Refresion

Da Wikipedia, l'ençiclopedia libara.


Refresion specułar de ła łuxe su na superfisie łisiada.

Ła refresion ła xe na dei tre fenòmeni chei càpita co ła łuxe ła incontra ła materia. Co l'energia radiante ła casca su un corpo, na parte ła vien asorbia, na parte ła vien refresa e na parte ła vien trasmesa. Par ła lege de conservasion del'energia, ła suma de łe quantità de energia asorbìa, refresa e trasmesa ła xe ugual a ła quantità de energia che gera rivada.

Par anałixar el tipo de refresion del qual se parla, se dopra i agetivi:

  • spetral par descrìver ła radiasion monocromàtega, considerada longhéza d'onda par longhésa d'onda;
  • radiante (el contrario de łuminoxa) par dir che ła radiasion ła xe vardada in tèrmeni de energia total, adónca ła xe scrita traverso grandese radiomètreghe;
  • łuminoxa (el contrario de radiante) par dir che ła radiasion ła xe bałansada secondo ła funsion de bontà łuminoxa del'ocio, adónca ła xe scrita in grandese fotomètreghe.

Ła refresion ła pol capitar a specio (refresion specułar o regołar), co ła va inte na soła (o squaxi) diresion, o anca a difuxion (refresion difuxa), co ła va in desferénte diresion.

Ła refretansa (reflectance) ła xe el raporto infrà fluso refreso e fluso incidénte inputà par ogni łonghésa d'onda. Atexoché ła xe definìa come raporto de grandese omogènee, ła refretansa ła xe na grandesa sensa dimension e ła vien scrita in persentual (0-100%) o come fator (0.0-1.0). Daspò ła revarda el fluso e dónca el total de ła radiasion refresa inte ła emisfera.

Vaxo e sóa imàxene refresa su un specio.

Ła refretansa no ła xe soło funsion de ła łonghesa d'onda ma anca del'iłuminasion, de ła geometria de iradiamento e de ła geometria de vixion (de ła geometria co ła qual el corpo el se iłùmina e de ła geometria co ła qual se mixura ła quantità refresa), dónca bixogna definir na grandesa più xeneral de ła refretansa spetral.

Ne agiutemo eora col difuxor refreténte ideal. El xe un corpo (ideal, dónca teòrego) chel no asorbe e no trasmete, ma'l refrete a difuxion ła radiasion ciapada co radiansa o łuminansa ugual par ogni àngoło de refresion e in manièra indipendénte da ła diresion de ła radiasion incidénte. Come prima reałixasion del conceto de difuxor refreténte ideal se definise el fator de radiansa (radiance factor) o el fatore de łuminansa (luminance factor) come el raporto infrà ła radiansa de un'àrea e quea del difuxor ideal refreténte iradià inte ła stésa manièra.

Referéndose a sto corpo ideal, el fator de refresion (reflectance factor o reflection factor) de un corpo el xe el raporto intrà el fluso refreso dal corpo in un determinà cono co un vèrtexe sul corpo considerà e el fluso refreso dal difuxor refreténte ideal.

El fator de refresion el xe dónca na grandesa qualsesia chel corispónde:

  • a ła refretansa spetral se el cono el xe na emisfera;
  • al fator de radiansa spetral se el cono el xe stréto.

Un tìpego spetrofotometro el xe bon a mixurar el fator de refresion spetral a intervałi de 10 nm 'ntel'intervało da 380 a 730 nm.

Controło de autoritàLCCN (ENsh85112207 · GND (DE4177333-0 · BNF (FRcb119667234 (data)
Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Refresion&oldid=1030322"