Infarto miocàrdico acuto

Da Wikipedia, l'ençiclopedia libara.
Jump to navigation Jump to search
Sto articoło el xe scrito in padoan
Sto desegno de un tajo trasversale al'asse apico-basale del core evidensia cossa che se vedaria in caso de infarto de la parede posterior del ventrìcolo de sanca, causà dal'oclusion del'alteria coronaria destra. In te i primi zorni la zona colpia la se recognosse pa'l color pàlido dovuo a la mancansa de sàngue in te'l teritorio ischemizà.
Imàzene istològica al microscopio òtico de quelo che se vede al'autopsia de un miocardio infartuà, colorà co ematossilina-eosina. I cardiomiociti morti i se recognosse parché i no ga el nùcleo. Se nota la presensa de sèlule de la resposta infiamatoria al dano: col passare dei zorni le magna via el toco de miocardio morto che'l vien poi sostituio da un processo reparativo che'l forma na secatrisse.
La destribussion del dolor toràcico che, de sòlito, se conpagna al'infarto miocàrdico acuto, juta molto a fondare un sospeto de sta malatia
L'ECG xe un passo fondamentale par la diàgnosi. In sto caso xe presente el soraslivelamento del trato ST in te le derivassion DII, DIII e aVF che'l juta a logalizare l'infarto come inferior.

L'infarto miocàrdico acuto (IMA, AMI o MI par sigla), anca ciamà ataco de core, xe na malatia cardìaca caraterizada da la pèrdita de un toco de miocardio par nècrosi ischèmica. Sta definission la signìfega che ghe xe parte dei cardiomiociti che i more parché el sangue che ghe riva no'l xe bastante par sodisfare le so necessità vidali: al'ischemia, parola generale che la ìndega tute le situassion de insufissente perfusion emàtica, ghe sèvita l'infarto (o, aponto, nècrosi ischèmica) quando che l'interussion totale a un grupo de sèlule miocàrdiche la dura almanco 15-30 menudi.

La classifegassion del'infarto miocàrdico lo consìdara in te le sìndromi coronàriche acute conpagno al'angina instàbile, che la se difarensia pa'l fato che in sto caso l'ischemia no la dura bastansa par dare morte selulare, contraposte al'angina stàbile che la conpare regolarmente a soje de sforso costanti e la ga mecanismi deversi.

  • El primo livelo de classifegassion de sti quadri xe quelo de le malatie vascolari del core.
  • Conprese in ste qua ghe xe le più relevanti coronaropatie, anca se xe pussìbili anca cause miga logali ma esterne a le alterie coronarie, de infarto e angina, come dissession aòrtica, anemia e shock.
  • Infin, la granda mazoransa de le malatie coronàriche xe ateroscleròtiche, anca se se poe gavere altri mecanismi come la dissession e la rotura coronàrica da trauma, le alteriti che le xe infiamassion de la parede vascolare, ecc.

In st'ànbito, resalta come la squasi totalità dei infarti i càpita co che, dopo un longo perìodo de formassion e créssita, se ga la rotura de na placa ateroscleròtica vulneràbile (contraposta a la placa stàbile che la causa la malatia crònica del'angina stàbile): l'ulcerassion de la parede vascolare causa tronbosi del trato de alteria responsàbile de la perfusion del toco de miocardio che'l fenisse a infartare se la normale situassion sircolatoria no la torna in te i tinpi de soravivensa normali del cardiomiocita. A seconda del logo de la placa (e donca de la tronbosi) in te l'àlbaro dei vasi coronàrici, el toco de miocardio perso xe più o manco grando e stratègico par ma funsion spessìfica del core, co na granda varietà de conplicanse in tel breve o longo perìodo.

L'epidemiologia la descrive l'infarto miocàrdico acuto come na de le malatie de co la più granda incidensa, al ponto che, anca se in te i ùltemi desseni xe mejorade prevension e terapia de sto malano, el resta stàbile come prima causa de mortalità un fià dapartuto pa'l mondo, sora del càncaro e del'ictus. Dal ponto de vista del'eziologia, i faturi de ris-cio de sta malatia i sèvita queli che i xe i aturi favorenti el processo de aterosclèrosi, fato che'l mete l'infarto miocàrdico in te'l giro de la granda categoria de le malatie cardiovascolari. Più probabile resultarà, donca, l'infarto in te le persone che le ga obesità, diabete melito, dislipidemia, ipertension; altri faturi de ris-cio mazori i xe rapresentai dal fumo de sigareta, dal'età medio-avansada, dal sesso mas-cile e da la partegnensa a popolassion ètniche a più granda predisposission. No va desmentegà che ghe xe tuta n'altra serie de situassion a ris-cio aumentà, a frequensa menor in te la popolassion, come malatie infiamatorie cròniche (infetive o anca da alterassion imunitaria come artrite reumatoide e psorìasi), malatie endòcrine come ipotiroidismo e sìndrome de Cushing e tante altre.

La diàgnosi del'infarto se basa su'l sospeto basà su la clìnica e la conferma dada da esami spessìfissi.

  1. El dolor toràcico, logalizà prinsipalmente vanti al peto, de sòlito un fià spostà a sinistra, ma assè variàbile, potensialmente dapartuto dal mento fin zo in pansa sora al bonìgolo. El tìpico logo de iradiassion xe l'arto superior de sanca, ma no'l xe l'ugnolo. De sòlito el conpare in maniera bastansa inprovisa e violenta, razonze in poco tenpo intensità miga soportàbile, e se conpagna a sìntomi ciamadi equivalenti anginosi come dispnea (fià curto), nàusea e gòmito, suorassion freda, sìncope (sbasimento) e batarela: sti qua, anca da soli o conpagni a un dolor in logo miga bituale, se i salta fora al'inproviso i ga da far pensare a n'infarto. La vìsita la vien conpletada dal dotor col'esame obietivo che'l va in serca dei segni de le conplicanse, sensa però pèrdare el tenpo necessario pa'l conpletamento de la diàgnosi e l'inissio de na terapia tenpestiva. Va dito che na menoransa miga streta de infarti, la xe, in verità, asintomàtica, soratuto in veci, diabètissi e done. In sto caso la diàgnosi la se basa su altri faturi, come catare i segni par caso. Altra possibilità xe la morte cardìaca inprovisa conplicansa dovua soratuto a aritmie scatenade dal'infarto stesso.
  2. L'eletrocardiografia (ECG) xe n'esame ancora fondamentale par na diàgnosi de infarto, anca par l'inportansa par la prògnosi e l'influensa su le sielte del tratamento. Parmete anca de stimare quala parte del core xe colpia e quindi el vaso sarà dal tronbo. In base al ECG se destingue le do forme fondamentali de sta malatia che la xe el STEMI (IMA co soraslivelamento del trato ST, el pezo dei do che'l coresponde a un tronbo che'l sara conpletamente l'alteria coronaria e causa n'infarto transmurale, che'l colpisse tuta la parede del toco de cuor colpio) e el NSTEMI (IMA sensa soraslivelamento e/o co sotoslivelamento del trato ST, el mejo par prògnosi che'l xe causà da n'oclusion parsiale associada al'infarto subendocàrdico, esteso solo pa la parte de parede manco vascolarizada e più sensìbile al'ischemia).
  3. El dosajo in te'l sangue de marcadori sircolanti de nècrosi dei cardiomiociti, soratuto ancó la troponina I, che, oltra a èssare spessìfica del mùscolo cardìaco, la parmete de destìnguare infarto e angina instàbile, dove che no se cata sto rialso.

Sti qua i basta pa confermare o esclùdare na diàgnosi de infarto, ma ciaramente i no xe i ultimi che i vien fati. Spesso xe necessario, in sto ànbito, móvarse par controlare anca le diàgnosi alternative de enbolia polmonare e dissecassion aòrtica, altre causa mazor de dolor toràcico co alta frequensa e mortalità che le poe anca capitare conpagne a n'infarto. Na volta che se ga la diàgnosi serta, se passa a dispore i tratamenti: spesso el passiente el va incontro a n'ecocardiografia e a la coronarografia che la logaliza l'ostrussion.

I primi passi de terapia i se move za al momento del rescontro dei sìntomi (come la morfina pa'l dolor). Quando la diàgnosi xe serta, se passa a un tratamento antitronbòtico co dopia antiagregassion su le piastrine (aspirina co, de sòlito, na tienopiridina come clopidogrel o prasugrel) e anticoagulassion co eparina a basso peso molecolare. Se i tenpi i ghe lo parmete, se poe intervegnere sul vaso ostruio co l'intervento de rivascolarizassion che'l xe l'angioplàstica co posissionamento de stent (na maja de materiale interte che la tien verto el vaso), guidada da la coronarografia.

I passienti i vien ricoverai in ospeale par l'inisso de la terapia e'l controlo de le conplicanse. Ste qua le se destingue in conplicanse a breve, medio e longo tèrmene e, par mecanismo, in conplegassion mecàneghe (le più frequenti le xe quele più distanti in tel tenpo, l'infarto xe la prima causa de insufficensa cardìaca, ma ghe ne xe anca de più precosse come insuficensa mitràlica, pericardite e rotura de core) e elètriche (overo le aritmie che le xe le conplicassion più frequenti sùbito ma le poe manifestarse anca tenpi dopo l'evento acuto).