorpasando col carteło de Medellín, el carteło de Sinaloa, de Calí, Guadalajara citai inte ła stra-famoza sèrie TV Narcos. El ze sta anca el pì sanguenàrio, copando un grando nùmaro de połisioti cołonbiani, ajenti americani, siviłi e 4 persone candidae in pułìtega. Inte el 1982 el ga vesto un ceo spàsio pułìtego, vegnendo ełezesto inte ła Càmara dei raprezentanti de Cołónbia.

Biografia

Primi ani

Pablo Emilio Escobar Gaviria el zera nasesto a Rionegro, el terso de sete fradełi de l'agricultore Abel de Jesús Escobar Echeverri, e Hermilda Gaviria, na maestra de scoła ełementare. Da adołesente el zera cresesto par łe strade de Medellín. El ghea tacà ła so cariera crimenałe robando e revendindo ai contrabandieri.

Cariera crimenałe

Inte el 1975, Escobar el ghea scomisià a comerciar cocaina insieme al so braso drito e cuzin Gustavo Gaviria. La so fama ła zera cresesta dopo che un spaciatore de Medellín, conosesto cofà Fabio Restrepo, el ze sta sasinà inte el 1975 – aparentemente pròpio da Escobar – dopo gaver cronpà 14 chiłogrami de droga. De sevente i òmani de Restrepo i zera stai informai che da cuel momento i garia lavorà par Escobar. Pablo el zera devegnesto conosesto a liveło internasionałe col so business. El so Carteło de Medellín el controłava granda parte de ła droga che ndava drento inte i Stati Unii, Mèsego, Porto Rico, Venesueła, Repùblega Domenegana e Spagna. La cocaina de Escobar ła zera rivada in racuante altre nasion in Amèrica e in Eoropa traerso ła Spagna. Escobar el ghea coronpesto un nùmaro incalcołàbiłe de ufisałi goernativi, zùdazi e altri pułìteghi, e de frecuente el copava personalmente i gregari che i se i refudava de cołaborar.

Corusion e intimidasion łe ghea caraterizà el sistema cołonbian inte el ndar del apozèo de Escobar. Eło el ghea na eficase stratezia conosesta cofà plata o plomo (in spagnoło letaralmente schei o pionbo) o sia el proponeva na alternativa a chi che el catava inte ła so strada: dasarse corónpar o morir.

Racuanti anałisti i ipotiza che el fuse coinvolzesto inte l'ataco a ła Corte Suprema Cołonbiana del 1985 da parte de łe guerrillas de sanca, che ła ga portà al sasin de metà dei zùdezi de ła corte. El carteło de Medellín ła ze sta anca coinvolzesto inte na sanguenària guera de droga col so prinsipałe nemigo, el Carteło de Cali, par tuto el tenpo inte el cuało el zera vivo.

El suceso

Co che el so inpero el zera rivà a ła màsima espandision, ła rivista Forbes ła stimava che eło el fuse el sètemo omo pì rico inte el mondo, controłando l'80% de ła cocaina a liveło internasionałe, el 20% de łe arme iłecite che łe sircołava e el 60% del marcà iłèsito statunitense. La so organizasion ła gaveva flote de aèrei, nave, veìcułi costozi, e riche propietà e grandi poderi de teren: łe stime łe declara che el carteło de Medellín el incasase 30 miliardi de dòlari l'ano inte el so momento pì alto (sirca 60 milion de dòłari ogni dì). Al de là de tuto, no-ostante cuanto pena scrivesto el zera savesto da ła zente, Escobar el zera considarà un eroe par racuanti abitanti de Medellín, el se sentiva in ajo inte łe rełasion col pùblego e el zera sta bon de increditarse ła fama del "benfator dei poareti" col fin de ciapar consenso pułìtego.

Fanàtego de spor, el ghea fazesto tirar-sù stadi de bałon co i schei otegnesti dal narcotràfego, sponsorizà scuadre locałi, ma anca scołe e ospedałi, fazendo cusita devegner ła so imàzene anca cofà un "Robin Hood" sparpagnando talvolta schei ai poareti in cànbio de fedeltà. La popołasion de Medellín de fato ła ło jutava de frecuente dazéndoghe coerzidure, scondindo informasion a łe autorità, o in calsìase altra magnera. Pablo Escobar, el zera intaresà de vegner amà cuanto temesto e el vegnea cusita mitizà da bona parte de ła popołasion cołonbiana poareta sì-bè che ghe fuse stà łe straje sensa presedenti de siviłi, połisioti e miłitari cołonbiani del cuało eło el zera responsàbiłe.

La cariera pułìtega

I primi pasi de Pablo Escobar inte el mondo pułìtego el ghea tacà co ła ełesion da consejero comunałe de Envigado, nel 1979. Nel 1982 Escobar el ghea tacà intaresarse a ła pułìtega nasionałe, acetando de candidarse inte ła lista del Movimento Revołusionàrio Libarałe, na formasion che ła sostegneva ła candidaura de Luis Carlos Galán, del partio Novo Libaralismo. Tutavia, par via de sospeti ligai a łe so atività poco luzeganti, Galán el ghea decidesto de refudar ła so adezion al Movimento. Escobar el ze sta dopo prezentà al pułìtego Alberto Santofimio Botero, in cao de Alternativa Liberal, del cuało el narcotrafegante el ghene saria devegnesto suito un esponente de rezalto. Gràsie al projeto Medellín sin tugurios, un pian par costruir pì de 500 abitasion par fameje poarete, Escobar el se ga ciapà grando consenso, finindo par èsar definio "un Robin Hood" anca da na conosesta revista cołonbiana. Inte ła fin de na stradura canpagna ełetorałe, el ze sta ełezesto inte ła Càmara dei Raprezentanti inte el 14 de marso del 1982. Ła so cariera pułìtega ła zera durada poco, pròpio co che el cuotidian El Espectador el ghea publegà inte el 25 de agosto de l'isteso ano che Escobar el zera sta inprezonà par èsar sta catà co un cargo pien de cocaina, dimeténdose inte el 20 de zenaro del 1984 dopo che ła Càmara i ło ghea privà de l'Imunità Parlamentària.

L'inprezonamento

Inte el 1991, Escobar el se ga consegnà spontaneamente a łe autorità cołonbiane par evitar l'estradision inte i Stati Unii. El proceso col cuało Pablo Escobar el zera rivà a un acordo col goerno de ła Cołonbia che el ghe evitase l'estradision el ze sta contà da Gabriel García Márquez inte el so libro Noticia de un secuestro, andove el vien spiega come che Pablo Escobar el gàpia ordenà na sèrie de secuestri de zornałisti cołonbiani racuanto inportanti par forsar ła man al goerno cołonbian finmenteché el acetase de estradarlo miga inte i Stati Unii. Intrà i secuestrai ghe zera Diana Turbay, Pacho Santos, Marina Montoya e Maruja Pachón e Beatriz Villamizar, st'ùlteme do łe zera respetivamente ła mojere e ła soreła de Alberto Villamizar che el garia avesto un roło determenante inte el finałizar l'acordo intrà el goerno de César Gaviria e Pablo Escobar.

Escobar el ze sta sarà inte ła so prezon privada de luso, La Catedral, che ła ghe ze stada permetesta de costruir cofà corisponsion par el so èserse costituio a ła zustìsia. El gaveva de fato negosià un acordo col goerno cołonbian, che el prevedeva 5 ani de confinamento obligatòrio inte ła so prezon in cànbio de ła no estradision. Gabriel García Márquez el scrive inte el so libro che co Pablo Escobar el zera entrà inte ła so prezon, sta cuà ła aparise èsar veramente na prezon, ma che in manco de un ano ła ze stada trasformada da Escobar inte na lusoza fortesa. Sto fato el ghea provocà un gran scàndało, tanto che el goerno cołonbian el se gavea decidesto de trasferir Escobar inte un'altra prezon. Par de pì Escobar el mostrava belché poco respeto par l'acordo, esendo sta vedesto pì volte par de fora de ła prezon, par védarse łe partie de bałon, far shopping a Medellín, frecuentar feste e altri lioghi pùbleghi.

Pròpio eło el ghea invità ła nasionałe de bałon cołonbiana a zugare na partia inte el canpeto in oro ła so "prezon". De sevente el portiero José René Higuita Zapata el saltarà el Canpionà del mondo del 1994 parché reconosesto colpévoło de ver favorizà ła prostitusion.

Evazion e morte

Manifesto de riserca par Pablo

Un artìcuło el zera parso inte ła stanpa locałe, mostrando foto de ła so "ceła" inpienia de ogni comfort, svełando che Escobar el gaveva fato copare racuanti so soci in afari che i zera ndai catarlo a La Catedral. Inte el 22 de lujo 1992, el goerno el ghea decidesto de móvar Escobar inte na prezon pì convensionałe, ma i contati de Escobar i ghea permetesto de conósar i intenti del goerno e de evàdar inte el momento justo. Inte l'isteso ano el reparto speciałe de l'ezèrsito USA Delta Force (e dopo anca cueło de ła marina i Navy SEAL) i zera stai despiegai par ła so catura. Co l' acuirse

del conflito, el zera cresesto el nùmaro dei so nemighi e un grupo conosesto cofà Los Pepes, grupo che el reuniva i perseguitai da Pablo Escobar e dai so cónplisi, el ga tacà na sanguenària canpagna inte ła cuała pì de trezento intrà cołaboratori e parenti de Escobar i vegnea copai e granda parte de łe so pròpietà desfae. Racuanti oservatori, intrà i cuałi Rolando Rubio, Angel Feijoo e Maite Alvarado, i aferma che i menbri del Bloque de Búscueda e de łe intelligence statunitensi/cołonbiane, inte i so sforsi par destrigar Escobar, i fuse cołudesti coi Los Pepes o che insoma i coordenase łe atività del Bloque de Búscueda e dei Los Pepes. Sto coordenamento el saria stato otegnesto par via de ła condivizion de łe informasion de intelligence, par permétar ai Los Pepes de desmontare ła montagna organizadiva che ła protezeva Escobar e i so pochi liai restai. Cuanto dito, el porta a discórar sol roło che i Stati Unii d'Amèrica i ga zugà inte el tore-sù informasion de intelligence, ponesto-che parte de ste informasion łe zera stae dopo doparade dai Los Pepes inte łe so asion de zustìsia cazera.

Menbri de ła Bloque de Búscueda, unità oparativa de ła połisia cołonbiana, che i festeja davanti al cadàvero de Escobar, 2 de disenbre del 1993

In ogni magnera, ła guera contro Escobar ła zera finia inte el 2 de disenbre 1993, co che na scuadra cołonbiana de sorvejansa ełetrònega, doparando ła tecnołozia de ła triangołasion ràdio dazesta dai Stati Unii, el ło ghea locałizà inte un cuartiero borghezo de Medełín. I ghe zera stai un inseguimento e na sparatòria inte ła cuała Escobar el ghe ga dasà łe strase. Anca se ła dinàmega perfeta de ła morte ła ze sta ojeto de debatimentto, Escobar el zera scanpà sora i teti de łe caze, andove che el zera sta colpio a ła ganba, a ła schina e in ùltema, mortalmente, de drio ła récia.

Dopo de ła morte de Escobar, el carteło de Medełìn el se ga spacà in tochi e el marcà de ła cocaina da suito el zera divegnesto domenà dal carteło de Cali finmente a ła metà dei ani novanta, co che anca i so lìder i zera vegnesti copai o caturai.

Inte l'otobre del 2006 ła zera moresta so mare de Pablo, Hermilda Gaviria. Inte el 28 de otobre 2006 łe autorità i ghene ghea profità par reezumar el cadàvaro de Escobar, a ła prezensa e col consenso de ła védoa Maria Victòria, par un test sul DNA volzesto a confirmar ła reałe identità de ła salma. Ghe zera stae de łe voci che ła so reezumasion ła fuse servia anca par lontanar ła padernità co un fioło iłejìtemo, fato isteso smentio dai famejari.

Altri projeti

Altri progetti

• Wikimedia Commons

• Wikimedia Commons el detien imàjini o altri file so Pablo Escobar
• el detien schemi gràfeghi so

Linganbi foresti

• (EN) Amy Tikkanen, Pablo EscobarEnçiclopedia Britannica, Encyclopædia Britannica, Inc.
• (EN) Pablo EscobarFind a Grave.
• (EN) Pablo EscobarInternet Movie Database, IMDb.com.