Ceza arsipretałe de San Florian

Ceza arsipretałe de San Florian
L'Arcipretałe de San Florian a Pieve (Zoldo).
Dati
Sorte	Ceza
Dedicà a	Florian de Lorch
Caraterìsteghe
Stiłe architetònego	gotico (it)
Pozision
Stato	ITA
	Val de Zoldo
46°21′N 12°11′E46°21′N, 12°11′E
Atività
Diòseze	diòseze de Bełun-Feltre
Rełijon	catołicismo

L'arsipretale de san Florian, za pievanałe e parochiałe, el ze el pì antigo e inportante edifegà de culto de ła Val de Zoldo, pare de tute łe ceze del Zoldan e del Longaronezo. Fondada inte el X secolo, ła ga dato nome a l'atuale frasion de Pieve. Ła rezalta par ła so inponente e maestoza strutura gòtega, caraterìstega che łe ga vałesto l'inscrision inte ła lista dei edifegai monumentali de ła Provincia de Bełun za dal 1912..

Descrision

San Florian ła garia gavesto orìzene inte el X secolo. Ła ze stada citada par ła prima volta inte na boła papałe de Euzènio III (1145), a cuała ghe ze sevitae łe mension inte na boła de papa Lùsio III e in un diploma de Federico Barbarosa (1185).

Partindo dal XIII secolo el ga subìo na sèrie de ristruturasion che łe se ga finio co ła consacrasion del 1487. Le atuali forme romànego-gòteghe łe remanda a sti interventi. L'esterno l'è decorà co dei freschi, scołorii, de scoła vecełiana.

I interni i conserva numarévołi òpare de prejo, spesalmente lavori in legno realizadi da racuanti sèłebri intajatori orìzenari de ła vałe. intrà tute rezalta l'altare de łe Àneme, granda òpara zovaniłe de l'intajatore Andrea Brustołon (1687), ornà da ła pała de łe Àneme purganti de Agostino Ridolfi. L'altare majore, in marmo de Carara e da łe lìnee rococò (1782) el ze sormontà da un crozefiso in legno de Valentin Besarel jùnior; de drio ła ze cołocada ła pała co i Santi Florian e Joan Batista dipinzesta da Francesco Majoto inte el 1783. Al coro, costituio da un revestimento in legno fato da Joani Poło Ganba Zanpol e Valentino Bersarel sènior, ghe ze stai zontai ełementi decorativi figuranti Epizodi de ła vita de Maria de Juzepe Cherubin (1913). A Valentino Besarel jùnior ghe se ga da tributar el grupo scultor de ła Madona del Rozàrio (1897) e ła Vèrzene Asunta in legno jesà e cołorà. So ła parete de sanca łe rezanta do tołe tribuie cuatro-sentesche a Ziròłamo da Trento. Arente del fonte batezemałe, del sincue-sento, ghe ze l'altare del Spìrito Santo, co na pala, forse, de Doménego False (prima del 1647), e l'altare de San Roco, co na teła del XVII secolo. I vałe ła citasion el tavernàcoło "Bardełin", singołar manfato in piera comisionà dal pievan Joani Batista Bardełin (XVI secolo), na Pietà in arenària dei primi del Cuatro-zento, ła teła a ojo co i Santi Antònio da Pàdoa e Tereza d'Aviła, de un anònemo sete-zentesco, e racuante tełe de Marco Vesèlio. L'organo, prejévoło strumento del 1812, el ze de Antonio e Agostino Całido.

El canpaniłe el ze pì vècio de ła ceza: l'orìzenale, scumisià inte el 1562 e finio inte el 1670, el ze sta desfà da un inséndio inte el 1835. Ritirà-sù inte el 1844 da Antonio Tałamini Pol e Joani Batista Pansera Bezarel, pare del za cità Valentin. Alto 47 metri, el se carateriza par ła guja cuerzesta da scàndołe de làreze. Le canpane łe ze de nova fatura, dopoché chełe orizenàrie łe zera stae secuestrae a ła Pàtria dai todeschi inte ła prima guera mondiałe.