Reprodusion

Da Wikipedia, l'ençiclopedia libara.


Inte le specie dei uniselulari la reprodussion asessuata par mitosi la xe l'ùgnola maniera par generare nuvi individui: par sta rason la sèlula fiola la xe squasi senpre conpagna a la mare par genoma e l'introdussion de variabilità genètica la xe assè più difìssile.
El fuco (sora) xe el màscolo del'ava e no'l ga altro rolo biològico cognossudo se non quelo de varentare la reprodussion sessuata par la generassion de nuvi fuchi e ave regine (come quela soto). Le ave da mandòpara le se gènera par na particolare forma de reprodussion asessuata ciamà partenogènesi.
Le strategie r e K de reprodussion le xe modeli che i descrive situassion estreme, ciaramente in natura le varie specie le ga ndamenti dei nùmari dei individui manco prevedìbili, cussì come miga prevedìbili le xe le variassion del'anbiente.

La reprodussion, o procreassion, la xe el processo biològico fondamentale, grassie al qualo da un o più organismi genituri se ga la generassion de un nùmaro varìàbiłe de fiuli. Sti qua, rissevendo l'informassion genètica, i xe donca caraterizai da un genotipo sìmile a quelo dei genituri e de frecuente i ghe someja anca par fenotipo. Se trata de un fenòmeno fondamentale par la stessa definission de vita: tuti i organismi dei quali semo a cognossensa i se ga orisenai da altri grassie a la so reprodussion e cussì capitarà par le generassion che le verà dopo.

In natura ghe xe do fondamentali modalità de reprodussion:

  • Reprodussion asessuata: un ùgnolo organismo el crea fioli che i xe, par genotipo, gualivi a quelo de partensa: se poe otegnere fenotipi deversi par l'influensa che l'anbiente el ga sul'espression gènica e donca la determinassion dei caràtari de l'organismo durante tute le so fasi de vita. Sto tipo de reprodussion xe caraterìstego de le forme de vita più sénplese, ma miga solo. I virus i xe parassiti obligai che i desfruta i paramenti de sìntesi proteica de le sèlule par orisenare i àcidi nucleici, le proteine e le altre parte dei virioni fioli. I organismi uniselulari, come i bateri, i se divide par mitosi, processo che el sèvita la replicassion del DNA inte na copia in teoria spuada de quela de la sèlula mare. Co un sistema de sto tipo senbra inpossìbiłe l'introdussion de la variabilità a la base del'evolussion che la porta a pussìbili adatamenti ai canbi del'anbiente, ghe xe vie de scanpo. Le mutassion le xe canbiamenti dei nucleotidi che i definisse la sequensa del DNA: le poe capitare in maniera spontànea o par influensa anbientale (dano fìsico, chìmego, biològico) e soravìvare ai sistemi de reparassion del DNA stesso par èssare destinae a le generassion sucessive. Oltra a sti fenòmeni, xe pussìbili fenòmeni de trasformassion batèrica: organismi sìmili i se scanbia tochi de genoma introdusendo varìàbiłi genètiche. Inte i organismi co sto tipo de procreassion, donca, le idee de reprodussion e sessualità (definia come scanbio de informassion genètiche), le xe separae, anca inte i tinpi inte i quali sti fenòmeni i se verìfega. La reprodussion asessuata xe pussìbile anca par organismi conplessi, fin ai funghi pluriselulari (le spore no le xe gameti par custion de nùmaro de cromosomi omòloghi, dopio e miga sìngolo), piante (par esenpio, ràsolo e incalmo i vien desfrutai da senpre dai contadini) e ai anemali (indove la poe verifegarse insieme a mecanismi de reprodussion sessuata, par esenpio, le ave da mandòpara le xe generade par partenogènesi, fusion dei òvuli de la regina sensa spermatozoi).
  • Reprodussion sessuata: la presensa dei sessi inte le specie, che donca le ga fémene e màscoli, a la base de sto processo, la parmete la generassion de fioli co patrimonio genètico mis-cio, par metà de la mare e par metà del pare. I organismi, tuti pluriselulari e conplessi come anemali e piante, che i parmete la reprodussion sessuale, i ga tochi caraterisai miga da le sòlite sèlule somàtiche, ma da sèlule germinali, definie da la possibilità de ndare incontro a la gametogènesi. Sto processo xe fato da division meiòtiche oltra che de le mitòtiche, caraterìsteghe de le sèlule somàtiche: le parmete la produssion de gameti (come òvuli e spermatozoi), aploidi, o sia che i ga la metà dei cromosomi de na sèlula normale (diploide). Par sto fin, sti organismi i forma n'aparato genitale (o reprodutivo) che, inte le piante, poe èssare formà dai òrgani che ciamemo fiuri. El raporto sessuale (cussì come l'inpolinassion) el serve a vissinare i gameti a n'anbiente bon pa' la fecondassion, che el xe la fusion de do gameti dai do sessi par formare un novo organismo a sèlule diploidi e cromosomi omòloghi (in te un paro, 46 in tel'omo, ghe xe na squasi-copia da la mare n'altra dal pare. Sta particolare strategia la unisse, come intenti e inte i stessi tinpi, la reprodussion e la sessualità, come la dise el stesso nome del processo.

A ste do stratejie de reprodussion ghe coresponde deverse stratejie de soravivensa de la specie. La reprodussion la porta, come pian generale, a un nùmaro de fiuli mazor a quelo del o dei genituri, anca se no par tuti i individui de la specie sto fato se poe verifegare. La reprodussion sessuata la xe assè più sénplese da preparar e in tèrmini de quantità la ga n'eficensa vero più granda, secondo el modelo dito stratejia r: co che i prolìfara sti organismi i ga ritmi esponensiali e i razonze in puchi tinpi grandi nùmari de individui. Tutavia sti qua, sìmili o gualivi dal ponto de vista genètico, i ga na scarsa bonta de adatamento a le variassion del'anbiente e co che sto qua no'l xe più favorévole, la deminussion de sto nùmero la sarà oncora velosse. Deversamente, soratuto alcuni organismi a reprodussion sessuata i sèvita un modelo reprodutivo dito stratejia K: anca se i ritmi de reprodussion i xe assè più lenti, la mazor variabilità introdota da la sessualità, la parmete n'adatamento più ràpido ai canbi del'anbiente, cussì che el nùmaro dei individui el xe tanto più stàbile respeto a quelo che se osserva in st'altro modelo.

Controło de autoritàLCCN (ENsh85112953 · GND (DE4017982-5 · BNF (FRcb11932756h (data) · NDL (ENJA00570438
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Reprodusion&oldid=1036196"