Bicicleta

Da Wikipedia, l'ençiclopedia libara.
Va a: navigasion, serca
Na bici da nar in montagna

La bicicleta, dita anca bici par far prima, la xe un mezo de trasporto con do rude, sburtà da l'energia muscolare umana. La xe fata de un telaro su cui xe montà do rude grandi conpagno, in linia una co l'altra. La rua davanti la pol girar a destra e sinistra girando el manubrio, e la serve par darghe la direzion a la bici. La rua dedrio l'è quela che manda 'vanti el veicolo, e l'è azionà da na cadena colegà a du pedai, che el conducente, sentà sul sentarin, el gira coi pié. Par fermar la bici se dopara i freni: strucando le do manilie che ghe xe sul manubrio, se pol fermar a sielta la rua davanti o quela dedrio.

La parte dedrio del canbio de na bici

Oltre a sta strutura de base, la bici la pol verghe anca altri acesori. El canbio el xe fato da do serie de rue dentà de varia grandeza, una sui pedai e una sul pianton de la rua dedrio, su le quali gira la cadena. Manovrando do leve sul manubrio se pol canbiar el rapporto, cioè far pasar la cadena da na rua pi granda a una pi picenina, o el contrario. El rapporto el dise quanti giri de pedal ghe vol par farghe far un giro intiero a la rua. Canbiando el rapporto se pol ndar pi veloci o pi lenti a seconda de le situazioni (e quindi far anca pi o manco fadiga).

Se se va via de sera o de note convien verghe su la bici anca i fanai, che de solito i funziona con na dinamo tacà a la rua davanti: fasendo strada, la rua girando la produse corente che la inpiza na lanpadina.

La bici el xe uno dei mezi de trasporto pi doparai da la gente, però tanti i preferise ndar via in machina anca se i ga da far póca strada, parché xe pi comodo. In realtà ne le sità, col trafico che ghe xe, tante olte el mezo pi rapido par ndar in giro xe proprio la bici, che la va dapartuto e te la parchegi do che te vol (naturalmente sarandola ben col lucheto e el cadenazo, senò i te la ciava come gnente). In più no la inquina e no se spende gnente de benzina; naturalmente ghe xe el pro e el contro, parché a pedalar se fa fadiga (e difati i ga inventà anca le biciclete "a pedalata asistìa", ghe le ga un motorin eletrico che te juta a ndar vanti), e no se pol portar grandi carghi. In più in tante strade a ndar via in bici ghè da verghe paura, parché spesso no ghe xe percorsi ciclabili e se ris-cia da farse tor soto da le machine. In certi paesi europei ghe xe pien de bici in sità, e tuti i la dopara; ma in Italia semo ncora indrio, anca se nei ultimi ani i ga tacà a far qualche pista ciclabile.

Commons

So Commons ghe xè de i file multimediałi so Bicicleta