Pupo (cantante)

Pupo

Biografia
Nasimènto	(it) Enzo Ghinazzi 11 de setenbre del 1955 (69 ani) Łaterina (Itàlia)
Dati personałi
Altri nomi	Pupo Silver
Atività
Ocupasion	cantautor, cantante, conpozitor, dopiador, prexentador de tełevixion, artista discogràfego
Atività	1975
Zènare	Pop
Instrumento muzicałe	Voze
Targheta discogràfega	Baby Records, CGD, Discomagic
Àlbun	16
Àlbun stùdio	12
Àlbun dal vivo	1
Àlbun compilation	3
Repertòrio
Rock Pop
Sito web	pupo.tv

Pupo, nome d'arte de Enzo Ghinazzi (Pontiçin, 11 de setenbre del 1955), el ze un cantante, prezentador tełevizivo e dopiator itałian.

Biografia

Pupo el nase a Ponticino, frasion de'l comùn de Łaterina, Pergin Valdarn e Siviteła in Val de Chiana in provinsia de Areso. So pare el fazea el postìn, so mare ła cazałìna. Tuti do i zenidori i zera inpenjài da'l canto e da ła resitasion ; so mare ła cantava in arcuanti cori de'l łogo indove łori i vivea, so pare inte l'otava rima toscana, so nono Santi Ghinazzi el jera soranomenà el poeta.

Inte'l 1975 el ga ezordìo cofà cantante a ła Baby Records. Ła só prima canson ła ze Ti scriverò. El só primo àlbun el resałe invese al 1976 e el se ciama Come sei bella. Inte'l 1978 el otien el gran suceso prima co Ciao e indrioman co Gelato al cioccolato, scrita co Cristiano Malgioglio.

Inte el 1980 el partesìpa al Festival de Sanremo co Su di noi, che deventa una de łe só canson più conosùe. Sta canson vien incluza inte l'albun Più di prima, co un so altro gran suceso, Firenze Santa Maria Novella, indove el canta el so amor par el caołogo toscan. Inte el 1983 el se prexenta da nòvo a Sanremo co el brano Cieli azzurri e inte el 1984 co Un amore grande ch'el gaveva scrito co Umbberto Tozzi e Giancarlo Bigazzi. In sta edision el sostituìse Loretta Goggi che gavarìa dovesto exibirse co ła stesa canson. Inte el 1987 el vinse el Zecchino d'oro scrivendo Canzone amica, cantàda da Fabio Etter. Drìo ani de crixe, dovùa anca ai problemi ch'el ga avùo par el xogo de axardo (de ris-cio) inte el 1992 el torna a Sanremo cantando La mia preghiera. Anca stavolta el decide da partesiparghe a l'ultemo momento a cauxa de ła scuałifica che zera stàda fata ai dani de Jo Squillo, che s'avea prexentà col so vero nòme e cognome, par po' ricipàr el so pseudonimo più conosùo.

No'l xe stà soło autor de testi, ma el ga scrito anca canson par altri, cofà par exenpio, Sarà perché ti amo (conposta dal mestro Dario Farina, par la cuałe, co Daniele Pace, el ga scrito el testo), cantàda da Ricchi e Poveri. Tante so canson xe stàe tradote in todesco, fransexe, inglexe, spagnol. El xe un mucio famoxo in Rusia, (indove el s'a exibìo in decine de concerti) e el xe andà a exibirse in volta par tuto el mondo.

In sti ultimi ani ło se ga visto partesipàr a diverse tramsion in tełevixion cofà : Quelli che il calcio (dove el zera l'inviato da Firense che vardava ła AC Fiorentina de cui el xe un gran tifoxo) e senpre sol picoło schermo se gaveva contà ne Il Funambolo.

Inte el 2005 el xe inviato in Braxiłe de ła segonda edision del reality show La fattoria che ło rislansa in tełevixion. Inte l'istà del 2005, par la prima volta, el prexenta un programa tuto suo so Raiuno, el quis Il Malloppo. Grasie al suceso ch'el otien co sto programa ghe vien fidà de prexentàr Affari tuoi, programa che zera stà prexentà co suceso da Paolo Bonolis. El cantante, dopo esarse un fià fermà a marso 2006 a cauxa de na tournée, sucesivamente el se refuda de prexentàr la trasmision anca ne ła stagion 2006/2007 (invitando ła Rai a far reposàr el programa parch'el va canbià), tacando invese a prexentàr un novo programa par l'istà, Tutto par tutto, e in inverno, el inpresta ła voxe a Hammy, personaxo de ła Dreamworks La gang del bosco. Inte l'istà del 2007 el prexenta el preserałe "Reazione a catena - L'intesa vincente so Raiuno. Pa'l primo canałe l'è stà ciamà anca a prexentàr alcuni programi test: el primo a disenbre 2007 xe stà Chi fermerà la musica (che po' xe stà trasmeso regołarmente in prime time in primavera), e a xenaro Tutti alla lavagna. In istà el prexenta da nòvo L'intesa a catena.

Dal 20 de setenbre 2008 el ga prexentà co Ernesto Schinella, el putèło slansà da Ti lascio una canzone, Volami inte el cuore inte el sabo sera de Raiuno. A novenbre dal Casinò de Saint Vincent La Notte dei Poker 3 in onda dal 1° xenaro so Sky Sport 2, prodòto da 2Bcom.

Inte el 2009 el partesìpa novamente al Festival de Sanremo co ła canson L'opportunità, co Paolo Belli e Youssou N'Dour. El brano riva in finałe e raxonxe el segondo posto ne ła clasifica de iTunes.

Dal 6 de marso al 1° de majo 2009 el ga prexentà ła setima edision de ła trasmision I raccomandati, trasmesa ogni venare in prima seràda so Raiuno.

El xe stà un xogador de axardo, dal poker al caxinò. Xe pròpio par sto visio ch'el ga perso un mucio de schèi; el so amigo Gianni Morandi ło ga agiutà a saldàr i dèbiti inprestàndoghe inte i ani novanta duxento miłion de franchi. Inte el 2008 Pupo ga saldà el debito col so amigo, montando sol palco faséndoghe na sorpresa a Morandi che zera drìo exibirse durante un so spetacoło danansi a łe tełecamare de Striscia la Notizia. El ga anca scrito un libro "Banco solo! Diario di un giocatore chiamato Pupo" so' ła małatìa dovùa a ła pasion par el xogo de axardo, che comunque no'l ga perso. Infati inte el 2007 el comenta co Fabio Caressa e Stefano De Grandis so SKY Sport La Notte del Poker, el primo canpionato itałian de poker al Caxinò de Venesia, prodoto da 2Bcom e canta anca ła canson che łù gavea scrito; sucesivamente el partesìpa da xogador a La Notte del Poker - Celebrity Edition, torneo xogà da vip, co ła partecipasion de Katia Ricciarelli, Rosita Celentano, Marco Baldini, Paolo Brosio, Giulio Scarpati, Andrea Delogu, Fabio Caressa, Alessandro Haber, Gianni Cavina, Manuela Moreno e Lillo del dòto comico Lillo & Greg. Ad avrìl 2009 l'è uno dei promotori de Stars for charity - Poker par l'Abruzzo, prodòto da 2Bcom e prexentà da Giorgia Surina, a favor dei taremotà d'Abruso a cui xe stà donà el montepremi de 150.000 euro. Insieme a eło partesìpa anca el xogador de bałon Francesco Totti, el siador Giorgio Rocca, ła showgirl Pamela Camassa, el cantante dei Zero Assoluto Thomas De Gasperi e el comico Lillo. El partesìpa a un mucio de convegni sol xugo contando come che se fa ad insìr dal visio del xogo.

Da l'8 de xenaro 2010 Pupo prexenta, par la segonda volta, l'otava edision de I raccomandati, in onda in prima seràda so' Raiuno.

Pupo ga partesipà par ła sesta volta, al Festival de Sanremo 2010, in conpagnìa de Emanuele Filiberto e al tenor Luca Canonici. El trio prexenta na canson definìa "patriotica" verso l'Itałia, el cui titòło xe Italia amore mio. Sta canson parò no xe ben acòlta da parte del publico in sała, che clamoroxamente fis-cia el trio, deventando cussì el caxo del festival, riva in finałe e raxonxe el segondo posto Pupo ed Emanuele Filiberto xe definìi i vinsidori morałi del festival.

Dopo el gran suceso de ascolti de I raccomandati, el diretor de Rai Uno, Mauro Mazza convinse Emanuele Filiberto di Savoia a prexentàr Ciak... si canta dal 12 de marso 2010 so Raiuno in sostitusion de Pino Insegno e Miriam Leone. Pupo xe de fato so Rai Uno tuti i vènare par più de 5 mexi consecutivi.

Come xa dito prima, ła cubia Pupo ed Emanuele Filiberto de Savoia, ga fato susitàr un mucio de połemiche, sia par la partecipasion al Festival de Sanremo, sia parchè i gavea prexentà I raccomandati e Ciak...si canta!, tanto da minasàr e ofénder el cantante toscan sol pròpio blog. Infati inte el mexe de marso, de łe persone ignote gaveva scrito sol blog de Pupo: "Nano, se non ripudi il Principe, hai le ore contate". Pupo comenta sto manàso dixendo patòco "Non ho nulla da nascondere, farò denuncia contro ignoti" (no go gnente da scónder, farò na denuncia contro ignoti). Infati in seguito a sto fato el ga denonsià a ła Połisia postałe de Roma sto menàso. Inte el lujo 2010 el prexenta Napoli Prima e Dopo: ła trasmision fa record de ascolto in prima seràda durante tuta l'istà de Rai Uno (cavando łe partìe de bałon dei Mondiałi). Inte l'agosto del 2010 el inpresta ła voxe a l'ałan protagonista de Sansone. A setenbre 2010 el riprende a prexentàr Attenti a Pupo so Radio 1 Rai e a xenàro 2011 pa'ła tersa volta el ga prexentà i Raccomandati in prima seràda so Rai 1. A febraro del 2010 el ga prexentà so Radio 1 e Rai 4 pontàde speciałi dedicà al Festival de Sanremo "Attenti a Sanremo... dopo il festival" . A lujo 2011 el ga prexentà co Elisa Isoardi Miss Italia inte el mondo e par ła segonda volta Napoli Prima e Dopo. A setenbre 2011 el ritaca a prexentàr de Attenti a Pupo so Radio 1 Rai dal marti al venare a łe 13.30. A febraro 2012 vien publicà e vendùo el so primo romanxo noir La Confessione, stanpà da Rizzoli, che drìo na setimana da l'insìda, l'è suìto in ristanpa. A setenbre 2012 el torna in Raidio so Radio 1 Rai co ła quarta edision de Attenti a Pupo e col novo programa setimanałe Passato contro Futuro trasmeso el xioba dopo el Gr Rai de ła mexanote. Senpre inte el mexe de setenbre el torna so Rai 1 ne ła xurìa de Ti lascio una canzone, el programa del sabo sera prexentà da Antonella Clerici.

Vita privata

El xe spoxà dal lujo del 1974 co Anna e el ga na rełasion dal 1989 co ła Personal Manager Patricia Abati. El ga scrito l'ino de łe do squadre toscane par cui el tifa: Fiorentina (è Fiorentina) e Areso (Canzone Amaranto). Pupo xe inpegnà anca inte el sociałe e el xe uno dei fondadori de ła Nasionałe itałiana cantanti, de cui el xe stà prexidente da zugno 2007 fìn al 2010, ano inte el cuało el se ga dimeso da l'asociasion. El ga tre fìe: Ilaria, Valentina (nata da na rełasion extraconiugałe) e Clara. Inte el 1999, col ga quarantaquatro ani, el deventa nono de Leonardo e inte el 2010 riva ła segonda neodìna. Viola, entranbi fiòi de ła primogenita Ilaria. Inte el 2012 riva el terso neodìn. Matteo, so fiòło de ła segondogenita Valentina.

Curioxità

• Xontà a La Confession Pupo ga scrito do łibri so sè steso. El primo, usìo inte el 2001, e publicà da Rai-Eri, se intitoła "Un enigma chiamato Pupo", e ła xe na autobiografia rełatìva al so pasà. El segondo, insìo l'11 setenbre 2005, el dì del so sinquanteximo conpleano, e ga par titoło "Banco solo! Diario di un giocatore chiamato Pupo" e rivarda ła so pasion par el xogo de axardo che in pasà ghe ga simentà difarenti problemi.
• In un'intervista a Telesette el ga contà un anètodo rełatìvo a quando ch'el gheva partesipà al Festival de Sanremo del 1980, indove l'avea cantà Su di noi:"Dovevo esibirmi subito dopo Morandi ed ero talmente agitato che mi scappava la pipì. Gianni stava par finire il brano e io, non facendo in tempo a raggiungere il bagno, l'ho fatta in un cappello appoggiato a una sedia... Chissà di chi era!"

"Gavea da exibirme suìto dopo Morandi e jero cussì agità che me scanpava pisìn. Gianni zera drìo fenìr el so brano e mi, no fasendo in tenpo a rivar el bagno, ło go fato in un capèło puxà a na caréga... Chisà de chi ch'el gera".