Rifugio Pellarini
El Rifugio Pellarini el xe in provinça de Udine, in alta Val Saisera, sul Jof Fuart (Alpi Giulie). A 1499 metri, in mexo ai albèi, suła Carnizza (ke in sloveno vorìa dir "testada") de Rio Zapreha o de Canporoso, el xe proprietà de ła sesion C.A.I. S.A.G. de Trieste. El xe dedicà a un socio de ła S.A.G. volontario Alpin morto inte el 1916 a Monte Ciesa (Axiago), 'nteła prima guera mondiałe: Luigi Pellarini. Ghe xe 52 posti leto e xe verto da zugno a setenbre. Par rivarghe da xo, da ła Val Saisera, se ciapa el troso numero 616, ke traversa su un ponte el torente Saisera a quota 860 m, dove ke bisogna fermarse cołe machine. Prima mułatiera e dopo troso s-ceto, el 616 el se ranpega su par un coston de piera e in do ore el mena al rifugio. El Pellarini xe ła base ideałe par i alpinisti ke vol 'ndar sul Jof Fuart (2666 m) e sułe sime tacà.
Trosi dal rifugio
[canbia | canbia el còdaxe]- al Monte Santo de Lussari e al Rifugio Convento de Lussari ore 3 troxi 616-617
- al Rifugio Grego, ała Seła de Sompdogna, ore 8 troxi 616-611