Pałaso Labia

Da Wikipedia, l'ençiclopedia libara.


Pałaso Labia dal Campo San Geremia

Pałaso Labia xe un pałaso baroco del sestièr de Canaregio a Venesia, costruìo infra el XVII e el XVIII secoło. Inte el Sałón da bało Giambattista Tiepolo gaveva depénto uno dei so caolaóri. El ciclo de afreschi dedicà a łe Storie di Antonio e Cleopatra, su comisión dei fradèłi Angelo Maria e Paolo Antonio Labia.

Afiancà a ła Cexa de San Geremìa, l'edificio xe situà visin a ła confluensa del Canal de Canaregio inte el Canal Grando; verso i cuałi revòlxe łe do fasade più antighe; el terso prospeto varda su Canpo San Geremia.

I Labia che rivava in orìxene da ła Catałogna zera stài iscriti al Patriarsado Venesian inte el 1646 dopo aver contribuìo co un'ingente sóma a ła Guera de Candia. I galdèva infati enormi richése che i spendeva in lusi, feste e in sto pałaso, scominsià poco dopo questa data.

Architetura[canbia | canbia el còdaxe]

Le fasàe so i canałi, atribuìe variamente ad Andrea Cominelli, ad Alessandro Tremignon e a so fìo Paolo, riciapa modełi del Longhena. I préxenta un pepiàn dorico bugnà e piani superióri de órdene ionico e corinsio co balcóni nobiłiài da mascaroni e balconàe continue. So l'atico xe scolpìe łe aquiłe araldeghe dei Labia, intersàe co ocułi ovałi.

La fasàda sol canpo, reałixàda intorno al 1730 riciapa, senplifegandoło, el stìl de łe altre do; no xe certa l'atribusión del dexegno a Giorgio Massari, che sicuramente gaveva verto a l'interno el monumentàl Sałón da bało.

Interno[canbia | canbia el còdaxe]

El ciclo de Giambattista Tiepolo[canbia | canbia el còdaxe]

Incontro tra Antonio e Cleopatra, afresco de Giamabattista Tiepolo

.

In sto sałón Giambattista Tiepolo ga depento el maxengo ciclo de afreschi dedicà a łe Storie di Antonio e Cleopatra (1746-1747), co ła quadradùra trompe-l'œil de Gerolamo Mengozzi-Colonna, che se integra parfetamente coi episodi narativi, indove personagi sontuoxamente vestìi ciapa poxe teatralmente ełoquenti. Ne ła volta drento un ocuło centrałe xe Bellerofonte su Pegaso va verso la Gloria e l'Eternità, ne łe paréde infra fegure ałegoriche e mitołogiche xe prexenti łe do sène prinsipàl l'incontro tra Antonio e Cleopatra, ne ła Sała dei Spèci inte el sofito reałixa el Trionfo di Zefiro e Flora.

Altre òpare[canbia | canbia el còdaxe]

Tante altre sałe del pałaso xe decoràe da interesanti dipinti: se cata òpare de Giandomenico Tiepolo, Palma il Giovane, Giambattista Canal, Placido Costanzi, Agostino Masucci, Pompeo Batoni, Gregorio Lazzarini, Gaspare Diziani, Antonio Visentini. Notevołe anca un ciclo de arasi fiaminghi co Storie di Scipione.

Questa richésa artistgea ga avùo in Maria Labia una de łe prinsipałi ispiratrici; se dise ritrata in Cleopatra ne l'Incontro del Tiepoło.

Storia[canbia | canbia el còdaxe]

La fortuna e ła vita mondana dei Labia ga avùo fin inte el XIX secoło e el pałaso zera stà vendùo ad un prìnsipe dei Lobkowicz; staltri ło ga cedùo a ła benefica pìa Fondasión Israełitica Königsberg, che ło ga tramexà in vari partaménti da fitàr. Ghe ga trovà alòxo na fabrica de stòfe, na segarìa e diverse famégie, che inte el sałón da bało destiràva ła lìsia.

Inte el dopoguèra el novo propietario, Carlos de Beistegui, ga reałixà dei primi inportanti restauri e ga sercà de riportàr el pałaso al so precedente splendor, integrandoło de aredi d'epoca ed òpare d'arte. El 3 setenbre 1951 ga organixà inte el pałaso una infra łe più bełe feste del secoło: tuta l'alta società internasionałe se ga incontrà inte el Sałón da bało in abiti setesenteschi, tanti dei cuałi dexegnài da Christian Dior e da un xovene Pierre Cardin, Cecil Beaton ghe n'à reałixà un memoràbiłe reportage fotografico.

Inte el 1964 De Beistegui gaveva cedùo a l'asta el pałaso a ła RAI, che ghe n'a fato ła so sede rejonałe. L'ente ga efetuà precixi restauri sia a l'edificio che a łe òpare d'arte.

In vista de un trasferimento a Malghera, la RAI ga invià inte el april 2008 na procedura de vendita, łigàda ad un uxo non alberghiero ma espoxitivo o culturałe (cofà richiesto dal Comùn de Venesia).

Bibliografia[canbia | canbia el còdaxe]

  • Marcello Brusegan, La grande guida dei monumenti di Venezia. Roma, Newton & Compton, 2005. ISBN 88-541-0475-2.
  • Guida d'Italia - Venezia 3a ed. Milano Touring Editore, 2007. ISBN 978-88-365-4347-2.
  • Elsa e Wanda Eleodori. Il Canale Grande. Palazzi e Famiglie. Venezia, Corbo e Fiore, 2007. ISBN 88-7086-057-4.
Pałaso Labia dal Canal Grando

Voxe łigàe[canbia | canbia el còdaxe]

Altri progeti[canbia | canbia el còdaxe]

Linganbi foresti[canbia | canbia el còdaxe]

Controło de autoritàVIAF (EN237438452 · GND (DE4461249-7 · WorldCat Identities (EN237438452
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Pałaso_Labia&oldid=1090917"