José Luis Rodríguez Zapatero

José Luis Rodríguez Zapatero (Valladolid, 4 de agosto 1960) el xe un omo połitego spagnoło, presidente del Governo dal 17 de apriłe del 2004.

Nato da na fameja de sinpatie sociałiste (so nono el ga conbatù inte ła Guera civiłe spagnoła e el xe sta copà dai franchisti), Zapatero el ga aderìo al PSOE (Partio Sociałista Operaio Spagnoło) inte el 1979, poco dopo la morte de Francisco Franco e el ritorno a ła democrasia. Ntel 1982 el se ga laureà in dirito e el xe diventà, qualche mese dopo, docente universitario a León, ma ła pasion par ła połitega ła xe prevałesta e, arivà a l'età dove nol podeva pì esare ciamà a fare el miłitare, el ga finìo ła cariera academica.

Ła cariera połitega

Diventà segretario comunałe del PSOE a León e membro influente deł xoventù sociałista, Zapatero el se ga candidà a łe elesion połiteghe del 1986, vegnendo ełeto deputato (uno dei pì xovani ełeti de ła storia a łe Cortes).

El PSOE tutavia, el xe 'ndà in crixi e inte el 1996 el xe sta sconfito inte łe consultasion połiteghe dal Partio Popołare Spagnoło condoto da José María Aznar. Zapatero, durante sto perodo, el se ga distinto come uno dei opoxitori pì intranxigenti de Aznar, sora-de-tuto par quanto riguarda ła łota a l'ETA.

Ntel 2000, dopo łe dimision del segretario Joaquín Almunia, el PSOE el xe ritornà in crixi parché nol riusciva a ełesare on segretario apresà sia da ła baxe che dai dirigenti. En marso, dopo dì de tratative estenuanti, a xe sta selto Zapatero come leader. Ła selta ła zera cascà sol deputato sociałista parché el tendeva a stemperare i disidi a l'interno del partio, e el xe sta soranominà Sosoman (omo insipido, sìalbo, mediocre). Ła so ła sarìa dovua esare na segreteria de tranxision, e invese Zapatero el xe riusìo a conquistar ła popołasion spagnoła, diventando subito uno dei połiteghi pì amà.

Ntel 2003 el xe sta nominà vicepresidente de l'Internasionałe Sociałista, e oncora na volta ła soa ła xe sta na sielta de conpromeso tra i sostenitori de Tony Blair e quełi de Lionel Jospin. Poco dopo el xe sta sielto dal PSOE come candidato presidente in vista de łe ełesion połiteghe del marso 2004. El se ga oposto netamente a ła guera in Iraq vołesta da George W. Bush, otenendo cusì el sostegno de ła majorans dei spagnołi.

El ga recuperà cusì on mucio de voti ai popołari, ma ła so vitoria ła xe sta determinà sora-de-tuto dai devastanti atentati islamisti che i ga colpio Madrid, provocando 190 morti e xentenara de ferìi, soło pochi dì prima de łe votasion. So l’onda de l’indignasion e de ła protesta contro el governo (che el gavarìa sconto informasion par incolpare l'ETA) Zapatero el xe riusìo a ridare ła vitoria ai sociałisti dopo oto ani de governi popołari.

Altri progetti

• Wikimedia Commons

• Wikimedia Commons el detien imàjini o altri file so José Luis Rodríguez Zapatero
• el detien schemi gràfeghi so