Streaming

El tèrmene streaming, inte el canpo de łe tełecomunegasion, l'identìfega un fluso de dati àudio/video trazmesi da na sorzente a una o pì destinasion traverso de na rete tełemàtega. 'Sti dati cuà i vien reprodoti man man che i riva a destinasion.

Tipi

Visto el suceso grando che el ga vesto el streaming, doramài i ze tanti asè i server costruìi a posta par ospitar escluzivamente file àudio o video. Una de łe pì resenti apregasion de ła tegnołozìa streaming ła ze stà apregà inte el canpo de ła publisità co ła creasion de videobrochure. Sostansialmente A eziste do tipołojìe de streaming:

1. Streaming on demand
2. Streaming live

Siben che a volte par trazmision via web A se dòpara el tèrmine "streaming" cofà sinònemo de "direta", A ze da ciarir che un contenjudo in streaming el pol èsar live o anca nò.

Streaming on demand

I contenjudi àudio/video a l'inisio i ze conprimesti e memorizài so un server cofà file. Un utente el pol domandarghe al server de inviarghe i contenjudi àudio/video. A no ghe ze mìa de bezonjo de descargarli par intiero sol PC par poderli reprodur: i dati resevesti i vien deconprimesti dal codec e reproduzesti pochi secondi dopo de l'inisio de ła risesion. 'Sto retardo cuà el serve a crear na memoria tenporanea ("buffer" in zergo) par remediar a łe łatense o a łe microintarusion de ła rete. De 'sto tipo cuà i ze i flusi streaming de Real Video e Real Audio, Windows Media Player, QuickTime, Adobe Flash Video. 'Sto ùltemo tipo de formato de file el jera doparà dal sito de YouTube, prima de l'introdusion del łinguajo HTML5 che el parmete nativamente el streaming àudio/video.

Streaming live

El ghe someja a ła tradisionałe trazmision radio o video in broadcast. Anca in 'sto cazo i dati i ze trazmesi doparando oportune conpresion par łezarir el pì posìbiłe el càrego so ła rete. Ła conpresion de i contenjudi ła introduze inte el fluso un retardo de sirca dieze secondi. De sòłito inte el canpo del streaming live 'sto retardo no'l costituise un problema.