Mussa

La mussa la ze an veicol sensa rode doperà par al trasporto de varie merci su teren svjerti o co un coeficiente de atrito radente bass (presensa de lespa, foje o neve). Inte la part alta del Veneto la gnen doperada par portar stèle, carbon, fjen, sass deslonch dei troi. le dimension de ingonbro le ze al incirca da 80x200x60 cm. Al pian aonde che se carga al ze alt al incirca 30 cm e al mesura 80x150 cm. I particolar costrutivi i canbia secont al paess aonde che le gnen fate, e tante olte se pol donder de indovinar da i particolar anca chi che al le ga fate. Sjelte generai su el tipo de materjal da doperar le ze comunque quele riportade in fegura. Par spostar la mussa se dopera normalmente la pendensa natural del teren o la forsa dei bras. Te i posti de montagna se no la ze cargada se la mete su te le spale (varda fegura), e quindi se rende necessario in fase de costrusion assar an spasio pitost larch tra i traversin. La guida la gnen fata dal davanti, posision vantajosa par la visibilità e la facilità de moviment, ma anca paricolosa 'te i teren svjerti aonde che se al guidador al pers al controlo al gnen ciapà sot. Qualche olta la gnen doperada anca par ndar 'te la neve par divertirse, ma al so peso e la so dimension i la rende fadigosa da gestir. Par sto scopo ze stat svilupà de le version pì pisole, come la ferada e al musset.

Te i ultimi ani ze gnest fora an novo mezo de trasporto cingolà, a motor e co un casson rebaltabile. Al pol assolver in tut e par tut a le funsion de na mussa. I vantaji i ze la sicuresa (dovesta a freni mecanicie el posto de guida posterjor) e la comodità. Al svantajo principal al ze dovest al so peso, che al pol esser pericoloss ten serti troi de montagna.

Altri tipi de mussa

• Al musson al ze na mussa granda, forta e pesante, co un pjanal par gargar fat de tole. Al gnea tirà da na copia de boi e se el doperea par portar la grassa 'te el canp de invern co al era tut ingiasà.
• Verso al Polo Nord al mezo de trasporto doperà de pì al ze proprio la mussa tirada da i can o da le rène. Ste quà le ga an teler conpletamente diverso da quele descriveste prim, e le pol esser de materjai diferenti dal legn.
• Le musse co el motor, ciamade anca motoslite.