Dacia (azienda)

Ła Dacia ła ze n’azienda romena produtora de autoveicołi, comersiałizài in Europa, in Àfrega e in alguni paesi aziàteghi. Ła ze stà acuizìa da Renault inte’l 1999, inisiando ła comersiałizasion de novi modełi, traverso ła rede Renault, pur mantenjendo ła marca Dacia.

Ła marca ła ciapa el nome da l’antigo renjo omònemo.

L'azienda inte’l 2008 ła detenieva suparzó el 28% de’l marcà automobiłìstego in Romania.^[1]

Dacia ła ze atualmente el sponsor de l'Udinese Calcio e ła sponsoriza co’l proprio marchio el Stadio Friuli.

Storia

I scominsi: ła reserca de na łisensa

Par redùzer i tenpi nesesari a prozetar e costruire in serie n'automobiłe, le autorità rumene łe gaveva considarà nesesario prodùzer na vetura co łisensa da un produtor foresto. Tałe vetura ła gavea da aver na siłindrada conpreza intrà 1 000 e 1 300 cm³ par na produsion anua stimada in 40 000/50 000 unità. A ghe ga partesipà a’l concorso Renault co ła Renault 10, Peugeot (Peugeot 204), Fiat (Fiat 1100), Alfa Romeo (Alfa Giulia 1300) e Austin (Austin Mini Morris). Daspò ła vizita de’l Presidente Charles De Gaulle in Romania inte’l 1966 A se ga desidesto par ła Renault. A cauza de motivi tècneghi, el novo modeło Renault, ła Renault 12, el sarìa entrà in produsion soło inte’l 1969 e l'inisio de ła produsion el gaveva da avenjir inte i stabiłimenti fransezi: A se desidesto cusì de asénblar in Romania ła vecia Renault 8 in ateza de’l novo modeło.

Ga nasesto cusì a Mioveni, visin a Pitești, ła Uzina de Autoturisme Mioveni (Fàbrega de Automobiłi Mioveni), autorizada a prodùzer autovetture soto łisensa Renault co marca Dacia.

Dacia 1100 e Dacia 1300

Ła Dacia Duster de’l 2010
Ła Duster segonda serie (2018)

El 20 agosto 1968 ga scumisià ła produsion de ła Dacia 1100 derivada da ła Renault 8, berlina a motor e trasion posterior. Segondo i acordi, ła Renault ła forniva tuta ła conponentìstega de ła vetura che ła venjea po’ asenblada in Romania. El primo ezenplar el ghe zera stà donà a l’ałora presidente de ła repùblegaa Nicolae Ceaușescu. Da’l 1968 a’l 1972 ze stà produzesti suparzó 44 000 ezenplari. Inte’l 1970 el ze stà ogeto de un łezero restyling inte ła parte frontałe e zera stà produzesti ezenplari pì potenti (ciamài Dacia 1100S) prensipalmente par ła Połisìa e łe conpetision de rally.

Inte’l 1969 A ze entrà in produsion anca ła Dacia 1300, derivada da ła Renault 12, berlina a 4 porte a trasion anterior.

Int’l córar dei ani 1970 e 1980 Dacia ła ga zviłupà da ‘sto modeło n’intiera gama de veture. In totałe A zera stà produzesti pì de 2 miłion de ezenplari.

Daspò el 1989

Tra el 1991 e el 1996 A ze stà produzesta ła Dacia Liberta e inte’l 1995 A ze stà łansà el primo modeło intieramente romeno, ła Dacia Nova so ła cuała, a partir da’l 1998, l’è stà montà l'iniesion monopoint Bosch. Inte’l 1999 Renault ła ga acuistà el 51% de l'azienda e, a partir da’l 2000, ze stà produzesta ła Dacia SupeRNova, che ła jera un restyling de ła Dacia Nova, ma dotada de un motor 1.4 mpi de orìzene Renault. Inte i sincue ani drioman ła caza franseze ła conpleta l’acuizision de ła Dacia par 220 miłion de dołari.^[2]

Inte i ùltemi ani ultariori modełi i ze stà prodoti: ła Solenza, ła Logan, ła Sandero e el resente Duster.

Inte’l 2021, l'azienda ła inisia ła produsion de’l só primo modeło ełètrego, ła Dacia Spring. ^[3] Inte’l 2022 A scumisia ła produsion de’l primo modeło ibrido, ła Dacia Jogger. ^[4]