Aplegasion mòbiłe

In informàtega, na aplegasion mòbiłe (ciamà anca co l'abreviasion app) ła xe na aplegasion software dedegà a i dispoxidivi de tipo mòbiłe, cofà i smartphone o tablet.

Descrision

Na app par dispoxidivi mòbiłi ła se defarensia da łe aplegasion tradisionałe sia pal suporto col cuałe ła vien doparà, sia par l'idèa che ła ga in sé stesa. A se trata a tuti i efeti de un software aplegativo che par ła só strutura informàtega el ghe someja asè a na aplegasion xenèrega, ma che xenaralmente el xe caratarixà da na senplifegasion e da na ełiminasion del mìa stretamente nesesario, co l'obietivo de otenjer łejeresa, esensiałità e vełosità, in łinea co łe łimitàe resorse hardware de i dispoxidivi mòbiłi respeto a i desktop computer; 'sto fato el fa sì che łe funsionałità de łe app łe sipia łimitàe asè in cuanto focałixàe so na detarminada funsion. El nome steso, chel xe de fato na scurtasion, el pol èsar visto cofà na senplifegasion del nome intiero ingrexe "application" par dar l'idèa de un calcosa de sénplise e ceło. Łe app łe se devide in app native e web app, co i caxi intarmedi o misti che i vien calche 'olta defenìi app ìbride.

App nativa

Ła consiste inte un strumento informàtego chel se instała e el se dòpara intieramente sol proprio dispoxidivo mòbiłe, a dir un insenbre de istrusion informàteghe projetàe col obietivo de réndar posìbiłe un servisio o na serie de servisi o strumenti considarài ùtiłi o dexideràbiłi da l'utente, creà a posta par un spesìfego sistema oparadivo. L'intarasion direta co łe API mese a despoxision dal costrutor del sistema oparadivo ła garantise aceso imedià a tute le funsionałità del dispoxidivo, oltre a parmétar prestasion otimałe e a mejorar el dòparo in maniera sensìbiłe asè. Łe app, defati, łe va a ingrandir łe abiłità native del dispoxidivo includeste rento del sistema oparadivo (configurasion de baxe). Na 'olta conprà el dispoxidivo, chel sipia smartphone o tablet, A se ga ła posibiłità de parsonałixarlo xontando nove aplegasion a seconda de i propi gusti e exijense.

Web app

Domente na mobile app ła xe instałà fixegamente e par intiera sol dispoxidivo de l'utente, na web app sostansialmente ła xe un cołegamento verso un aplegativo remoto, scrito inte un łenguajo cross-platform cofà HTML5, col còdexe de l'intarfasa utente chel pol èsar sol dispoxidivo mòbiłe opur anca łu in remoto. 'Sta sołusion cuà ła fa sì che A ghe sipia conseguense notèvołi in tèrmeni de funsionamento: el vantajo prinsipałe de na web app el consiste inte el fato de no insìdar in nesun modo, o in tuti i modi in maniera mìnema, so ła capiensa de memoria del dispoxidivo e so łe só potensiałità de càlcoło de i dati, in cuanto el sentro ełaborativo e/o l'intarfasa utente de l'aplegasion i se trova sora de server remoti. Parò par funsionar na web app ła ga bexonjo de l'aceso costante a internet e łe só prestasion łe dependarà in maniera sensìbiłe da ła velosità de conesion.

App ìbride

A se trata de aplegativi mòbiłi che i sfruta sia conponenti nativi che tegnołoxìe web par jestir l'intarfasa e ła łòxega de l'aplegasion. El dòparo de łe tegnołoxìe web el xe fato traverso el dòparo del conponente WebView.

Universal App

A se trata de aplegasion che łe se trova a metà strada intrà aplegasion mòbiłe e aplegasion tradisionałe, che łe include łe caratarìsteghe de tute e do e che łe ga ła posibiłità de èsar instałàe sia so aparati mòbiłi che fisi, cofà i PC. 'Sta sołusion cuà ła xe stà introdota, dexviłupà e portà a un stato avansà grasie al łaoro fato da Microsoft sora del sistema oparadivo Windows 10.

Distribusion e comersiałixasion de łe app

A defarensa de łe aplegasion tradisionałe, che łe xe distribuìe in modo asè eteroxeneo inte i dispoxidivi mòbiłi, par senplifegar ła reserca e el dòparo de łe aplegasion da parte de utenti anca poco esperti, ła distribusion de łe app ła xe goernà da distribudori dixitałi fati a posta (conosesti par de pì co i tèrmini angrosàsoni store o market) e vincołài a un partigołar sistema oparadivo, cusì chel gapie rento soło che aplegasion conpatìbiłi col sistema oparadivo del dispoxidivo mòbiłe che A se xe drio doparar. Tutavìa, grasie a ła senpre pì granda só difuxion, łe app łe pol èsar catàe dapartuto, anca diretamente inte i siti de i dexviłupadori, in cuełi de łe axiende o in cuełi de calsìasi privato chel voja métar a despoxision na só aplegasion.

Varda anca

Whatsapp

Wikimedia Commons el detien imàjini o altri file so aplegasion mòbiłe
Scholia el detien schemi gràfeghi so Aplegasion mòbiłe

Controło de autorità	GND (DE) 7705206-7 · NDL (EN, JA) 001229977