Strada dei Scarubi

Da Wikipedia, l'ençiclopedia libara.
Jump to navigation Jump to search
Malga Canpiłia
Vista suła Val Posina dała Strada dei Scarubi

Ła Strada dei Scarubi ła xe na strada de montagna sul Pasubio, raquanto streta e no sfaltà, co diverse frane de sasi e giara specie in primavera. No ła xe verta al trafico. Łonga 9 kiłometri e quatroxento metri, ła parte dal Paso Xomo, a 1056 m, e ła riva ałe Porte del Pasubio, a 1934 m, rente el Rifugio Papa. Ła xe ła strada pi panoramica e inpresionante dełe Picołe Dołomiti e ła core sul bordo de profondi buroni ke casca xo in Val Poxina, con vista sul Monte Magio, Monte Majo, el Coston dei Laghi, el Toraro, i monti de Tonezza del Cimon e l'altopian de Asiago. Dopo un kiłometro dal paso Xomo, la pasa Bocheta Canpìłia, a 1210 m, da dove ke parte ła Strada dełe Gałerie, un troso scavà 'nteła piera durante ła prima guera mondiałe e ke riva direto al Rifugio Papa. Dopo Malga Canpiłia, ke vien lasà in baso suła destra, ła strada ła monta in presa con diversi tornanti finke no ła riva alta suła Val Sorapache.

Ła Strada dei Scarubi in Val Sorapache, soto i Forni Alti, a destra

Lì ła cata el Troso Eoropeo E5, ke vien su dal Paso deła Borcoła e ke ghe va drio in sto ultimo toco, 'ndove ke ła core in quota soto el versante nord-est dei Forni Alti. Se riva cusì ałe Porte del Pasubio, dove se cata ła Strada dei Eroi, ke ła vien su dała Val Canałe e ke ła finise łì rente, al Rifugio Papa. Dałe Porte del Pasubio, dove ke ghe xe anca ła Malga Pasubio de Sora, ła strada continua pi su, fin ała cieseta rente ała Sełeta Comando.

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Strada_dei_Scarubi&oldid=888853"