Intestin tenue

Schema del aparato degerente che el mostra i òrgani del trato gastro-intestinale e la division del intestin tenue in duoden, dezun e ìleo. No la xe marcada la neta distision in intrà i primi do a la flessura duoden-dezunale, mentre xe evidensià come el passajo in intrà dezun e ìleo el sia manco recognossìbile.

Vision in gastroscopia de la prima parte de un duoden san, se nota le pieghe semilunari. Sto esame el poe analizare solo le prime do porsion del duoden, mentre co na colonscopia se poe salire par qualche sentìmetro de ìleo (ileoscopia retrògrada). El resto del'intestin tenue xe più difìsile da védare par drento, i mètodi de enteroscopia, infati i no dòpara strumenti controlai da fora, ma càpsule che le va vanti da sole o spente da la peristalsi.

Imàsene istològica de la mucosa entèrica, colorada co ematossilina-eosina. Se nota l'epitelio co la so làmina propia, solevai in vili a forma de deo reti da n'asse de muscularis mucosae. Soto se recognosse struture giandolare dite cripte, formae da tipi de sèlula epiteliale difarenti respeto ai enterociti che, conpagni a le sèlule caliciformi (i spassieti descolorai - pa la produssion de muco - in bianco in intrà le sèlule più violete), i dòmina el strato epiteliale del vilo.

L'intestin tenue, che el vien ciamà pìcolo intestin anca se'l xe la parte più longa, ma streta, del buelo, xe n'òrgano del'aparato degerente catà in intrà el stómego e l'intestin crasso. Entèrico' xe l'ajetivo, derivà dal grego, che el vien doparà i relassion a sto trato del canale alimentare, mentre co intestinale se signa sto qua conpagno al grosso intestin. L'intestin tenue xe longo su par zo 7 metri, de sòlito, co un diàmetro mèdio de 2,5 cm, in deminussion manman che se va vanti da le do struture che elo demarca, el piloro a monte e la vàlvola ileo-cecale a vale. St'òrgano el saria da considarare la parte fondamentale del'intiero aparato parché xe qua che i processi degestivi i riva al ponto in tel quale le sostanse nudrigadive (e la mazoransa de quele miga nudrigadive) le poe passare traverso la parede a la circolassion sanguigna e linfàtica, o sia le vien assorbie.

L'assorbimento del magnare xe fato co granda eficensa a sto livelo parché la superfisse messa a desposission la deventa zigante par i repiegamenti de la parede. Par drento se vede la desposission a pieghe semilunari, più evidente a livelo duodenale, la desconpare a livelo ileale; su tuta sta superfisse ghe xe pìcoli solevamenti de mucosa a forma de deo, ciamadi vili; infin le stesse sèlule epiteliali sul versante luminale le slarga la superfisse de contato co la so menbrana selulare che la se alsa in microvili.

L'anatomia micròscopica la vede qua, come in altre parte del tubo degestivo, na parede fata de quatro tònaghe soraposte. La mucosa la xe formada da n'epitelio colonare a sìngolo strato co sèlule ciamade enterociti, come za dito fortemente specializade inte l'assorbimento de sostanse nudrigadive e miga nudrigadive (aqua, vitamine, sali minerali); soto ghe xe la làmina propia e la muscularis mucosae che la se stende par su fasendo da asse fondante el vilo. La sotomucosa la ga drento el plesso sotomucoso de Meissner e la muscolare el plesso mioentèrico de Auerbach (i costituisse el sistema nervoso entèrico). Infin gavemo la tònega aventissia che la poe èssare ciamada sierosa inte la mazoransa del vìssere che la xe querta da peritoneo.

Parte

L'anatomia del'intestin tenue xe de sòlito descrita come union de tre porsion messe in serie:

• Duoden, quela più prossimale, sùbito dopo del piloro e donca del stómego. El ga na forma a C, convesso verso drita, brassando la testa del pàncreas, òrgano col quale xe in streto raporto. N'altro raporto inportante xe dove che la tersa porsion duodenale se cata in intrà aorta adominale e alteria mesentèrica superior, pena soto l'orìsene de st'ultima. El duoden se poe divìdare in quatro parte, la prima (anca dita bulbo o anpola) e la tersa dite trasversali e la seconda (dessendente) e la quarta (assendente) dite verticali. De drento, la parede mediale de la seconda porsion duodenale, la risseve i suchi biliare e pancreàtico: a sto livelo se poe osservare le do papile duodenali, la menor de sora dove che ghe buta el doto pancreàtico acessorio (de Santorini), e la mazor de soto dove che se cata le struture ciamade anpola del Vater e'l sfintere de Oddi che ela sara e che la parmete ai suchi in converzensa dal colèdoco (via biliare prinsipale) e dal doto pancreàtico prinsipale (de Wirsung). Dal ponto de vista del'anatomia microscòpica, el duoden el se destingue dal resto del'intestin tenue parché el ga le giàndole sotomucosali de Brunner, che le manca dal dezun in dopo. A la fin de la quarta porsion duodenale, l'intestin el fa na curva bastansa evidente ciamada flessura duoden-dezunale, sostegnuda dal ligamento de Treiz.
• Dezun, porsion intermedia, individuà dove che el ligamento de Treiz el segna el ponto dove che l'intestin el se tira vanti dal retroperitoneo dove che se cata el duoden. Se parla da sto ponto de intestin mesentèrico', parché el tubo entèrico el se buta, senpre querto da'n fojeto de peritoneo visserale, in vanti verso la cavità peritoneale, mentre verso drio el resta ligà, traverso la stutura a raisa ciamada mesentere, dove che passa vasi e nervi che i va drento e fora da dezun e ìleo. El dezun el ga sto nome parché, individuà in maniera arbitraria come prima metà sirca del'intestin mesentèrico, in te'l morto el resta vodo, a difarensa dei tochi de intestin che ghe vien prima e dopo.
• Ìleo, porsion distale, seconda metà del intestin mesentèrico senpre butada in cavità peritoneale e tacada al mesentere par drio, la fenisse drento al intestin crasso a livelo de la vàlvola ileo-cecale. Anca se la xe la parte più streta e manco estesa de superfisse assorbente del intestin tenue, la xe specializada par cònpiti specìfissi.

Fisiologia

A livelo del'intestin tenue se sara i processi de degestion de parece forme de magnare. Le macromolècole nudrigadive (carboidrati, lipidi, proteine), grassie ai enzimi che i gaveva za tacà a laorare in boca e in te'l stomego e a queli butai fora anca qua, conpagni ai suchi biliare e pancreàtico (el primo fondamentale par la degestion dei lipidi, el secondo par sùcari e proteine), le deventa manman senpre più picole fin a libarar i sui conponenti micromolecolari, che i poe èssare assorbidi dai enterociti. A cargo del intestin tenue (soratuto duoden e dezun) xe anca l'assorbimento de aqua e eletroliti, miga solo po quili bevudi, ma anca queli secreti dal'aparato degerente stesso a partire da la saliva. Infin anca ioni speciali come el fero e vitamine idro- e liposolùbili le vien assorbie qua. Inportante xe el rolo del'ileo par l'assorbimento de àcido fòlico e vitamina B12, oltra che par el recìrcolo dei sali biliari.

La motilità del intestin tenue la xe caraterizada da onde peristàltiche in tel verso che el ponta al'intestin crasso: le xe generade localmente soratuto dal'atività coordenada de la tònaga muscolare e'l so plesso de Auerbach, ma la vien influensada dal sistema nervoso vegetativo, dai ormoni e da fàrmaci

Altri progetti

• Wikimedia Commons

• Wikimedia Commons el detien imàjini o altri file so Intestin tenue
• el detien schemi gràfeghi so