Quadriłatero
El Quadriłatero l'era un sistema difensivo meso in piè dai austriaci a partir dal 1815, quando el Veneto e ła Lonbardia jè deventà parte del Regno Lonbardo-Veneto controlà da l'Inpero Austriaco. El se ciama cosita parché l'era costruìo su quatro vertici, che i era le forteze de Verona, Peschiera del Garda, Mantoa e Legnago, col fiume Mincio sul lato ovest e l'Adexe sul lato est. Nei ani l'è stà più olte rinforzà, fin a deventar una de łe forteze più inprendibiłi d'Europa.
El Quadriłatero el permetéa de ostacołar tuti i movimenti de trupe nemiche inte ła pianura padana, e de controłar l'aceso ała Valdadexe, atraverso ła cuałe i difensori i podéa farse mandar rifornimenti e rinforsi.
Durante ła storia, el Quadriłatero l'è stà atacà più olte da l'esercito piemontexe/itałian, parché ciapar el Quadriłatero l'era l'unica maniera par poder ciapar el Veneto e mandar via i Austriaci dała pianura padana na olta par tute. Parò, nonostante qualche vitoria, i Piemontexi no i mai stà boni de conquistarlo cołe armi, e soło dopo ła sconfita austriaca contro i Prusiani in tel 1866 i gà podù ocupar el Quadriłatero e el resto del Veneto.