Pupo (cantante)

Da Wikipedia, l'ençiclopedia libara.
Va a: navigasion, serca
Pupo
Pupo al Giffoni Film Festival 'ntel 2010
Pupo al Giffoni Film Festival 'ntel 2010
Informasion xenerałi
Nòme vero Enzo Ghinazzi
Nasùo/a 11 setenbre 1955, Ponticino AR
In atività dal 1975
Xenere muxicałe Rock Pop
Eticheta discografega Baby Records, CGD, Discomagic
Atività prinsipałe cantante
Discografia
Àlbun publicai 16
Studio 12
Live 1
Racolte 3
Sito web

Pupo, nome d'arte de Enzo Ghinazzi (Ponticino, 11 setenbre 1955), xe un cantante, prexentador tełevixivo e dopiator itałian.

Biografia[canbia | canbia sorxente]

Pupo nase a Ponticino, frasion del comùn de Laterina, Pergine Valdarno e Civitella in Val de Chiana in provincia de Areso. So pare fasseva el postìn, so mare ła caxałìna. Tuti do i genitori gera inpegnài dal canto e da ła recitasion ; so mare cantava in alcuni cori del logo indove i vivea, so pare ne l'otava rima toscana, so nono Santi Ghinazzi jera soranominà el poeta.

'Ntel 1975 el gà exordìo cofà cantante a ła Baby Records. Ła so prima canson xe Ti scriverò. El so primo albun risałe invese al 1976 e se ciama Come sei bella. 'Ntel 1978 el otien el gran suceso prima co' Ciao e indrìoman co' Gelato al cioccolato, scrita co' Cristiano Malgioglio.

'Ntel 1980 el partesìpa al Festival de Sanremo co' Su di noi, che deventa una de łe so canson più conosùe. Sta canson vien incluxa 'nte l'albun Più di prima, co' un so altro gran suceso, Firenze Santa Maria Novella, indove el canta el so amor pa'l caołogo toscan. 'Ntel 1983 el se prexenta da nòvo a Sanremo co' el brano Cieli azzurri e 'ntel 1984 co' Un amore grande ch'el gaveva scrito co' Umbberto Tozzi e Giancarlo Bigazzi. In sta edision el sostituìse Loretta Goggi che gavarìa dovesto exibirse co' ła stesa canson. 'Ntel 1987 el vinse el Zecchino d'oro scrivendo Canzone amica, cantàda da Fabio Etter. Drìo ani de crixe, dovùa anca ai problemi ch'el gà avùo pa'l xogo de axardo (de ris-cio) 'ntel 1992 el torna a Sanremo cantando La mia preghiera. Anca stavolta el decide da partesiparghe a l'ultemo momento a cauxa de ła squałifica che gera stàda fata ai dani de Jo Squillo, che s'avea prexentà co'l so vero nòme e cognome, par po' ricipàr el so pseudonimo più conosùo.

No'l xe stà soło autor de testi, ma el gà scrito anca canson par altri, cofà par exenpio, Sarà perchè ti amo (conposta dal mestro Dario Farina, par la quałe, co' Daniele Pace, el gà scrito el testo), cantàda da Ricchi e Poveri. Tante so canson xe stàe tradote in todesco, fransexe, inglexe, spagnoło. El xe un mucio famoxo in Rusia, (indove el s'a exibìo in decine de concerti) e 'l xe andà a exibirse in volta par tuto 'l mondo.

In sti ultimi ani ło se gà visto partesipàr a diverse tramsion in tełevixion cofà : Quelli che il calcio (dove 'l gera l'inviato da Firense che vardava ła AC Fiorentina de cui el xe un gran tifoxo) e senpre so'l picoło schermo se gaveva contà ne Il Funambolo.

'Ntel 2005 el xe inviato in Braxiłe de ła segonda edision del reality show La fattoria che ło rislansa in tełevixion. Ne l'istà del 2005, par la prima volta, el prexenta un programa tuto suo so Raiuno, el quis Il Malloppo. Grasie al suceso ch'el otien co' sto programa ghe vien fidà de prexentàr Affari tuoi, programa che gera stà prexentà co' suceso da Paolo Bonolis. El cantante, dopo esarse un fià fermà a marso 2006 a cauxa de 'na tournée, sucesivamente el se refuda de prexentàr la trasmision anca ne ła stagion 2006/2007 (invitando ła Rai a far reposàr el programa parch'el va canbià), tacando invese a prexentàr un novo programa par l'istà, Tutto per tutto, e in inverno, el inpresta ła voxe a Hammy, personaxo de ła Dreamworks La gang del bosco. Ne l'istà del 2007 el prexenta el preserałe "Reazione a catena - L'intesa vincente so Raiuno. Pa'l primo canałe l'è stà ciamà anca a prexentàr alcuni programi test: el primo a disenbre 2007 xe stà Chi fermerà la musica (che po' xe stà trasmeso regołarmente in prime time in primavera), e a xenaro Tutti alla lavagna. In istà el prexenta da nòvo L'intesa a catena.

Dal 20 setenbre 2008 el gà prexentà co' Ernesto Schinella, el putèło slansà da Ti lascio una canzone, Volami nel cuore nel sabo sera de Raiuno. A novenbre dal Casinò de Saint Vincent La Notte dei Poker 3 in onda dal 1° xenaro so Sky Sport 2, prodòto da 2Bcom.

'Ntel 2009 el partesìpa novamente al Festival de Sanremo co' ła canson L'opportunità, co' Paolo Belli e Youssou N'Dour. El brano riva in finałe e raxonxe el segondo posto ne ła clasifica de iTunes.

Dal 6 marso al 1° magio 2009 l'à prexentà ła setima edision de ła trasmision I raccomandati, trasmesa ogni venare in prima seràda so Raiuno.

El xe stà un xogador de axardo, dal poker al caxinò. Xe pròpio par sto visio ch'el gà perso un mucio de schèi; el so amigo Gianni Morandi ło gà agiutà a saldàr i dèbiti inprestandoghe nei ani novanta duxento miłion de franchi. 'Ntel 2008 Pupo gà saldà el debito co'l so amigo, montando so'l palco fasendoghe 'na sorpresa a Morandi che gera drìo exibirse durante un so spetacoło danansi ałe tełecamare de Striscia la Notizia. El gà anca scrito un libro "Banco solo! Diario di un giocatore chiamato Pupo" so' ła małatìa dovùa a ła pasion pa'l xogo de axardo, che comunque no'l gà perso. Infati 'ntel 2007 el comenta co' Fabio Caressa e Stefano De Grandis so SKY Sport La Notte del Poker, el primo canpionato itałian de poker al Caxinò de Venesia, prodoto da 2Bcom e canta anca ła canson che łù gavea scrito; sucesivamente el partesìpa da xogador a La Notte del Poker - Celebrity Edition, torneo xogà da vip, co' ła partecipasion de Katia Ricciarelli, Rosita Celentano, Marco Baldini, Paolo Brosio, Giulio Scarpati, Andrea Delogu, Fabio Caressa, Alessandro Haber, Gianni Cavina, Manuela Moreno e Lillo del dòto comico Lillo & Greg. Ad avrìl 2009 l'è uno dei promotori de Stars for charity - Poker per l'Abruzzo, prodòto da 2Bcom e prexentà da Giorgia Surina, a favor dei taremotà d'Abruso a cui xe stà donà el montepremi de 150.000 euro. Insieme a eło partesìpa anca el xogador de bałon Francesco Totti, el siador Giorgio Rocca, ła showgirl Pamela Camassa, el cantante dei Zero Assoluto Thomas De Gasperi e 'l comico Lillo. El partesìpa a un mucio de convegni so'l xugo contando come che se fa ad insìr da'l visio del xogo.

Da l'8 xenaro 2010 Pupo prexenta, par la segonda volta, l'otava edision de I raccomandati, in onda in prima seràda so' Raiuno.

Pupo gà partesipà par la sesta volta, al Festival de Sanremo 2010, in conpagnìa de Emanuele Filiberto e al tenor Luca Canonici. El trio prexenta 'na canson definìa "patriotica" verso l'Itałia, el cui titòło xe Italia amore mio. Sta canson però no xe ben acòlta da parte del publico in sała, che clamoroxamente fis-cia el trio, deventando cussì el caxo del festival, riva in finałe e raxonxe el segondo posto Pupo ed Emanuele Filiberto xe definìi i vinsidori morałi del festival.

Dopo el gran suceso de ascolti de I raccomandati, el diretor de Rai Uno, Mauro Mazza convinse Emanuele Filiberto di Savoia a prexentàr Ciak... si canta dal 12 marso 2010 so Raiuno in sostitusion de Pino Insegno e Miriam Leone. Pupo xe de fato so Rai Uno tuti i vènare par più de 5 mexi consecutivi.

Come xa dito prima, ła cubia Pupo ed Emanuele Filiberto de Savoia, gà fato susitàr un mucio de połemiche, sia par la partecipasion al Festival de Sanremo, sia parchè i gavea prexentà I raccomandati e Ciak...si canta!, tanto da minasàr e ofénder el cantante toscan so'l pròpio blog. Infati 'ntel mexe de marso, de łe persone ignote gaveva scrito so'l blog de Pupo: "Nano, se non ripudi il Principe, hai le ore contate". Pupo comenta sto manàso dixendo patòco "Non ho nulla da nascondere, farò denuncia contro ignoti" (no go gnente da scónder, farò 'na denuncia contro ignoti). Infati in seguito a sto fato el gà denonsià a ła Połisia postałe de Roma sto menàso. 'Ntel lujo 2010 el prexenta Napoli Prima e Dopo: ła trasmision fa record de ascolto in prima seràda durante tuta l'istà de Rai Uno (cavando łe partìe de bałon dei Mondiałi). Ne l'agosto del 2010 el inpresta ła voxe a l'ałan protagonista de Sansone. A setenbre 2010 el riprende a prexentàr Attenti a Pupo so Radio 1 Rai e a xenàro 2011 pa'ła tersa volta el gà prexentà i Raccomandati in prima seràda so Rai 1. A febraro del 2010 el gà prexentà so Radio 1 e Rai 4 pontàde speciałi dedicà al Festival de Sanremo "Attenti a Sanremo... dopo il festival" . A lujo 2011 l'à prexentà co' Elisa Isoardi Miss Italia nel mondo e par ła segonda volta Napoli Prima e Dopo. A setenbre 2011 el ritaca a prexentàr de Attenti a Pupo so Radio 1 Rai dal marti al venare a łe 13.30. A febraro 2012 vien publicà e vendùo el so primo romanxo noir La Confessione, stanpà da Rizzoli, che drìo 'na setimana da l'insìda, l'è suìto in ristanpa. A setenbre 2012 el torna in Raidio so Radio 1 Rai co' ła quarta edision de Attenti a Pupo e co'l novo programa setimanałe Passato contro Futuro trasmeso el xioba dopo el Gr Rai de ła mexanote. Senpre 'ntel mexe de setenbre el torna so Rai 1 ne ła xurìa de Ti lascio una canzone, el programa del sabo sera prexentà da Antonella Clerici.

Vita privà[canbia | canbia sorxente]

El xe spoxà dal lujo del 1974 co' Anna e 'l gà 'na rełasion dal 1989 co' ła Personal Manager Patricia Abati. El gà scrito l'ino de łe do squadre toscane par cui el tifa: Fiorentina (è Fiorentina) e Areso (Canzone Amaranto). Pupo xe inpegnà anca nel sociałe e 'l xe uno dei fondadori de ła Nasionałe itałiana cantanti, de cui el xe stà prexidente da xugno 2007 fìn al 2010, ano in cui el se gà dimeso da l'asociasion. El gà tre fìe: Ilaria, Valentina (nata da 'na rełasion extraconiugałe) e Clara. 'Ntel 1999, co'l gà quarantaquatro ani, el deventa nono de Leonardo e 'ntel 2010 riva ła segonda neodìna. Viola, entranbi fiòi deła primogenita Ilaria. 'Ntel 2012 riva el terso neodìn. Matteo, so fiòło de ła segondogenita Valentina.

Curioxità[canbia | canbia sorxente]

  • Xontà a La Confessione Pupo gà scrito do łibri so sè steso. El primo, usìo 'ntel 2001, e publicà da Rai-Eri, se intitoła "Un enigma chiamato Pupo", e ła xe 'na autobiografia rełatìva al so pasà. El segondo, insìo l'11 setenbre 2005, el dì del so sinquanteximo conpleano, e gà par titoło "Banco solo! Diario di un giocatore chiamato Pupo" e rivarda ła so pasion pa'l xogo de axardo che in pasà ghe gà simentà diversi problemi.[1]
  • In un'intervista a Telesette el gà contà un anètodo rełatìvo a quando ch'el gheva partesipà al Festival de Sanremo del 1980, indove l'avea cantà Su di noi:"Dovevo esibirmi subito dopo Morandi ed ero talmente agitato che mi scappava la pipì. Gianni stava per finire il brano e io, non facendo in tempo a raggiungere il bagno, l'ho fatta in un cappello appoggiato a una sedia... Chissà di chi era!"

"Gavea da exibirme suìto dopo Morandi e jero cussì agità che me scanpava pisìn. Gianni gera drìo fenìr el so brano e mi, no fasendo in tenpo a raxonxer el bagno, ło go fato in un capèło puxà a 'na caréga... Chisà de chi ch'el gera".[2]

Note[canbia | canbia sorxente]

  1. Fate largo a Pupo, il quasi cinquantenne da LiberoNews Magazine
  2. da Telesette n. 7 (anno XXXII) del 16/2/2010