Doménega

Ła doménega (o anca dominica) el xe el zorno de ła setimana tra el sabo e el luni.

Ła paroła la ven dal latin dies dominicus, zorno del Signor; par el mondo romano, prima che vegnese el Cristianesimo, el se ciamava dies solis, zorno del Sol, doparà 'ncora deso in tei paesi anglofoni (Sunday) e del nord Europa.

Nel cristianesimo el xe el zorno da dedicarghe al culto, che tołe el posto del sabato ebraico a causa de ła risurezsion de Gesù, che ła xe avegnùa el zorno dopo el sabo (Marco 16,2; Luca 24,1; Giovanni 20,1).

I catołici i santifica ła doménega atraverso ła parteçipazsion a l'Eucaristia, el riposo dal laoro, e standoghe adrìo a ła só fameja e anca in xenere ai malati e ai soferenti.

In Europa e in America Łatina el xe ritengù l'ultimo zorno de ła setimana, invezse in tei Stati Uniti e in Braxil el xe ritengù el primo.