Boẑ

Na arnia moderna, disendente dei veci boẑ

Al boẑ al è probabilmente la forma pì primitiva de "casa" che sie stata doperada te la apicoltura. Probabilmente al è stat protagonista de le prime forme de inmestegament de le au, anca parchè al è facile da far e al ghe someja tant a le struture aonde che le au le va a viver in natura.

Al è costituì da 'n toch de legn boẑ de 'l diametro interno de circa 50–80 cm, co 'n fondi e an quert de tole. Ghe gnen forà dintorn an buss come via de acesso par i inseti.

Le au le ghe costruiss inte al nit, fat de formele de žera verticai co tante cele esagonai aonde che gnen conservà le scorte de miel e i ovi.

Par poder er al miel toca copar le au (de solito co 'l fun), cavar fora le formele e schiẑarle, al tut co na perdita granda.

La evoluẑion de la apicoltura la à portà belche domili ani fa a la conparsa de qualche prototipo de vassel aonde che la arnia (cioè la "casa" de le au) la era costituida de do elementi separadi, un par al nit e un par la scorta de miel (melario).

Da i ani '30 i boẑ i à tacà a sparir par assarche posto a i vassei, e incoi no i esiste pì.

An tipo particolar de boẑ al è al bugno villico, costruì a intorder sache o paja.

Siben che i boẑ i è conpletamente sparidi, te 'l gerco se dopera ancora sta parola come sinonimo de "arnia", tant che un no 'l diss mai quante arnie o quanti vassei che al à, ma quanti boẑ.