Smart TV

Da Wikipedia, l'ençiclopedia libara.
Jump to navigation Jump to search
'Sto artìcoło el 'é scrito doparando ła grafìa dita DECA
LG smart TV.png

Ła smart TV ła defenise comersialmente ła categorìa de łe apareciadure ełetròneghe de consumo che łe ga come caratarìstega prinsipałe l'integrasion de funsion e de servisi łigài a internet, e in partegołar a'l cusì dito Web 2.0, rento de apareci tełevizivi. Ła stesa łocusion ła ze doparà in maniera pì zenèrega par defenir ła tendensa a ła converjensa tegnołòzega fra el mondo de i personal computer e cueło de ła tełevizion.

Caratarìsteghe[canbia | canbia el còdexe]

'Sti dispozidivi cuà, traverso de'l cołegamento a ła rete, i ofre ła posibiłità de uzufruir de servisi online tipegamente destinài a normałi personal computer, cofà navigasion internet, video on demand, Internet TV, multimediałità, servisi in streaming, social network, evc., mantenjendo o potensiando serte caratarìsteghe de interatività de i tełevizori e de i dispozidivi cołegài mesi in comersio dopo de ła nàsita de ła tełevizion dijitałe terestre e satełitare.

L'apeładivo smart (traduzìbiłe da ła łengua ingreze cofà "intełijente") el ze stà doparà par 'sta categorìa de dispozidivi inte ła stesa maniera de cuel che'l ze suceso inte'l mondo de ła tełefonìa mòbiłe co l'introdusion de i smartphone, a dir tełèfoni sełułari dotài de caratarìsteghe progredìe multimediałe e intarative.

Ła tegnołozìa a ła baze de'l conseto de smart TV ła pol èsar integrà a l'interno de l'aparecio tełevizivo o pur ła pol èsar mesa a dispozision traverso de set-top box, a dir dispozidivi esterni destinài a far crésar łe funsionałità de i tełevizori tradisionałi, cusì come a l'interno de łetori de dischi òteghi, console par zugar, sistemi tełevizivi sentrałizài.