Puparin

Da Wikipedia, l'ençiclopedia libara.
Jump to navigation Jump to search
Sto articoło el xe scrito in venesian

El puparìn xe 'na inbarcasión de ła Łaguna de Venesia, indotàda de forme daseno ełeganti, segonde soltanto a quełe de ła gondoła.

Ła strutura[canbia | canbia el còdexe]

El puparìn xe łongo intra 9 e 10 metri (xe el più łongo tra i sandołi) e łargo 1,20 metri. Pur esendo un tipo de sandoło, xe l'unica inbarcasión łagunar oltre ała gondoła ad aver 'na strutura asimetrica. Inaxònta ła pol ricordar ła gondoła par ła forcołaco'l comio e l'alta postasión del popièr su ła covèrta. El pol eser utiłixà a do remi e anca a quatro.

Utiłixo[canbia | canbia el còdexe]

Par ła so rafinatésa, el puparin 'ntei secołi pasà vegniva uxà da alcune famegie patrisie venesiane come barca de casada, overosìpia cofà inbarcasion privàda de ła famegia (ła casada apónto), segno de ełevàda condisión social. Łe riche decorasión che gaveva ste barche portava i cołori de ła famegia de spetànsa. Oramai el puparìn vien utiłixà prinsipalmente ne łe regàte, parciò vien anca ciamà sandoło da regata.