Prà de ła Vałe

Da Wikipedia, l'ençiclopedia libara.
Va a: navigasion, serca

Coordinate: 45°23′54″N 11°52′33″E / 45.39833, 11.87583

Padova - Prà de ła Vałe - Incixion de F. Piranesi (1785 sirca)

Ła granda piassa ełitica del Prà de ła Vałe ła xe uno dei sínbołi de Padova, la pí granda piassa padoana e una de łe pí grande de l'Europa. Ła mixura su par zó 90 000 m², uncò ła se prexenta cofà no spàzio monumental de granda inpresion, co in mezo na ixoła verde díta Ixoła Memia, che ga tuto intorno na canałeta e un dopio baxamento co sóra calche statua; de 'ste qua una ła raprexenta Andrea Memo, el patrissio venessian, nominà proveditor de Padova, che 'ntel 1775 el ga vú l'idea de mełiorar tuta la piassa, che a qûel tenpo la jera nà pałú sensa forma.

Denominasion[canbia | canbia sorxente]

El Prà de ła Vałe con vista su ła Basiłica de Sant'Antonio

In tel periodo romano e altomedieval l’area la xe conossiùa come Canpo de Marte o Canpo Marzio, parché i ghe fasea, tra le altre robe, le adunate militari. Indopo la xe sta ciamà sia “Vale del Marcà”, par i marcà e le fiere stagionai che i ghe fasea, sia come “Prà de Santa Giustina” parché proprio lì che xe la cesa intitolà a sta santa. El toponimo “Prà de la Vale” (Pratum Vallis) el xe riscontrà par la prima olta nel XII secolo.

El termine Pratum el vegnea doparà, in età medieval, par indicar un toco de tera belo grando destinà a usi comerciai che spesso, se nol xera lastricado, el podea anca cuèrzarse de erba. Bisogna quindi intendarlo soratuto come na parola che indica la funsion prevalente de l’area, pi che na efettiva copertura erbosa.[1] El termine Vale el sta quindi a significar “bassura” e “logo paludoso”. El deriva da la conformasion de l’area lievemente concava, e che quindi la xe sta sogeta a alagamenti e sucesivi inpaludamenti del teren fin a la fine del XVIII secolo.

Nel periodo sabaudo l’area i la ga intitolà uficialmente "Piazza Vittorio Emanuele II", anca se ne l'uso comune i padoani i continuava a ciamarghe Prà de la Vale.

Istoria[canbia | canbia sorxente]

Vista su ła canałeta del Prà

L'intiero proxeto, restà squaxi incompiú, xe rafigurà da na famoxa incixion de rame de Francesco Piranesi del 1785. Se dixe che Memo 'l gavese comisionà 'sta raprexentassion insieme co de łe altre e łe tegnese in mostra a Palazzo Venessia, cà de l'Anbasiata de ła Republica a Roma, par catar personagi e autorità proponendo de pagar par costruir łe statue da mètar al ornamento de ła piassa. El progeto de costrussion el xe stà scrivesto, par incarico de Memmo, da Domenico Cerato, profesor de architetura a Vicensa e a Padova.

I scavi in preparassion del laóro, fati par regołar łe aque e bonificar ła vałe, i xe stai direti da Simone Stratico e i ga portà a ła scoverta de i resti de un teatro romano. Questo fato ghe portò łustro a l'inissiativa, che ła jera cusí na scoverta de ła destinassion publica de ła xona.

Andrea Memmo el stava al pałazzo Besarion, fato 'ntel XV secoło (dopo de pałazzo Angełi), ch'el se trova zusto in Prà de ła Vałe, 'ntel angoło co via Umberto I. Uncò el palazzo monumental, propietà del Comun de Padova, l'ospita el Muxeo del Prezinema ła cołession Minici Zotti'. De particołar intarese storico xe ła Baxiłica Benedetina de Santa Ziustina, ła Logia Amulea in stile neoclasico e i tanti intaresanti pałazzi fati tra el Quatrosento e l'Otosento che i sirconda ła piassa.

Le statue[canbia | canbia sorxente]

Alcune statue del Prà de la Vale (in primo piano quela de Antenore)

Łe statue che adorna ła piassa łe xe 78: 38 łongo l'aneło drento a l'Isola Memia, 40 łongo queło esterno, ma secondo el disegno originario la gavea da esar 88. Le raprexenta i pí iłustri fioi de ła sità, padoani de nasita o d'adossion (soratuto traverso l'università). La disposision de desso la deriva prinsipalmente da la distrusion de sié statue che rafigurava dei doxi venexiani, butà xo da l’esercito napoleonico nel 1797. In sèvito a sto episodio ghe xe sta un riposizionamento de diverse statue e soratuto la colocasion sui pedestai dei ponti est e ovest (originariamente pensà anca lori par dele statue) dei atuali obelischi che prima i xera sistemà longo i quatro viali interni de l’isola. I do pedestai interni del ponte nord i xe ancora desso privi de statua.

Un preciso regolamento (emanà da la Presidenza del Prà el 10 de febraro 1776) el ga fissà le norme par la realixasion de le statue: no le podea rapresentar persone ancora vive, no podea èsarghe santi (a quei xera riservà i altari de le cese) e tuti i personagi ritrati bisognava che i gavesse vu un ligame co la sità. Nela magior parte dei casi se trata defati de profesori universitari, artisti, condotieri o ex goernanti de la sità.

La prima statua realixà, tanto par proar, la xe stà nel 1775 quela de Cicerone, che i la ga cavà subito parché nol ghe entrava gnente con Padoa; al so posto i ga messo l'atuale statua de Antenore oferta a la sità dal stesso Andrea Memmo. L’ultima de le statue originali la xe stà quela de Francesco Luigi Fanzago colocà nel 1838. In sèvito, nel corso de l'Otosento, i ga rifato la statua de Antonio Savonarola parché la s'avea strusià e par finir, nel 1963, par esigense de conservasion i ga sostituìo con na copia (opera de Luigi Strazzabosco) l’unica statua eseguìa da Antonio Canova e rapresentante Giovanni Poleni. Le statue le rafigura solo che òmeni; l’unica ecesion la xe el busto de la poetessa Gaspara Stampa, colocà ai pié de la statua dedicà a Andrea Briosco. I pedestai e le statue i xe fati in piera de Vicensa, un calcare tènaro cavà in diverse località dei Coli Bèreghi. El se presta ben assè a l’uso in scultura par la so fàsile scolpibilità, ma el presenta de contro un fàsile deterioramento. Diversi interventi de restauro e conservasion i xe sta operà su le statue da la fine de l'Otosento.[2] L'ultimo esteso intervento su le statue el risale ai primi anni novanta del XX secolo.[3]

Le statue le xe sta fondamentai par la trasformasion del Prà mìa solo visivamente, ma anca finanziariamente. Defati, le xe sta pagà da singoli cittadini o gruppi previo el versamento de na somma che la podea variar tra i 135 e i 150 zecchini e che la xe servìa sia al costo vivo de la statua sia come contributo ai laori xenerali del Prà. I schei i podea anca èsar versà in do-tri anni de tenpo.

El Prà de ła Vałe oncò[canbia | canbia sorxente]

El Prà de ła Vałe xe entrà fin da súito ne łe sinpatie de i padoani che i ło ciama de sołito el Prà; noto anca come "el prà sensa erba" par ła carensa de erba dovua a la presensa de masa arbari, oncò xe invesse pien de erba, visto che i arbari che ghe xera na olta, i xè stai tajai parchè i gera malai e ghi n'è sopravisú soło che uno.

La vegetasion de l'isola Memia[canbia | canbia sorxente]

Esenplare de acero riccio in te l'isola Memia

Fin a la trasformasion de fine XVIII secolo, el Prà el gavea gran poca erba, sia par via de l'uso intenso, che nol permetea la crésita, sia par via dei frequenti eventi aluvionai che coinvolgea l’area. Nel corso de l'Otosento la fissa piantumasion de platani la ga ostacolà pesantemente la crésita de l'erba dentro de l'isola. Defati, nel XIX secolo, el Prà el xe deentà uno dei "tre sensa" de un selebre detto popolare su la sità de Padoa.

El primo “àlbaro” de la storia del Prà el xe sta quelo “de la libartà” piantà dai francesi nel 1797. In realtà se tratava de un palo de legno su un piedestal sistemà al sentro de l’isola Memia; el xe durà poco assè parché i austriaci i lo ga butà xo dopo 'pena oto mesi da la so realizasion, in quanto sinbolo dei ideài rivolusionari.

El primo àlbaro par dal bon el xe stà un tiglio, dito 'ncora “de la libartà”, piantà senpre in sèvito a l’arivo dei soldai francesi nel 1805. L'estesa piantumasione de àlbari nel Prà la se ghe deve invese al ritorno soto l’Austria nel 1815, quando se ga dato el via a l’inserimento de liriodendri tulipifera e platani. En totale i ga piantà sirca 100 àlbari. Ben presto parò i liriodendri i ga patìo par la crésita pi svelta dei platani, scuminsiando a morir e vegnendo sostituìi un fià a la olta con altri esenplari de platani, fin a verghe, nel corso del XIX secolo, na sola specie arborea presente. Sti esenplari, rivando a le dimension tipiche de la specie (35-40 metri de alteza) i ga modificà un bel po' la percesion visiva del Prà e del progeto de Andrea Memmo. El spazio nol ga più podù esar abraccià in un sguardo solo e le grande chiome le ga reso manco percepibile la presensa de le statue. El boschetto così creà el xe stà però aprezà a longo da la xente parché el protezea dal sol e l'invogliava al passegio su l’isola.

Colpìi da un fongo (la Ceratocystiis fimbriata (Ell. e Mast.) Davidson), in maniera senpre pi grave e estesa a partir da la metà del Novesento, i platani i xe stai butà xo nel 1990, trane un unico esenplare che el xe scanpà. In sèvito a n’atenta valutasion, se ga sielto de sostituir i platani co na nova specie: l’acero riccio, varietà Summershade. I novi àlbari i xe tanti de manco de prima (sirca 50) e i xe stai piantà solo longo i viali interni; sta specie i la ga sielta parché la riva a altezze (sirca 20 metri) ben inferiori al platano e la xe quindi piasè conpatibile co la strutura urbanistico-architetonica del Prà, pur continuando a garantir na adeguata onbrìa traverso el so foliame ben fisso.

L’anel de erba che el sirconda l’isola par fora de la canaleta nol xera previsto ne l'idea original. Giuseppe Jappelli el ghe nà proposto la creasion nel 1824; l'efetiva realizasion la xe sta però sucesiva.

Note[canbia | canbia sorxente]

  1. Le informasion relative a le vecie denominasion le se cata in Silvana Collodo, Il Prato in età medievale, in Lionello Puppi (a cura di). Prato della Valle. Due millenni di storia di un'avventura urbana., Limena (PD), Signum, 1986. p. 60-61. In sto saggio se cata anca i riferimenti ai documenti de archivio.
  2. Tra i primi va cità quel de la ditta Mont-Luis col processo Kessler. Par la ricostrusion de l'intervento se vaga a vedar Lionello Puppi (a cura di). Prato della Valle. Due millenni di storia di un'avventura urbana., Limena (PD), Signum, 1986. p. 216.
  3. Par le statue tratà e le metodologie inpiegà in sta ocasion se vaga a vedar AA. VV. Il Prato della valle e le opere in pietra calcarea collocate all'aperto : esperienze e metodologie di conservazione in area veneta : atti della Giornata di studio : Padova, 6 aprile 1990. Padova, Libreria Progetto, 1990.
  4. La statua de desso, al nùmaro 81, la xe sta fata indopo del 1797 e in essa el Morosini el xe rafigurà vestìo da eroe romano e no da doxe venexian.


Bibliografia[canbia | canbia sorxente]

  • Vincenzo Radicchio. Descrizione della general idea, ed in gran parte effettuata dall’eccellentissimo signore Andrea Memmo sul materiale che denominavansi della Valle. Roma, MDCCLXXXVI
  • Simone Stratico. Dell'antico teatro di Padova. Padova, 1795.
  • Francesco Marzolo. Curiosità idrauliche padovane: la canaletta del Prato della Valle. Padova, Penada, 1940.
  • Enrico Scorzon. Il Prato della Valle e le sue statue. Trieste, Lint, 1975.
  • Aldo Prosdocimi. Il Prato della Valle. Padova, 1976.
  • Lionello Puppi (a cura di). Prato della Valle. Due millenni di storia di un'avventura urbana., Limena (PD), Signum, 1986.
  • AA. VV. Il Prato della valle e le opere in pietra calcarea collocate all'aperto : esperienze e metodologie di conservazione in area veneta : atti della Giornata di studio : Padova, 6 aprile 1990. Padova, Libreria Progetto, 1990.
  • Lorenzo Cappellini. Il Prato della Valle. Torino. Allemandi, 2001. ISBN 88-422-1096-X

Varda anca[canbia | canbia sorxente]

Altri progeti[canbia | canbia sorxente]


Ligamenti de fora[canbia | canbia sorxente]

Sta qua ła xè na voxe en vetrina. Struca qua par major informasion
Crystal Clear action bookmark.svg
Sta qua ła xè na voxe en vetrina, identificà come una de łe mejo voxe prodote da ła comunidà.
Naturalmente te pui far ben sujerendo e modifegando en mejo.

Voxi de quałidà en altre łengue