Penoti

Da Wikipedia, l'ençiclopedia libara.
Jump to navigation Jump to search
Penoti sul corpo de un esere uman

Col termine penòti se intende i rilievi a forma de cono che vien soa pele quando che se indrisa i pei. I xé dovui aea contrasion del muscoeo eretore del peo có'l xé sotoposto a serti stimoi nervoxi. El termine vien doparà anca par rifarirse ae piume dei oxei, ai peuchi (in italiano pelucchi) o, in modo ironico, ai pochi caveji restai sua testa de persone quasi calve, come nel caxo dea frase "chei 4 penoti che ghe xé restà so a testa.[1] Nel'uxo comune i penoti dea pele umana gà ciapà sto nome parché ea pele co i penoti ea ghe someja a quea de na gaina che xé stà spenotà (che ghe xé stá tirai via i penoti).

Etimoeogia[canbia | canbia el còdaxe]

Gaina spenotà

El termine penoti vien dae pene dei oxei, i saria in realtà ea peuria o e prime pene che mete i oxeeti,[2] opure anca ea parte terminae dee piume dei oxei adulti.[3]

In altre lingue[canbia | canbia el còdaxe]

In italian se uxa i termini piloerezione, orripilazione (che vol dire peo che se indrisa)[4] o cute anserina, (dal latino: pelle d'oca)[5] ma de soito se dopara ea locusion volgare pelle d'oca. in francexe se dixe chair de poule, in spagnoeo piel de gallina, in portoghese pele de galinha e in rumeno piele de găină, che i voe tuti dire pele de gaina. In inglese se dopara un termine simie a penoti, goosebumps,[6] dove che goose voe dire oca e bump gnoco o protuberansa in generae, no soeo quei dei oxei.[7]

Animasion de come che se indrisa un peo, da notare come che se forma el penoto soa pele
Un gateo coi pei indrisai paea paura de cascare dal'alto

Descrision[canbia | canbia el còdaxe]

I penoti i xé un fenomeno che dura poco e i xé i rilievi dea pele in corispondensa de dove che ghe xé i pei. Ea contrasion del muscoeo eretore del peo no dipende daea voeontà dea persona ma ea xé na roba del tuto invoeontaria, come un rifleso automatico che poe vegnere quando che se sente tanto fredo o quando che se prova emosion forti come ea paura, ea nostalgia, ea contentesa, el stupore, ea amirasion e ea ecitasion sesuae.[8] Altri motivi che fa vegnere i penoti poe esare sentire onge che sgrafa na lavagna, scoltare serti tipi de musica,[9] o anca quando che se se ricorda forti emosion e sentimenti.[10]

El rifleso in te na situasion de gran fredo el crea tra el pelo e ea cute un ristagno de aria, che ea se scalda, ea fa da isoeante termico e ea fa diminuire ea dispersion de caeore corporeo. I penoti poe vegner fora quando che se pasa da un ambiente caldo a uno fredo o anca quando che ea pele diventa de colpo più freda. I recetori sensoriai che xé subito soto aea pele reagise faxendo in modo che i pori se strenxa e i bulbi peiferi i cambia stato. El rixultato xé che ea pele diventa come quea de na gaina o de na oca spenà, co ea base del peo che se sgionfa e co'l peo che se indrisa. In sto stato ea condusibiità termica dea pele diminuise e de conseguensa vien limità ea quantità de caeore dispersa dal'organismo. El rifleso che fa vegnere i penoti el se ciama in italian piloerezione, o riflesso pilomotore. Quindi ea diferensa tra piloerezione e penoti xé che ea prima xé un rifleso mentre i secondi i xé i rilievi che se vede soa pele.

Fenomeno simie su mamiferi non umani[canbia | canbia el còdaxe]

Tra i caxi simii più evidenti che ghe capita ai animai ghe xé queo del'istrice, che quando che'l se sente minacià el tira su de colpo i acuei dea schina, quei dea lontra marina, dei cani e dei gati. Ea xé na reasion che fa sembrare l'animae più grando de queo che'l xé e che ghe fa ciapare paura al nemico, che'l preferise rinunciare al'agresion. Questo ghe capita anca ai simpansé,[11] e ai sorxi quando che i xé stresai.[12]

Notasion[canbia | canbia el còdaxe]

  1. Dizionario vicentino-italiano, Nazari, 1876, su archive.org
  2. Giuseppe Piccio, Dizionario veneziano-italiano, Libreria Emiliana Editrice, 1928. p. 90.
  3. (IT) Gallina di Polverara in canèvera, su gastrosofia.it.
  4. (IT) Orripilazione, sul vocaboeario Treccani online.
  5. (IT) anserina], su enciclopedia Treccani online.
  6. (IT)(EN) goosebumps, su wordreference.com.
  7. (IT)(EN) bump, su wordreference.com.
  8. (EN) Benedek M., Kaernbach C. Physiological correlates and emotional specificity of human piloerection. Biological Psychology (26 xenaro 2011)
  9. (EN) David H. Biological Templates for Musical Experience: From Fear to Pleasure. In International Symposium on the Neurobiology of Music, Rice University, 18 novembre 2006.
  10. (EN) George A. Bubenik. Why do humans get "goosebumps" when they are cold, or under other circumstances? Scientific American. 1 setembre 2003.
  11. (EN) Martin Muller e John Mitan. Conflict and Cooperation in Wild Chimpanzees. Advances in the Study of Behavior, vol. 35
  12. (EN) Masuda Y., Suzuki M. Developmental and pharmacological features of mouse emotional piloerection. Exp Anim. 1999 Jul;48(3):209-11.

Altri projèti[canbia | canbia el còdaxe]

Traesto fora da Wikipèdia - L'ençiclopedia łìbara e cołaboradiva in łéngua Vèneta "https://vec.wikipedia.org/w/index.php?title=Penoti&oldid=750743"