Cecil Rhodes

Da Wikipedia, l'ençiclopedia libara.
Va a: navigasion, serca
Cecil Rhodes

Cecil John Rhodes (5 lulio 1853 – 26 marso 1902) el xera on sudafricano de origine inglexe. Omo de afari, posidente e politego, Rhodes el ga fondà la De Beers, na compania che na olta la controlava el 90% del marcà de i diamanti. Ancò la De Beers la controla el 60% del marcà. Rhodes el credea a la superiorità britanica e el ga tentà de costruir on inpero che portase la cultura inglexe en tel mondo. Traverso la so Conpania Britanica Sudafricana el ga controlà i teritori de la Rhodesia del sud e del nord (ancò Zinbabwe e Zanbia), ciamadi così en so onore.

Primi pasi[canbia | canbia sorxente]

Cecil Rhodes el xera fiol de Francis William Rhodes, on prete anglicano, e de Louisa Peacock. Cecil el ga vù tanti fradei, tra i pi famoxi Francis William, el pi vecio e on colonel de l’esercito, e Herbert, on latifondista en Sudafrica. Co Cecil el xe stà malà, la fameja la lo ga mandà da so fradel Herbert en Natal par curarse e laorar en na piantagion de coton. Dopo chel ga laorà co so fradel, el zoino Rhodes el xe ndà a Kimberley en tel otobre 1871. Rhodes el xe stà bon de otener on finansiamento da N.B. Rothschild & Sons e el ga scominsià a costruir el so inpero ne le fortune minerarie. Co i so conpari John Merriman e Charles Rudd el xe rivà a controlar el marca sudafricano. Co i schei de i primi diamanti, Rhodes el ga cronpà de le fatorie, ona de queste – Vooruitzicht – la xera de Johannes Nicolaas De Beer. Sto nome el finirà par esar quelo de la so conpania diamantifera. Dopo verghe lasà i so afari en man de i so soci, Rhodes el xe ndà a Oxford par finir l’università (1873, e 1876-77)

Diamanti[canbia | canbia sorxente]

En tel 1874-75, durante na pausa de i studi, Rhodes el ga consolidà la so presensa en Kimberley, vinto el contrato par ponpar l’acqua fora da le miniere e asicurà lo sfrutamento de altri tereni. En tel 1880 el ga fondà la De Beers Mining Conpany (Conpagnia Mineraria De Beers) che la xe presto diventà la pi inportante conpania de Kimberley.

Politega[canbia | canbia sorxente]

En tel 1880, Rhodes el se sa presentà par el segio de Barkly West, on distreto del Griqualand abità da boeri. El xe stà eleto e el xe rimasto parlamentare tuta la so vita. En tel 1890, Rhodes el xe diventà el Primo Ministro de la Colonia del Capo. Da primo ministro el ga scrito legi che le jutava le conpanie minerarie e le industrie. Tra ste legi la Glen Grey, na lege che la permetea lo spostamento forsà de i neri par farghe posto a l’industria. En tel 1895, Rhodes el ga sostegnù on ataco militare contro la Republica del Transvaal, el Jameson Raid. El ataco el xe falio e so fradel Frank el xe fini en prison. Rhodes el ga dovù dar le dimisioni da primo ministro.

Rhodes e l’inpero[canbia | canbia sorxente]

Vigneta so el pian de Rhodes de costruir on telegrafo da el Cairo a Sità del Capo

Rhodes el volea slargar el inpero britanico. Rhodes el ga senpre credù che la cultura inglexe la fuse la pi inportante del mondo. La so prima mosa la xe stà quela de espandarse a nord. El ga visità i capi pi inportanti de i teritori a nord del Transvaal par otener le concesioni minerarie. A lo steso tenpo, el xe senpre riusio a otegnar el protetorato inglexe so le concesioni minerarie. Da na parte lu el ge gudagnava i diriti comerciali, da qe l’altro el slargava la zona de influensa de el Regno Unio. Rhodes nol volea che la Corona inglexe la se interesase diretamente de i so teritori. El so pian el xera de ciamar coloni inglexi e marcanti come lu par parar vanti le colonie. Londra no la gavea schei par pagar i aministratori, lu el ga proposto de pagar de tasca sua co l’acordo de tegnarse tuti i diriti de le miniere. El governo inglexe el xe stà dacordo parché così se tegnea portoghexi, todeschi e boeri lontan da i teritori del nord.

Concesioni[canbia | canbia sorxente]

Rhodes el ga provà varie olte a verghe concesioni en tel Matabeleland. En tel 1888, el ga mandà da el re Lobengula John Moffat, fiol de on misionario che el re stimava. Moffat e Francis Thompson, ono de i agenti de Rhodes, i ga promeso che solo diexe bianchi i gavaria laorà en te le miniere en Matabeleland. En tel documento scrito, ste robe no le gera. El gera invese la clausola che la Conpania Britanica del Sudafrica (BSAC) la podea far quel che la volea. Co el re se n’a incorto, el volea blocar el contrato, ma i inglexi i no ga sentio storie. Co sto sistema, Rhodes el ga otegnù concesioni da tuti i grandi capi de la region. El ga anca tentà de entrar en Katanga (Congo), ma el re Msiri el xe sta pi furbo de lu e el ga dito de no. Rhodes el ga domandà de verghe la concesion so el Bechuanaland (ancò Botswana), ma tre capi – tra questi Khama III - i xe ndà fin a Londra par rimaner soto l’aministrasion inglexe direta. Co i ga vinto, Rhodes el ga comentà: “La xe na umiliasion, esar batù da tri negri”.

Rhodesia[canbia | canbia sorxente]

La BSAC la ga formà el so corpo paramilitare par controlar i teritori en concesion. Tanti de i coloni che i xe ndà en Africa par diventar minatori, i xe invese pasà a l’agricoltura. La BSAC la ga conbatù varie guere co i ndebele e i shona. I teritori de la BSAC i no gavea on nome.La zente la scominsià a parlar de Zanbesia, dal Fiume Zanbesi. En tel magio 1895 el nome el xe stà canbià oficialmente en Rhodesia del Sud, par i teritori che i formarà el Zinbabwe, e Rhodesia del Nord-Ovest e del Nord-Est, par i teritori che i formarà el Zanbia. A la so morte en tel 1902, Rhodes el xe stà portà a Matobo, rente de la sità de Bulawayo, e sepelì so la colina che ga na vista so i vasti altipiani de l’Africa, come el gera scrito en tel so testamento.

El politego e l’omo[canbia | canbia sorxente]

Rhodes el ga senpre sostegnù el partito liberale, ma anca el partito nasionalista irlandexe. En Sudafrica, el xera tolerante verso i sitadini de origine olandexe e el ga pagà de tasca soa parché i podese verge le scole par studiar en olandexe. A la so morte, el ga lasà quasi tuta la so propietà en Sudafrica al governo locale, e destinà i profiti de le so conpanie par pagar i studi a Oxford a zoeni de le colonie inglexi.