Aplegasion mòbiłe

Da Wikipedia, l'ençiclopedia libara.
Jump to navigation Jump to search
'Sto artìcoło el 'é scrito doparando ła grafìa dita DECA

In informàtega, na aplegasion mòbiłe (ciamà anca co l'abreviasion app) ła ze na aplegasion software dedegà a i dispozidivi de tipo mòbiłe, cofà i smartphone o tablet.

Descrision[canbia | canbia el còdexe]

Na app par dispozidivi mòbiłi ła se defarensia da łe aplegasion tradisionałe sia pa'l suporto co'l cuałe ła vien doparà, sia par l'idèa che ła ga in sé stesa. A se trata a tuti i efeti de un software aplegativo che par ła só strutura informàtega el ghe someja asè a na aplegasion zenèrega, ma che zenaralmente el ze caratarizà da na senplifegasion e da na ełiminasion de'l mìa stretamente nesesario, co l'obietivo de otenjer łejeresa, esensiałità e vełosità, in łinea co łe łimitàe resorse hardware de i dispozidivi mòbiłi respeto a i desktop computer; 'sto fato el fa sì che łe funsionałità de łe app łe sipia łimitàe asè in cuanto focałizàe so na detarminada funsion. El nome steso, che'l ze de fato na scurtasion, el pol èsar visto cofà na senplifegasion de'l nome intiero ingreze "application" par dar l'idèa de un calcosa de sénplise e ceło. Łe app łe se devide in app native e web app, co i cazi intarmedi o misti che i vien calche 'olta defenìi app ìbride.

App nativa[canbia | canbia el còdexe]

Ła consiste inte un strumento informàtego che'l se instała e el se dòpara intieramente so'l proprio dispozidivo mòbiłe, a dir un insenbre de istrusion informàteghe projetàe co'l obietivo de réndar posìbiłe un servisio o na serie de servisi o strumenti considarài ùtiłi o dezideràbiłi da l'utente, creà a posta par un spesìfego sistema oparadivo. L'intarasion direta co łe API mese a despozision da'l costrutor de'l sistema oparadivo ła garantise aceso imedià a tute le funsionałità de'l dispozidivo, oltre a parmétar prestasion otimałe e a mejorar el dòparo in maniera sensìbiłe asè. Łe app, defati, łe va a ingrandir łe abiłità native de'l dispozidivo includeste rento de'l sistema oparadivo (configurasion de baze). Na 'olta conprà el dispozidivo, che'l sipia smartphone o tablet, A se ga ła posibiłità de parsonałizarlo zontando nove aplegasion a seconda de i propi gusti e ezijense.

Web app[canbia | canbia el còdexe]

Domente na mobile app ła ze instałà fizegamente e par intiera so'l dispozidivo de l'utente, na web app sostansialmente ła ze un cołegamento verso un aplegativo remoto, scrito inte un łenguajo cross-platform cofà HTML5, co'l còdeze de l'intarfasa utente che'l pol èsar so'l dispozidivo mòbiłe opur anca łu in remoto. 'Sta sołusion cuà ła fa sì che A ghe sipia conseguense notèvołi in tèrmeni de funsionamento: el vantajo prinsipałe de na web app el consiste inte'l fato de no insìdar in nesun modo, o in tuti i modi in maniera mìnema, so ła capiensa de memoria de'l dispozidivo e so łe só potensiałità de càlcoło de i dati, in cuanto el sentro ełaborativo e/o l'intarfasa utente de l'aplegasion i se trova sora de server remoti. Parò par funsionar na web app ła ga bezonjo de l'aceso costante a internet e łe só prestasion łe dependarà in maniera sensìbiłe da ła velosità de conesion.

App ìbride[canbia | canbia el còdexe]

A se trata de aplegativi mòbiłi che i sfruta sia conponenti nativi che tegnołozìe web par jestir l'intarfasa e ła łòzega de l'aplegasion. El dòparo de łe tegnołozìe web el ze fato traverso el dòparo de'l conponente WebView.

Universal App[canbia | canbia el còdexe]

A se trata de aplegasion che łe se trova a metà strada fra aplegasion mòbiłe e aplegasion tradisionałe, che łe include łe caratarìsteghe de tute e do e che łe ga ła posibiłità de èsar instałàe sia so aparati mòbiłi che fisi, cofà i PC. 'Sta sołusion cuà ła ze stà introdota, dezviłupà e portà a un stato avansà grasie a'l łaoro fato da Microsoft sora de'l sistema oparadivo Windows 10.

Distribusion e comersiałizasion de łe app[canbia | canbia el còdexe]

A defarensa de łe aplegasion tradisionałe, che łe ze distribuìe in modo asè eterozeneo inte i dispozidivi mòbiłi, par senplifegar ła reserca e el dòparo de łe aplegasion da parte de utenti anca poco esperti, ła distribusion de łe app ła ze goernà da distribudori dizitałi fati a posta (conosesti par de pì co i tèrmini angrosàsoni store o market) e vincołài a un partigołar sistema oparadivo, cusì che'l gapie rento soło che aplegasion conpatìbiłi co'l sistema oparadivo de'l dispozidivo mòbiłe che A se ze drio doparar. Tutavìa, grasie a ła senpre pì granda só difuzion, łe app łe pol èsar catàe dapartuto, anca diretamente inte i siti de i dezviłupadori, in cuełi de łe aziende o in cuełi de calsìasi privato che'l voja métar a despozision na só aplegasion.