George Peppard

Da Wikipedia, l'ençiclopedia libara.
Va a: navigasion, serca

George Peppard, o George Peppard jr. (Detroit,1° novenbre 1928, xe stà un ator, regista e produtor sinematografego 'merican.

Biografia[canbia | canbia sorxente]

George Peppard nel film Colazione da Tiffany

Nato a Detroit, 'ntel Michigan, 'ntel 1928 so fìo de un costrutor ediłe conosùo de queła xona, George Peppard Sr., e de 'na cantante d'òpara un mucio apresà, Vernelle Rohrer. Dopo el diploma a Deaborn (Michigan) e 'na łaurea in inxegnerìa a ła Purdue University el s'a dedicà sercando de reałixàr el so sogno, exordìndo 'ntel 1949 al teatro de Pittsburgh.
Sucesivamenti, nei ani sinquanta el s'a trasferìo a New York par studiàr a l'Actor's Studio, indove el gà seguìo corsi del mestro Lee Strasberg in persona, fasendo el so exordio po'a Broadway a metà ani sinquanta, łavorando anca ne łe prime serie tełevixive, tra cui The United States Steel Hour 'ntel 1956, dove el gà conosùo Paul Newman.

'Ntel 1957 el gà fato el so debuto nel sinema in Un uomo sbagliato, mentre in tv xe conparso in un epixodio del straseguìo 'Alfred Hitchcock presenta', refarense che ghe gà permeso, un puochi de ani drìo, de eser sielto pa'l ròło del fio inlegìtimo de Robert Mitchum in A casa dopo l'uragano, film che gà otegnùo un otimo suceso. Al steso tenpo el gà continuà a loarare a Broadway, dove 'ntel 1958 el gà recità in The Pleasure of His Company, che ło gà portà a firmàr un contrato co' ła MGM.

Dopo ch'el gà renonsià de interpretàr el ròło de "Vin" nel film I magnifici sette (sta parte vegnarà interpretà da Steve McQueen), xe deventà indesmentegabiłe cofà coprotagonista mas-cio de Audrey Hepburn in Colazione da Tiffany, che ghe gà dà un bon suceso fasendoghe scoverxer a tuti el so tałento. 'Ntel 1962 tòca a La conquista del West, 'ntel 1963 I Vincitori e 'ntel 1964 L'uomo che non sapeva amare co' Carroll Baker, che anca se film de minor rimàrco aconparandoło co'l caołaor de Blake Edwards, Colazione da Tiffany, gà fato cussì conoser George dando un prestigio a ła so carièra. Anpò, drìo el suceso otegnùo in quei ani, ła so paraboła gà tacà un fià adàxio decadèr partesipando senpre pì speso a film senpre più andànti.

No podendo catàr pì ròłi che ghe dase sodisfasion, el gà decixo de dedicarse a ła tełevixion laorando in diverse serie tełevixive, tra cui Banacek tra el 1972 e 'l 1974 e Doctors Hospital 'ntel 1975. 'Ntel 1978 el gà decidesto de prodùxer, dirigèr e interpretàr un film suo patòco: Cinque giorni da casa. I rexultadi però no xe stài boni e cussì el xe stà costreto a coverxarse de dèbiti. El suceso mancà par sto film ło gaveva rexo s-ciavo de l'alcol par qualche ano. Xe pròpio par cauxa de l'acol, che 'ntei ani drìo ghe xe stà oferti dei ròłi in film che jera speso de mexa vigògna. 'Ntel 1981 a George ghe xe stà oferto de interpretàr Blake Carrington ne ła serie Dynasty, el gà xirà l'epixodio piłota co' Linda Evans e Bo Hopkins, ma pì tardi el sbrasarà el ròło a cauxa de descòrdi capitài co' i autori de ła serie e ła parte xe stà ciapà da John Forsythe. 'Ntel 1983 ghe xe stà oferta, drìo el refudo de James Colburn, el ròło de cołonèło John "Hannibal" Smtith ne ła serie tełevixiva A-Team, che gà rescòso tanto suceso sia nei Stati Unìi che a l'estàro. Ła serie xe durà sinque staxon, dal 1983 al 1987.

Vita privàda[canbia | canbia sorxente]

Peppard s'à spoxà sinque volte:

  • Helen Davies (dal 1954 al 1964), da ła quała gà avùo do fiòi, Bradford e Julie;
  • Elizabeth Ashley (1966 – 1972), so partner 'ntel film L'uomo che non sapeva amare, e da ła quała gà avùo un fio, Christian;
  • Sherry Boucher-Lytle (dal 1975 al 1979);
  • Alexis Adams (dal 1984 al 1986);
  • Laura Taylor (dal 1992 al 1994).

El gà mołà de bevare a ła fìn dei ani setanta e drìoman el s'à doparà, nei ultimi ani de ła so vita, par jutàr le persone vitime de ła dipendensa da alcol.

'Ntel 1992 el gà conosùo ła so quinta mujer, Laura Taylor (ła so amiratrice nùmaro uno) e i s'à spoxà subito. Senpre 'ntel steso ano ghe vien diagnostegà un càncaro ai polmoni. Laura ghe xe restà visin tendendoło nei ultimi 18 mexi de vita. Anca s'el gera małà, el gà laorà sensa fermarse e infati, poco 'vanti de ła so morte, el gà conpletà l'epixodio piłota par 'na serie nòva 'ntel 1994 (un derivà de Matlock). El xe morto in quel'ano, a 65 ani, de polmonìa par conplicasion simentàe da łe cure ch'el gera drìo far par conbatèr el càncaro ai polmoni, ne ła so casa de Los Angeles, indove el viveva in conpagnìa de so muger. El xe sepełìo ne ła tónba de famegia del Northview Cemetery de Dearborn, ne ła contea de de Wayne nel Michigan.

Filmografia[canbia | canbia sorxente]

Note[canbia | canbia sorxente]

  1. Nel film La caduta delle aquile, dove el interpreta el ròło de pilota de aerei da guera todesco, inpara daseno a svołàr ciapando el brevéto de piłota siviłe.

Video da vardàr[canbia | canbia sorxente]

- Video so youtube - Un tributo a l'ator