Riviera de ła Brenta

Ła Riviera de ła Brenta ła xe ła xóna urbana, stòrego-paexagìstega, catà lóngo el "Navejo de ła Brenta", el vecio àlveo de ła Brenta Vecia, del fiume Brenta che ła scoménsa a Stra e finise a Fuxina inte ła łaguna de Venesia; ła tol drénto i paéxi de Stra, Fieso, Doło, Mira, Oriago e Malcontenta.

El corso de aqua del Naviłio el ga vuo un importante rólo come via de comunicasion intrà ła łaguna de Venesia e el padovan.

L'àrea ła xe caraterixada da ła prexensa de un mucio de viłe, tirade su infrà el XVI e'l XVIII sècoło da łe fameege patrisie venesiane, che łe testimonia ła potensa del patrisiato. A quei tenpi inte ła Riviera ghe se rivava sóło movéndoxe in barca, perché łe strade de deso łe xe stae fate daspò.

I nòbiłi vèneti i gera trasportai sul fiume da na gałia ciamada Burchieło tirà vanti da łe rive da ómeni, bó o cavałi, mentre le robe łe gera trasportae da barche ciamade Burchi. Ancuo ła croxera lóngo ła Riviera de ła Brenta ła xe n'atrativa turìstega.