Refresion

Da Wikipedia, l'ençiclopedia libara.
Va a: navigasion, serca
Sto articoło el xe scrito in venesian
Refresion specułar de ła łuxe su na superfisie łisiada.

Ła refresion ła xé na dei tre fenòmeni chei càpita có ła łuxe ła incontra ła materia. Có l'energia radiante ła casca su un corpo, na parte ła vien asorbia, na parte ła vien refresa e na parte ła vien trasmesa. Per ła lege de conservasion del'energia, ła suma de łe quantità de energia asorbìa, refresa e trasmesa ła xé ugual a ła quantità de energia che gera rivada.

Per anałixar el tipo de refresion del qual se parla, se dopra i agetivi:

  • spetral per descrìver ła radiasion monocromàtega, considerada longhéza d'onda per longhésa d'onda;
  • radiante (el contrario de łuminoxa) per dir che ła radiasion ła xé vardada in tèrmeni de energia total, adónca ła xé scrita traverso grandese radiomètreghe;
  • łuminoxa (el contrario de radiante) per dir che ła radiasion ła xé bałansada secondo ła funsion de bontà łuminoxa del'ocio, adónca ła xé scrita in grandese fotomètreghe.

Ła refresion ła pol capitar a specio (refresion specułar o regołar), có ła va 'nte na soła (o squaxi) diresion, o anca a difuxion (refresion difuxa), có ła va in desferénte diresion.

Ła refretansa (reflectance) ła xé el raporto infrà fluso refreso e fluso incidénte inputà per ogni łonghésa d'onda. Atexoché ła xé definìa come raporto de grandese omogènee, ła refretansa ła xé na grandesa sensa dimension e ła vien scrita in persentual (0-100%) o come fator (0.0-1.0). Daspò ła revarda el fluso e dónca el total de ła radiasion refresa 'nte ła emisfera.

Vaxo e sóa imàxene refresa su un specio.

Ła refretansa no ła xé soło funsion de ła łonghesa d'onda ma anca del'iłuminasion, de ła geometria de iradiamento e de ła geometria de vixion (de ła geometria co ła qual el corpo el se iłùmina e de ła geometria co ła qual se mixura ła quantità refresa), dónca bixogna definir na grandesa più xeneral de ła refretansa spetral.

Ne agiutemo eora col difuxor refreténte ideal. El xé un corpo (ideal, dónca teòrego) chel no asorbe e no trasmete, ma'l refrete a difuxion ła radiasion ciapada co radiansa o łuminansa ugual per ogni àngoło de refresion e in manièra indipendénte da ła diresion de ła radiasion incidénte. Come prima reałixasion del conceto de difuxor refreténte ideal se definise el fator de radiansa (radiance factor) o el fatore de łuminansa (luminance factor) come el raporto infrà ła radiansa de un'àrea e quea del difuxor ideal refreténte iradià 'nte ła stésa manièra.

Referéndose a sto corpo ideal, el fator de refresion (reflectance factor o reflection factor) de un corpo el xé el raporto intrà el fluso refreso dal corpo in un determinà cono co un vèrtexe sul corpo considerà e el fluso refreso dal difuxor refreténte ideal.

El fator de refresion el xé dónca na grandesa qualsesia chel corispónde:

  • a ła refretansa spetral se el cono el xé na emisfera;
  • al fator de radiansa spetral se el cono el xé stréto.

Un tìpego spetrofotometro el xé bon a mixurar el fator de refresion spetral a intervałi de 10 nm 'ntel'intervało da 380 a 730 nm.