Siexa

Da Wikipedia, l'ençiclopedia libara.
Va a: navigasion, serca

Ła siexa xe na asociasion de àrbari o arbusti jeneralmente piantadi a sircoło o par longo a forma bariere. Łe siexe łe se pianta de sòłito inte i confini de i canpi o fra canpi del steso propietàrio co finałità de stecadi, pa łimitar ła forsa del vento o pa fermar l'avansada de arbusti no desideradi. Łe siexe łe fa parte del paesajo rurałe. Łe costituiva, e ncora łe ga ste funsion, na fonte de elimentasion pa i fruti e i animałi picenini che i vive drento o ne łe prosimidà. Łe siexe anticamente łe gera anca de i ridoti sistemi de provijion de łegno da far fogo.

Nel pasà grandi siexe senpre bentegnue formava łaberinti botàneghi pa intratenismento de (soratuto) ła nobiltà in vile e castełi. In Vèneto ghi n'è a Valsansibio, a Strà preso Vila Pisani, al Casteło de San Pełagio visin Padova, a Verona e a Venesia.

Un łaberinto de siexa

Al di de ancuo łe siexe łe vien doparà anca pa dełimitar e ornar el propio jardin, dandoghe soralconto na protesion vixiva. Łe siexe łe pol èsar costituide da raquante piante o specie vejetałi difarenti e de varipinti cołori. A olte ste bariere vive łe sostituise łe reti metàłiche de dełimitasion fra parcełe diverse.

Siexe