Voro d'Uderle

Da Wikipedia, l'ençiclopedia libara.
Jump to navigation Jump to search

El Voro d'Uderle el xe un canalon streto e ripido tra el Sojo Roso e el Sojo d'Uderle, sul Pasubio. Se pol dopararlo par andar su fin al Rifugio Papa. Se sta mese anca dełe corde de fero par jutar a montare. Partendo da Ponte Verde, el disliveło el xe de 450 metri, con 3 ore de pertegada.

Da Ponte Verde (905 m) se ciapa ła strada che porta a Paso Xomo; dopo un sentenaro de metri, se svolta a sinistra sul Pra' dei Penzi sul sentiero de Raspanche (numero 317). Se va su in parte par el giaron che vien so dała Forçeła deła Tełeferica, se gira a sinistra a l'inboco del Voro. Se monta fasiłe su par scaloni de rocia finchè no se riva in na conca soto la Guglia del Frate. Se gira a sinistra, par segni de troso, e montando altri scaloni se riva a un canal franoso con toki de corda de fero. In sima al canal se xe ała Bocheta d'Uderle (1550 m).

Da qua, andando so un poco sul fianco deła Val Canałe, se taja tuto el versante ovest deła Guglia del Frate, su de un troso segnà col minio. Se riva a un vałon picoło, se monta el vałon e se riva a un pendìo de pini mughi e da qua ała Sima del Sojo (1880 m). Dała sima, verso nord, se pasa naltro vałon picoło e se riva ała Strada dełe Gałerie, de preciso ała 46ma gałeria. Girà a sinistra, stando suła strada, se riva al Rifugio Papa in 20 minuti.