Creolo

Da Wikipedia, ła ençiclopedia libara.

El creolo xe na lengoa che la sa svilupà da un pidgin, che voria dir na lengoa che la sa formà da l’incontro de do o pi lengoe e che gha na gramatica propia. Co un pidgin diventa la lengoa mare de i nativi de na comunità se pol parlar de creolo. La parola creolo vien dal portoghexe (crioulo, da criar) e vol dir crear o levar. Forse el se riferise a le comunità nove che se formava co le colonie in America Latina, comunità che le xera creà da i portoghexi e la zente local. I portoghexi e i spagnoli usava sta parola par distinguar la zente de origine eoropea ma che xera nata en te le colonie da i nobili che vegnea da la madre patria. El nome creolo gavea on significato negativo – zente de basa lega o de poco valor – on significato che l’è pasà come giudizsio su le lengoe creole, considerà come lengoe de basa levadura o dialeti senzsa valor. Ne i ultimi ani, i lengoisti gha scominzsià a valutar le lengoe creole da on ponto de vista difarente. I creoli xe visti ancò come lengoe vere e propie, co la so storia e leteratura.