Mascare africane

Da Wikipedia, l'ençiclopedia libara.
Va a: navigasion, serca
Sta pajina xè orfana
Sta pajina xè orfana, overo priva de cołegamenti in entrata da altre pajine
Inserissighene almanco uno pertinente e cava l'avixo
Na mascara tradisionale Dogon

La mascara el xe on elemento fondamentale de la cultura tradisionale e de la religion africana per i popoli che vive a sud del Sahara, spesialmente en te l’Africa Osidentale. Tuti i popoli africani ghe atribuise a le mascare signiicadi spirituali. El uso de le mascare en te la dansa el ga senpre un motivo religioso. La mascara africana la ga asunto on valor artistico solo che co l’arivo de i ocidentali che ga visto ne la mascara africana n’espresion artistica. Le mascare africane esposte en te le cavedal eoropee ne i secoli XIX e XX le ga influensà el cubismo, el fauvismo e l’espresionismo. Bisogna parò sotolineare che tradisionalmente i africani i no ga mai dato on valor artistico a le mascare. I scultori de mascare i xera zente che la gavea on ruolo socio-religioso e le forme selte no le dovearispondar a criteri artistici ma mistici. Ancò, la produsion de mascare en Africa la xe canbiada e la xe diventà patrimonio de artigiani (produsion a consumo de i turisti) e de artisti (produsion de ricerca).

Significato rituale e sociale[canbia | canbia sorxente]

Mascara del popolo fang del Gabon

Le persone che indosa le mascare a scopo rituale i xe solitamente zente che ga on ruolo en te la comunità. La mascara la trasforma l’identità de la persona che – durante el rito – el entra en contato co le forse spirituali del cosmo e le rapresenta. En serti riti, le mascare le rapresenta le varie forse che le ga contribui a la creasion del mondo. Co el rito se rivive la creasion e così se mete ordine en te i raporti tra realtà fisica e realtà spirituale. A olte le mascare le xe usade en tel culto de i antenati. No bisogna pensar al uso de le mascare nel senso osidentale – canbio de identità par zugo – ne a le rapresentasioni mitiche come al teatro eoropeo. Anca se i portatori de mascare i resita, quel che i fa nol xe divartire le persone o riprodur n’opera d’arte. El loro el xe on ruolo religioso e le sene che i fa le xe ben fate no parché i diverte el publico, ma parché le riese a riorganixar la sinbiosi tra vivi e spiriti.

Forma e materiali[canbia | canbia sorxente]

La mascara la rapresenta lo spirito de la realtà che la riproduse. Par questo l’inportante no la xe la somejansa, ma el significado che se ghe da a i segni. Tute le mascare le ga oci e nasi, ma le pol anca verghe bechi e ali, anca quando le rapresenta realtà che no le ga ste robe en te la verità fisica. On omo co le ali el pol voler dir la capasità de uno de volar co el so spirito. El beco e pol voler rapresentar la mascara de on osel, ma anca n’omo bon de incarnarse en on falco e ndar lontano par conosar la verità. Tuti i segni – oci seradi o streti, noso longo o corto, fronte alta o basa, etc. – i va capidi a l’interno de la cultura che la ga prodoto la mascara. No ghe xe sinboli universali. Normalmente, i sinboli pi inportanti i se riferise a la sesualità (peni, vagine, seni) a la belesa (oci, recie, zigomi), a la sagesa (fronte, naso) e a lo stato de la persona (vivo o morto-vivente). Le mascare de i animali le pol servir par sotolinear na propietà, vera o presunta, de sti animali. En sto senso, se antropoformisa l’animal par utilixar el valor chel rapresenta. Ste mascare le pol anca rapresentar l’animal steso. Alora le vien usade par parlar col spirito de l’animal par domandarghe de lasar en paxe la zente o de esare disponibile a la cacia.

Mascara Mitsogo del Gabon

La majoria de le mascare le cuerse la facia, come quele eoropee. Ghe parò anca mascare fate come scafandri, che le cuerse tuta la testa, e altre che le se porta sora la testa. Oltre a le mascare, serti popoli i usa altri simboli par i riti de inisiasion, de fertilità e i funerali. I makonde del Mozanbico i usa de i corpeti intajadi. I makua del Mozanbico i usa dei peni de legno par l’inisiasion. I kikuyu del Kenya i usa de i disegni sul corpo par el matrimonio. I maasai del Kenya i usa disegni e la riprodusion de la criniera de on leon par indicar el pasagio de uno de i stati de l’inisiasion. I materiali pi usadi i xe el legno, la pele, i osi de animal, le pene de struso o le conchilie.