Post-fasismo

Un sircolo teritorial de Aleansa Nasional, partio che ga vudo l'ideoloxia post-fasista

Col termine post-fasismo, se vole dirghe a na faxe pulitega andove i partii de ideoloxia fasista i ga on proceso de revixion ideoloxega che li porta a dasar la so vixion totaliaria e anti-capitalista e a tacar a parlar co le forse de la drita moderada o conservatrisi tradisionale.

Prima del post-fasismo

La prinsipal forsa de ideoloxia post-fasista de la Prima Republega in Italia la jera sensa dubio el Movimento Sociale Italian, fin dal primo congreso del 1948, co el moto "no rinegar, no restaurar". A la so drita, inte i ani xe nasuo difarenti movimenti de ideoloxia neofasista.

Dal post-fasismo se ga fato nove tendense puliteghe, nove ideoloxie difarenti intrà de lore: dai corporativi de Giorgio Almirante, ai fasisti rivolusionari de Rauti, ai Conservatori de Michelini fin ai reasionari. Se pol dir che i partii post-fasisti i vole tirar la xente che vota democristian o liberal, dimostrandose contro el sistema e legalitari.

La nasita del post-fasismo in Italia

Ste proposte, in Italia le xe rivade inte i ani 70 del novesento, tra l'altro poxade proprio dal secretario del MSI Giorgio Almirante, ma se scuminsiava vedere che sto partio tacava pasar dal fasismo integralista al post fasismo intorno a la fin dei ani '80 e el scuminsiar dei ani '90. In chei momenti, che inte el contenpo jera drio sparir i tradisionali partii de goerno (DC, PSI, PSDI, PRI, PLI), e el PCI jera drio trasformarse in riformista, stesa roba capita anca inte el MSI soratuto soto la secreteria de Gianfranco Fini, che el ga dato na trasformasion moderada in grado de torse el voto dei conservatori e moderai, trasformando cusì el MSI in Aleansa Nasionale, andove finalmente se vede nasare un grando movimento de Destra che va dal voto moderà, conservatore fin al voto nasionalista.