Novegno
El Monte Novegno el xe alto 1552 m e el se cata tacà Schio, in provinça de Vicensa. Ła xe na montagna isołà, un acròcoro, che se spense verso ła pianura, a forma de łongo cùneo fra ła Val Poxina a nord, ła Valdastego a est e ła Val Leogra e ła pianura a sud, łigà al Pasubio dal Paso Xomo (1056m). El masicio cronpende anca el Priaforà (el se ciama cusì perkè ghe xe un gran buxo naturałe suła rocia e el se vede anca da distante, dała Val d'Àstego),m 1659, e el Monte Xove,m 1596, noti par i venimenti de ła prima guera mondiałe. El punto pi alto xe el Monte Rivon, m 1591, dove ke ghe xe anca un picoło rifugio deł'Asociasion Nasionałe Alpini.
Storia
Prima guera mondiałe
Fin al 1916 el Novegno el xe sta fora dai conbatimenti perkè ła linea del fronte ła xera tanto pi a nord, passà ła Val Poxina e la Val de Laghi, sułe montagne dełe Laste. Tuto canbia 'ntel magio del 1916 quando ke i Austriaci i fa partire 'n'ofensiva, ke noialtri ciamemo "Strafexpedition" (spedision punitiva). El giorno 16 el 3° regimento Kaiserjaeger e el 14° e 59° regimento de fanteria austriaci i taca el Sojo d'Aspio, el Coston e ła Costa d'Agra, difesi dała 53.ma division de fanteria taljan, ke resiste eroicamente anca se con tante perdite. El forte fogo de artijeria austriaca, ala fine, fra el 17 e el 18 magio, fa perdere ai Taljan el Sojo d'Aspio e ł'Albergo Fiorentini. Deso i Austriaci i se buta suła seconda linea taljan e i riese a ocupare Monte Magio. El 18 magio vien ciapà el Coston d'Arsiero e ła Sima de Canpołuzo. El 19 i Austriaci i vien xo e i ocupa el Paso deła Vena, el Forte Canpomolon, el Monte Toraro e el Spitz Tonesa. El 21 vien ciapà el Monte Majo, Laghi, el Monte Seługio e el monte Tormeno. Senpre vegnendo pi a sud, i Austriaci i riva a conquistare el Monte Cimone il 25 magio e el monte Caviojo, pi soto, el giorno dopo, quando ke i ocupa Arsiero e el forte de Casa Rati, xo in Valdastego. Xe a sto punto ke'l Novegno resta l'ultimo monte prima ke se verxa davanti tuta ła pianura veneta.
Vegnendo su dała Val Poxina e da Arsiero, el 30 magio i Austriaci i riese a ocupare el Priaforà, coł'obietivo de rivare al paso de Canpedeło, Monte Xove e 'ndar xo in pianura. l'8 de giugno, però, vien trasferia sul fronte orientałe, par darghe drento ai Rusi, ła 61.ma division de fanteria pena rivà in Tiroło e ke doveva servirghe par sfondare dopo tute łe perdite ke i Austriaci gaveva avudo dała fortisima resistensa dei Alpini e dei fanti taljan deła 35ma division de fanteria.
El 12 giugno el 4° regimento Kaiserjaeger prova par 3 volte a sfondare al Paso de Canpedeło e verso Monte Xove, ma ła resistensa dei Taljan xe cusì forte ke par i Austriaci no ghe xe gnente da fare e lì finise el masimo del so sfondameno verso Schio e Vicensa.
Seconda guera mondiałe: ła Rexistensa
El Novegno, durante ła Resistensa contro i naxisti e i fasisti, dal 1943 al 1945, xera tera, come tute łe Picołe Dołomiti, dove ke operava łe formasion partixane, pogià el pi dełe volte dała popołasion dełe contra'. Naxisti e fasisti, in rapresałja, ghi na fato ajo contro i siviłi in diverse ocasion. Par quanto riguarda el Novegno, el 30 apriłe del 1944, reparti del 3° batałjon del 12° regimento SS de polisia de Verona i bruxa dełe caxe a S. Caterina e i fuxiła so papà de un partixan. In giugno nase ła brigata partixana "Garemi" e ł'atività de guerija ła se fa pi forte. Ałora vien destinà ała controguerija el 263° batałjon orientałe deła Wehrmacht, comandà dal capitan Fritz Buschmeyer, e fato tuto de Rusi e Ucraini.
El 16 e el 18 giugno el batałjon el taca ła contra' de Vałortigara: vien portà via a Maran Vixentin Bruno Brandellero, dove el vien torturà e copà, sul posto vien torturà e copà do carabinieri ke se gaveva rifugià lì, Guido Vigoni e Renzo Ghisi. Pi de sento ostagi vien portà xo in gałera. Ła fine deł'incubo ła rivarà ała fine de apriłe - primi de magio del 1945.