Mau Mau

Da Wikipedia, l'ençiclopedia libara.
Va a: navigasion, serca

I Mau Mau i xera on grupo de kenyani – quasi tuti de etnia kikuyu – che i gha combatù contro i colonialisti dal 1952 al 1959. El nome Mau Mau el xe stà dato da i bianchi. Lori i se ciamava Muingi (el movimento).

Inisi[canbia | canbia sorxente]

Dopo ani de tentativi de cambiamento co el dialogo, i kenyani i sa oposto al colonialismo inglexe co la violensa. I kenyani i gavea combatù par l’Inghiltera durante la seconda guera mondiale (campagna de Burma e altre campagne axiatiche). Al ritorno in Kenya, i se spetava on riconosimento, che el no xe mai vegnù. A lo steso tempo, le tere migliori de i fertili altipiani sentrali del paexe le xera stà tolte da i coloni. I kikuyu, embu e meru i xera i popoli che gavea perso le tere e la posibilità de mantegnar le fameje. Sole el 10% de i kikuyu i lavorava en te le fatorie de i bianchi, en cambio del laoro i pode coltivar on toco de tera. Durante i ani de la seconda guera mondiale, i coloni i volea pi laoro e i dava manco tera a i lavoratori. A l’inisio de i ani sinquanta, la majoria de i kikuyu i vivea en manco de 5 000 km², col risultà che la zente la vivea en zone sovrapopolade, senza magnare e ne la povertà pi granda. El grupo Asociasion Sentrale de i Kikuyu (KCA), che i inglexi i gavea meso al bando, el gavea organisà de le campagne de disobediensa sivile par discutar de el problema de la tera. I membri de sto grupo i fasea on giuramento de fedeltà, come el xera costume en la cultura de i popoli bantu de i altipiani. Anca i sindacati i gavea scominsià a lorar insieme. El 1 magio 1949, sie sindacati i se sera riunii co el nome de East Africa Trades Union Congress, Congreso de i Sindacati de l’Africa Orientale (EATUC). On ano pi tardi, i gavea domandà l’indipendensa. Tuti i capi del sindacati i xe stà arestà el 1 magio 1950. El 16 magio, i lavoratori de Nairobi i gha scominsià on siopero che el gha paralisà la cavedal par nove giorni. Anca se el goevrno el gha fato arestar pi de 300 lavoratori, el siopero el xe ndà vanti a Mombasa e Nakuru. Co tuti i leader en prison, el EATUC no el xe stà bon de continuare a laorar. Co i tentativi de dialogo i xe falii, la sola posibilità rimasta la xera la rivolusion. I veterani de guera i gha formà el Grupo de i Quaranta e i se sa unio co el KCA.

Risposta inglexe[canbia | canbia sorxente]

En tel magio 1951, el ministro par le colonie (Colonial Secretary) Jim Griffiths, el gha visità el Kenya. El partido politego Kenya African Union (KAU), Union Africana del Kenya, el gha presentà na lista de richieste: l’eliminasion de le legi raziste e la presensa de 12 membri en tel governo locale eleti da i africani. Griffiths no gha volesto savere de ste domande e el gha proposto la formasion de on governo locale co 14 rapresentanti eleti da i 30 000 bianchi, 6 eleti da i 100 000 indiani, 1 eleti da i 24 000 arabi e 5 nominati dal governo inglexe par rapresentar 5 milioni de africani. Sta proposta la gha convinto anca i pi otimisti che el xera imposibile parlar co i inglexi. El tel giunio 1951, i membri radicali de el KCA i gha deciso de formar de i comitati secgreti par organixar i giuramenti de sangue en te le sità. Jomo Kenyatta, che el no xera one de i radicali, el xe stà bon de farse elegere capo del KCA. En novembre, el KCA el gha meso l’indipendensa ne i so obietivi pi importanti. I comitati segreti i gha fato copare i kikuyu pi importanti che i laorava co el governo inglexe.

La rivolusion[canbia | canbia sorxente]

El governatore del Kenya, Sir Mitchell, el xera drio ndar en pension. El no xe sta bon de capire che la situasion la stava andando mal. El novo sostituto governatore, Henry Potter, el xe rivà el 1 giunio 1952 e el gha trovà na situasion de violensa che el no spetava. El governo el sa meso subito a combatar i primi segni de rivolusion e el gha meso presion su Jomo Kenyatta parché el parlase contro i Mau Mau. Kenyata el gha fato vari discorsi doe el condanava i Mau Mau. Nisuni el xe stà bon de capire se Kenyatta usava de le frasi en codice par far capir el vero mesagio o manco. I inglexi i xera convinti che Kenyatta el fuse el vero capo de la resistensa. El 6 otobre 1952, el novo governatore del Kenya – Sir Evelyn Baring – el xe rivà a Nairobi. Dopo do setimane el gha dichiarà el stato de emergensa.

Stato de Emergensa[canbia | canbia sorxente]

Co el stato de emergensa, el governo el gha fato arestar tuti i capi del KCA che i trovava e pi de 8 000 persone considerà pericolose. I veri capi del movimento i xera za nascosti. La risposta de i Mau Mau no la sa fato atandar tanto. En manco de do setimane, le fatorie de i bianchi e i racolti i vegnea brusà, e pi de 1 800 colaborasionisti copà. I Mau Mau considerava colaborasionisti i kikuyu che laoraa par i bianchi, ma anca quei che i se sera fati cristiani o che gavea on toco de tera. I inglexi i hja subito mandà de i rinforsi. Entuto el periodo de emergensa, 55 000 soldadi inglexi i gha combatù en Kenya. El Comitato Sentrale de el KCA el gha dichiarà guera a i inglexi, anca se i membri no gavea preparasion militare e nianca armimoderne par metarse contro i colonialisti. El sostegno popolare e la mancansa de trupe inglexi preparà a combataer en Kenya, i gha parmeso che i Mau Mau i gavese la mejo en te i primi mexi de guera. I vari grupi de combatenti, che i se fasea ciamar Armate de la Libartà e de la Tera (Land and Freedom Armies), i se nascondea su le montagne Aberdare e ne le foreste del Monte Kenya. I no gavea na coordinasion sentrale e i tre leader pi importanti – Stanley Mathenge, Waruhiu Itote e Dedan Kimathi – i gavea strategie diverse. El 24 genaro 1953, i Mau Mau i gha copà la fameja Ruck, co on fiol de sie ani. Sto fato el gha fato cambiar la determinasion de i inglexi. I coloni i gha licensià tuti i laoradori kikuyu, costruio dei fortini de protesion en te le fatorie, e comprà armi par difendarse. El 25 marso 1953, i Mau Mau i gha atacà el vilagio de Lari, poco fora de Nairobi. I abitanti de Lari i xera tuti kikuyu e catoleghi, e par i Mau Mau questo volea dir anca colaborasionisti. 170 done e buteleti i xe stà copà en sto ataco. I mas media inglexi i gha fato presto a descrivar i Mau Mau come de selvagi boni solo a copar i inocenti e bear el sangue de i buteleti. In aprile 1953, i kamba e i maasai i se gha organisà contro i inglexi en te la zona de Machakos, i primi, e quela de Narok, i secondi. La risposta inglexe la xe stà on incremento de le trupe e le legi speciali. I monti Aberdare i xe stà dichiarà ‘area proibita’. Ci entrava o usiva sensa parmeo el podea esar fusilà sul posto. Le riserve kikuyu le xe stà dichiarà ‘aree speciali’. La zente la dovea portar documenti e farli vedar a la polisia. Se uno no se fermaa, el podea esar fusilà sul posto. Co sta scusa, i inglexi i gha copà i sospeti che i catava. En tel aprile del 1954, i inglexi i gha ocupà militarmente la cavedal e arestà 17 000 africani, pi de la metà de la popolasion adulta. Pi de 15 000 i xe stà mandà ne i campi de concentramento. La majoria i xera inocenti, e tanti ie morti de fame e malatie, specialmente de colera. Pi de 77 000 kikuyu i xe stà mandà in sti campi durante el periodo de l’emergensa.

La fine[canbia | canbia sorxente]

L’aresto de tanta gente, el sistema de le riserve (1 100 000 kikuyu streti in 854 vilagi), e el controlo militare de le sità el gha tajà le linee de rifornimento a i Mau Mau. En poco tempo i grupi armati i no xe stà pi boni de sopravivere en te la foresta. En tel 1956, quasi tuti i capi i xera morti o en prison, e solo 500-600 armati i rimaneva en te la foresta del Monte Kenya. L’ultimo capo de i Mau Mau, Dedan Kimathi, el xe stà caturà el 21 otobre 1956 da Ian Handerson e impicà l’ano dopo. La rivolusion de i Mau Mau la xera finia, anca se el stato de emergensa el xe andà vanti fin al 1960 e de i grupeti de Mau Mau i xe rimasti en te la foresta fin a l’indipendensa. Le legi de l’emergensa no le xe mai stade canselà, e i governi de Kenyatta e de Moi e le gha usà par controlar el paexe co che ghe piaxea.

Ripercusioni[canbia | canbia sorxente]

I inglexi i gha vinto sul pian militare, ma i gha perso sl pian politego. Tute le domande fate dal KAU en tel 1951 le xe stà otegnude. El costo el xe stà alto. Pi de 70 000 kikuyu i xe stà copà durante l’emergensa – almanco 25 000 i xera butini soto i 10 ni de età -, solo pochi inglexi i xe stà copà (32) o ferii. El governo inglexe el gha speso na fortuna par mandar vanti la campagna militare, ma a la fine el gha dovù acetar on governo locale e la formula “na persona, on voto”. I coloni bianchi i pensaa de essar forti, ma i no gavea on vero peso economico. Solo el 20% de i investimenti inglexi i xera controlà da i agricoltori. Lo 80% de investimenti i xera en man de comanie che no gavea problemi a laorar co on governo de africani. El preso pi alto el xe stà pagà a livel sociale. Le atrocità comese da inglexi e africani le gha lasà n’eredità de violensa e sospeto.