Fien

Da Wikipedia, l'ençiclopedia libara.
Cheło che te ghè schcià el rimanda a sta voxe, parché el xe on so sinònemo o el vien esplegà cuà drento. rimandamento da Fjen
Na rotobala
Na rastreliera par secar al fjen a Sesto 'te la Val Pusteria

Par fjen o fen se intende erba secada in maniera particolar, binada e inmagazinada co el scopo de darghela da magnar a serti animai, in particolar vache, cavai, caore e sede.

Anca serti animai mesteghi cei come conici e roditori i pol magnar fjen. In particolar par i conici la alimentaion pì justa la ze a base de fjen, sensa cereai, pan, mangime o altro. Al fjen par i conici al representa al alimento principal, inportante anca par la salute dei dent fruandoli prim che i gnene grandi assei da dar problemi. I porsei invese i ga problemi a digerir al fjen, a pì che no se ghe el dae dopo erlo assà qualche dì a maserar 'te l'aqua.

Al fjen al gnen doperà par guarnar le bestie quando e aonde che no ghe n'è pascoi assei par via del clima (par esenpio de invern) o parchè i teren pì boni i gnen doperadi par altre coltivasion.

Al fjen al gnen tajà e ciot sù pì de na olta durante al an. Secont del periodo che se fa sta operasion, al ciapa nomi diferenti:

  • fen se al ze al primo tai
  • dorch o ardiva se al ze al secondo tai
  • tersanin se al ze al terso tai

Aonde che se pol tajar pì de 3 olte, al fjen fat dopo del tersanin al feniss comunque co el gner considerà come tersanin.

Contenuto del fjen[canbia | canbia el còdaxe]

Te el fen se ciapa entro la gran part dei stech: se cata da le radicele a i radici dal mat a i diversi tipi de erba spiga. Se al gnen fat tardiu se pol catar anca al masacaval. La dorch de solito la ze fata da strafoi, pjantan, erba spiga de dimension ridote, spagna, ladino, masacaval. Se al teren al ze umido se pol catar anca fenocere. Al tersanin al ga entro pjantan e altre erbe de dimension ridote.

Al ze inportante sotolinear che al fjen fat a man al ga entro anca na gran quantità de siess, che le costituiss an alimento conpleto e concentrà par le bestie che le lo magna. Al fjen fat co i machinari par quant al gnen sbatest co forsa, sichè al pers la gran part de le siess co un conseguente pejorament de la qualità, sichè se rende necessario integrar la dieta de le vache co na part de mangime.

Produsion del fjen[canbia | canbia el còdaxe]

La produsion del fjen la ga inìsio dal segar l'erba. Sta operasion la gnen fata a partir da San Vetor, endo cura che al pra al scominsie a ciapar an color gialin-rossastro e che le spighe de la erba spiga le scominsie a piegarse do, segn che la siess la ze madura. Sta operasion na olta la gnea fata co la fals, ma te i ultimi 100 ani al progresso al ga portà prim a le bare falcianti tirade da i cavai, po' a le machine da segar e a la fin a le bare falcianti e a le bare rotanti da tacar te el trator. Na olta segada, l'erba la gnen secada al sol. Parchè la se seche in maniera uniforme ogni tanto la gnen oltada sot sora co la forca, o la gnen sghirlada co el girel. Se al loch laorà al ze particolarmente umido, par poderla secar se la pica su struture particolari ciamade rastreliere. Se al fjen al ze sech, ma no assei da gner cargà, al ze inportante star atenti che no el se bagne. Te el caso che gnene ignans an tenporal, se pol salvarlo a farlo sù come marus. Na olta che al ze pronto se el fa in rela, de solito doperando mezi mecanizadi come al restelon. La racolta la pol gner fata co na inbalatrice, che la lo conpata in bale tonde o quadre, senò al pol gner cargà te el autocaricante.

Conservasion[canbia | canbia el còdaxe]

Al ze inportante che al fjen sech al stae senpre al sut. Durante la conservasion par de pì al subiss dei processi de fermentasion che al ze inportante che i sie ben ariedadi parchè le alte tenperature se gnen a generarse le podaree anca esser pericolose in fato de incendio. Al deposito del fjen al se ciama fjenil e de solito al ze sora a un staol, ma te le aziende moderne al tende a deventar an edificio par conto soo. te i pra magri de montagna al fjen al gnea cenest anca entro te i barch. Al fjen al gnen inmagazinà come bale o sfuso. Te el primo caso se varda de sielder la maniera de postar le bale in modo che le ciape manco posto che se pol. Te el secondo caso al fjen al gnen portà in qualche modo te el deposito, aonde che al gnen postà polito in maniera che al se conprime te quei grum che se ghe ciama moje. An nantra solusion par inmagazinar al fjen quando che no se ga posto a quert la ze quela de far sù le mede. Se trata in poche parole de moje fate sù coniche dintorn de un pal inpjantà 'te el teren. An palco al evita che al fjen al reste a direto contato co la tera.

Voxe colegade[canbia | canbia el còdaxe]

Altri progèti[canbia | canbia el còdaxe]

Controło de autoritàLCCN (ENsh85059406 · GND (DE4159757-6 · BNF (FRcb126540056 (data)
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Fien&oldid=1014119"