Bròcoło fiołaro
 Bròcolo Fiołaro de Creaso | |
 | |
| Sorte | Fruta e Verdura |
|---|---|
| Stato de orìzene | Itàłia  |
| Rejon d'orìzene | Veneto |
| Reconosimento | PAT |
| Invension | } |
El brocoło fiołaro el ze na varietà de bròcoło (fameja de łe cruciferae o brassicaceae) che el crese su par le cołine de Creaso, in provinsa de Vicensa. El se ciama cusì parché su pal pègoło ghe vien fora altre ramete verde che i vien ciamà fiołi. Ła ze na pianta conosuda anca da Johann Wolfgang Goethe cuando che el ze pasà par Vicensa, inte el 18° secoło. El ze na verdura doparà par diversi piati, cofà prima portada e cofà seconda.
Magnari fati col brocoło fiołaro
[canbia | canbia el còdaxe]Bigołi coi brocołi fiołari
[canbia | canbia el còdaxe]Par 4 persone ghe vol:
- 1 c. de bigołi
- 3 eti de brocołi fiołari
- 1 spigoło de ajo
- ojo de oliva veneto
- formajo Grana padan gratà
- formajo de piegora gratà
- sałe e pevare
Cuzinare in acua de bojo i brocołi fiołari par 15 minuti, zontando na man de sałe e pasarli par un criveło. In na farsora sfritegare inte l'ojo un spigoło de ajo fincè no el diventa biondo. Intanto far bojere na pignata de acua e cuzinare i bigołi par 15 minuti.. Versare i brocołi fiołari inte ła farsora a fogo tanto baso. versarghe sora i bigołi, zontare un pugno de grana gratà e uno de formajo de piegora gratà. Smisiare e servire.
Subioti coi brocołi fiołari
[canbia | canbia el còdaxe]Par 4 persone ghe vol:
- 320 g de subioti
- 250 g de brocoło fiołaro
- 50 g de séoła bianca
- 50 g de lardo
- 2 spigołi de ajo
- ojo de oliva
- sałe e pevare
Ocore bojere i brocołi in acua co un poco de sałe e tegnerli a bojo par 10 minuti. Cuando chei ze coti, tritarli fini fini. Se trita fin fin anca ła séoła e ła se fa inbiondire co un fià de ojo, metendoghe drento anca el lardo e i spigołi de ajo. Dopo 3-4 minuti se mete insieme i brocołi e se regoła el sałe. Cuando che se ga cuxinà i subioti, i se salta in padeła co sta salsa de brocołi. Se versa sui piati, co un poco de ojo e de pevare.
Cotołeta al brocoło fiołaro
[canbia | canbia el còdaxe]Par 4 persone ghe vol:
- 4 fete de feza de vedeło de 1 eto ciascuna
- 3 ovi
- 300 g de brocoło fiołaro
- 50 g de panseta stesa
- 4 fete de formajo Asiago dolse
- 4 fete de prosciuto cruo
- 1 séoła
- pan gratà
Se boje par 10 minuti in acua de bojo un poco sałà i brocołi, i se scoła e i se fa saltare in padeła co un fià de ojo, ła panseta tajà a strisete e ła séoła trità fina fina. Se slarga col bati-carne łe fete de vedeło, łe se mete drento i ovi sbatù e dopo sul pan gratà. Ste cotołete vien mese a cuzinar inte l'ojo, ma a meza cotura se ghe mete sora i brocołi e sora na feta de prosuto coverzendo tuto co l'Aziago a fete. Sarare col covercio e continuare ła cotura fincè no se ga desfà el formajo.
Połenta, brocołi fiołari e Aziago mezano
[canbia | canbia el còdaxe]Par 4 persone ghe vol:
- 300 g de brocołi fiołari
- 1 spigoło de ajo
- 40 g de buro
- 100 g de formajo Aziago mezano
- 350 g de farina de mais Marano
Tajare i brocołi fiołari e bojerli in acua sałà. Se rosoła l'ajo co un fià de ojo in na padeła e, prima che el diventa biondo, se ghe xonta i brocołi e se lasa lì par 4-5 minuti. Cuxinà ła połenta, se ghe zonta l'Aziago gratà e i brocołi. Mis-ciare e servire sui piati. Na volta versà sta połenta, se pol metarghe sora anca calche feteła de Asiago mezano, cheła se desfa sora.
Linganbi foresti
[canbia | canbia el còdaxe]- (IT) Home page dei prodoti agroałimentari vixentini Archivià il 16 de disenbre 2007 in Internet Archive.