Margarita

Da Wikipedia, l'ençiclopedia libara.
Va a: navigasion, serca
Sto articoło el xe scrito in venesian
Na cołana de margarite

Na margarita o perla ła xé na strutura sfèrega costituìa prinsipalmente da carbonato de calcio in forma cristałina deposto in strai conséntrisi, e prodota dai tesui vivénti - in particołar dal manteło - dei mołuschi (in xènere łe òstreghe). Ła paroła "margarita" ła vien fora dal stéso tèrmine latin, chel ga sto signifegà e dal qual salta fora anca el nome Malgarita. "Perla", ancuo piasè doperà, da "permula", el nome col qual se endegava ła capa che ea contien e che ła ga na forma che ła recorda ła "cosa del porco".

Na margarita ła se forma có un corpo foresto, come parasiti o pezi de cape, el se ferma 'nte ła cavità paleal. Elo el vien recoverto da strai, un per volta, de mareperla, al scopo de defénder i tesui del'anemal dal'iritasion. I se depòxita desferénti strai de calcio che, in conpagnia de altri minerałi, i crea sti particołari ogeti presióxi. .

Pa' crear margarite co forme spesałi, có se leva ła margarita dal'òstrega, se mete drénto un tóco de plàstega co ła forma sièlta, che l'òstrega ła covrirà co ła mareperla. El rexultà el xé che, daspò averghe spetà ani, ła margarita che ła salta fora ła ga ła forma sgrandia del framento inisial.

El cołor più comun de łe perle el xé el bianco, ma se pol catar anche margarite roxa, cołor crema, vioła scuro, grixe e negre. Grasie a ła tecnołogia e a ani de studio, ancuo podémo anca averghe margarite co cołóri particołari come el verdo, l'azuro, el naranson, che łe vien doperae sopatuto 'nte ła xogełeria. Có se parla de margarite negre, e del'Akoya e a quee de fiume, se pénsa sùbito a łe perle de Tahiti, costoxe par vèro, parecio prexade e particołarmente bełe. El vałor de łe perle però, nol se destingue soło dal cołor, ma anca da ła forma e dal lustro, chel xé ła łuxe che ła xé bona a refrèter.

Na curioxità particołar ła xé che, a desferénsa de łe altre, łe òstreghe che łe crea łe margarite negre łe xé davèro più dełicae e in ogni coltivasion ghe móre parece. Sto qua el xé un altro fator che łe fa cusì costoxe e rare.

Ghe xé dó categorie de margarite: łe margarite de acqua dolsa e łe margarite de aqua sałada. Come ła paroła stesa ła dixe, łe perle de aqua dolsa łe vien coltivae 'ntei laghi e 'ntei fiumi, mentre łe altre łe provien dal'osèano e molto speso da łe lagune. Łe tre categorie de perle de aqua sałada ła xé łe Akoya, łe margarite Tahiti e łe presioxìsime e rare perle South Sea.

Ła mareperla, che ła xé anca doperada 'ntel mercà dei xogełi, ancuo ła vien doperada anca in cosmètega e par ła creasion de particołare vernixe.

Voxe corełae[canbia | canbia sorxente]

Altri progeti[canbia | canbia sorxente]


Cołegamenti da fora[canbia | canbia sorxente]