Culto de i antenati

Da Wikipedia, l'ençiclopedia libara.
Va a: navigasion, serca

El culto de i antenati, che la xe la venerasion par i defunti pi inportanti de on clan, el xe tanto difuso en te l’Africa a sud del Sahara. Sto culto el xe ona de le carateristiche de la religion tradisionale africana, ma el se cata anca en te le forme moderne de religosità e de sincretismo en Africa.

Pincipi de baxe[canbia | canbia sorxente]

A sud del Sahara, en quela che na olta la vegnea ciamà l’Africa Nera, se cata pi de 1,200 etnie difarenti. No se pol parlar de na cultura africana, anca se ghe de i ponti en comune. Questo el val anca par el culto de i antenati, chel ga forme difarenti da popolo a popolo. I elementi comuni a le varie culture africane i riguarda el modo de vedar la realtà. De conseguensa, rispetando le difarense tra i vari popoli, se pol catar i temi comuni qi de seguito.

El principio vitale[canbia | canbia sorxente]

Quasi tute le culture africane le vede la realtà come na sinbiosi tra el mondo materiale e quelo spirituale. I do mondi i se sovrapone e i forma na sola realtà. El mondo spirituale el xe en comunicasion co el mondo materiale e pol interferir co la vita de i esari viventi. Dio, essere superiore e creatore de tuto, el pol intervenir su tuto. I spiriti de i antenati i pol intervenir en te la vita de i disendenti. La forsa che liga i spiriti a i vivi la diminuise col diminuir del legame de sangue. El xe inportante par i vivi de mantegnar on bon raporto co i antenati par evitar che i sparisa o che i se rabia e i manda de le maledisioni. Par partisipar a la vita spirituale bisogna agire so do piani: la fertilità e el culto. Co la fertilità na persona la da na progenie a i antenati, e a se steso. El numero de fioi e neodi el xe el segno de la forsa vitale che ono el controla. El culto, fato de asioni e de parole da dire, el xe n’altro modo de iterferire co la realtà par verghe on efeto so el mondo spirituale che nol se pol tocar. I riti, i amuleti, i totem, i tabù, l’iniziasion, e tute le forme de comunicasion sociale i xe mesi par tegnar boni i spiriti e de salir la scala sociale. Tuto quel che parmete l’acumulasion de potere personale e el conseguimento de on posto de onore en te la società el xe ben; tuto quel che inpedise stà crescita el xe mal, e crea on sconpenso a livel spirituale. El pincipio etico, de conseguensa, nol xe ligà a le asioni par la so natura, ma par la so eficacia. En altre parole, n’asion che la va a scapito del clan la xe malvagia, la stesa asion che no la intaca el clan la xe valida parché no la influise negativamente so i legami de sangue.

Union cosmologica[canbia | canbia sorxente]

La realtà la xe l’insieme fisico e spiriuale. Tuti i fati positivi i xe on segno de la benedision divina, o de i antenati. Tuti i fami cativi i xe on segno che la relasion co el mondo spirituale la xe stà disturbà. La raixa de on evento negativo la pol esare la mancansa de culto, la disatension verso i antenati, o verso Dio. Opure, la pol anca esar on disturbo creà aposta da zente cativa. El mal el va senpre curà o afrontà sia dal ponto de vista fisico, che da quelo spirituale. La conprension e interpretasion de lo spirituale i xe afidadi a zente particolare. Questi i pol esare omeni o done che i se ocupa de medisina e de magia. Solitamente i xe persone de la stesa fameja, zente conosuda par verghe doni extrasensoriali che i usa par comunicar co i spiriti e lesar i segni cosmici. L’esperto del sacro el xe on mediator, el xe bon de comunicar co i esari spirituali e ristabilir l’ordine. A olte, l’esperto del sacro el xe bon de vedar en anticipo le conseguense de on certo conportamento sociale. Alora el diventa on profeta, che ghe dixe a la comunità sa fare par evitar problemi o i spiriti.

Ego-sentrismo[canbia | canbia sorxente]

Anca se speso se mete l’asento so l’aspeto comunitario, le culture africane le ga tute on aspeto de ego-sentrismo. Questo el va capio come l’inportanza che uno se da en rispeto al so clan, no en contrasto col so clan. La persona la ga da vivar en te na comunità, ma la val par el so status personale. L’individuo el sercarà de verghe senpre pi poder e onor, quel che ghe inporta a lu el xe el so inalzamento, senza portar dano a el so clan. En te la società moderna, co el fenomeno de l’urbanizasion e del disaco da le regole tribali, sto tipo de ego-sentrismo el se staca da l’aspeto comunitario, co el rischio che el diventa on egoismo.


Culto de i antenati[canbia | canbia sorxente]

Uno chel more el va a far parte del regno spirituale. La so participasion al mondo de i antenati la dipende da tanti fatori: el seso (omo o dona), l’inportansa sociale a la so morte, el conportamento chel ga vu in vita, l’apartenensa etnica, i fioi chel ga vu, el tipo de funeral chel ga vu, e altri. No tuti i morti i diventa antenati, e no tuti i antenati i xe inportanti isteso. L’antenato el ga on raporto co i so disendenti, el no se interesa de i altri. Inoltre, el culto che el clan el fa de i so antenati ghe da vita, co uno el xe dismentegà, a poco a poco el svanise. Ono de i segni de rispeto verso i antenati el xe el nominar i fioi co el nome de lori. El xe fasile sentir de i genitori ciamar i fioi ‘papà’ o ‘mama’, parchè i ga i stesi nomi de lori. El putel el ga el nome, ma el incarna anca el spirito del nono. La venerasion de i antenati la prende forma anca co riti, libagioni e el rispeto de posti o de animali che se pensa i sia cari a i antenati, e che i antenati i usa par manifestarse a la comunità. L’antenato el pol anca farse vivo traverso la posesion de na persona. Bisogna esar boni de lesar e interpretare l’evento. Se la comunità la se desmentega de on antenato, questo el pol rabiarse e farghe del mal a i viventi. Par questo bisogna volerghe ben a i antenati, ma anca temerli on pochetin. Nisun el pol salir la scala sociale se el no ga rispeto de i antenati. El xe inportante fare i riti al momento oportuno, lasar de le oferte ne i posti do i antenati i se cata anca durante i giorni normali. No bisogna confondar la venerasion verso i antenati co la adorasion che la va data solo che a Dio, Essere Supremo.

Sincretismi[canbia | canbia sorxente]

Le do grandi religioni monoteistiche - musulmanesimo e cristianesimo – che le xe rivà en Africa le ga influi so el culto de i antenati. I musulmani i varda a sto culto come na eresia. Epure, el culto de i antenati el xe stà tolerà en quasi tuti i casi. So la costa orientale de l’Africa, le feste par ricordar i morti le xe diventà parte de la religiosità islamica. Le cexe cristiane le ga prima proibio sta pratica, vista come eretica, e dopo le ga sercà de sostituirla co el culto de i santi. La cexa catolega la favorise la venerasion de i morti, ma a diferensa del culto de i antenati, la predica de ricordarse de tuti i morti, no solo de quei che i gavaria n’inportansa par el mondo de i vivi. A so olta, l’insegnamento cristiano el ga influi so i riti tradisionali. L’idea de la intercesion de i morti preso de Dio, chel no xera presente preso tute le culture, el xe diventà parte integrante de la venerasion de i ansiani. Preso quei popoli do la venerasion de i ansiani la xera poco praticà o la xera sparia, se vede na rinascita de sti riti par influensa de le comunità cristiane che le ge da inportansa a i morti.