Maasai (rełijon)

I maasai i xe monoteisti. I crede in on solo Dio, creatore e che se relasiona al mondo. Na olta, i maasai no ghe credea a l’aldelà. Ancò, soto l’influensa cristiana, i ghe crede. Vari riti e preghiere le mostra segni de culto de i anziani, anca se stò culto nol xe tanto presente ne le pràteghe religiose de i maasai.

Dio

Dio se ciama Enkai, che vol dir anca cielo. Enkai el xe na realtà tanto conplicata. I maasai i se riferise a Dio a seconda de l’umore. Co el xe contenton el xe scuro (Enkai narok).

Se Dio el xe rabià el se ciama Nanyokie (el roso). Parò Dio el xe senpre disposto a iutar la zente e la so natura pi bela la xe de esare Enkai Parnumin, el Dio de tanti colori.

Na olta Dio el abitava so la tera co la zente. Dopo, non se sa ben parché el se ga trasferio in cielo. Ma el ga fato on regalo a i maasai: le vache. Da alora, tute le vache de la tera le xe de i maasai che i deve catar foragio e acqua par farle vivare ben.

El oloibon

La persona che la ga da pensar a la spiritualità la se ciama el oloibon. I oloibon i xe selti co i xe oncora zoeni. Al momento de l’iniziasion, i veci i decidi ci el pol diventar on oloibon. De solito i vien tuti da na stesa fameja. El oloibon el xe preparà a conosar i riti tradisionali, la medicina erboristica. De solito el oloibon el xe bon de consiliar i veci ne le so decision spirituali. El pol anca verghe on ruolo politego, ma solo se el dimostra de esare sagio.

Esari spirituali

I maasai i crede che Dio el ghe daga on esare spirituale a tuti i novi nati par difendare la persona da i pericoli de la vita. I maasai – come tuti i popoli nilotici – i no credea inte l’aldilà. Parò bisogna notar che inte i riti par la pova e ne i funerali de i oliboni ghe de le asion e de le preghiere che le dimostra che i crede che maasai pi boni i xe sopravisudi e i vive con Dio. La credensa inte la vita eterna la stà entrando soto l’influensa de la religon cristiana.

Ruoli sacrali

I maasai – che i xe on popolo pastore - i ghe da tanta inportansa a le bestie. On maasai che el difende el grege, che cata i pascoli boni e trova l’acqua inte la savana de frecuente suta, el xe defino Olchekut Sopat, el bon pastore. Sta imagine la se presta ben a rifletare l’idea del Bon Pastore presentà inte i vangeli. L’olchekut sopat, co le inclusion cristiane, el xe diventà on patrimonio de la cultura maasai.

En tenpo de fame, quei che i cata da magnare par tuto el grupo e che se interesa par i altri i xe ciamà Mepukori. Questo el xe on nome maasai, ma el diventa in sto caso on titolo onorifico. Stò nome el xe stà sfrutà da i misionari de la varie Ceze cristiane par dimostrar el rolo salvifico de Cristo. A so olta, el cristianesimo el ga influio sol l’idea de donasion par i altri inte la cultura maasai.

Le bestie

I maasai i sacrifica de le bestie a Dio inte le feste e durante de i riti particolari. En tel rito de la fertilità de le done, la dona sterila la ga da pasare soto na vaca che la ga vu on vedel da poco. Vache e tori i xe usà durante i pasagi de età. Le bestie le ga on valore forte, parò – a diferensa de altre culture do i bo i xe considerà pi importanti de i altri animali - le rimane bestie.

Albari sacri

Tanti albari i xe considerà sacri. El figo (ereteti – ficus nalalensis) el xe el sinbolo de na longa vita e de la comunion co Dio. No se pol tajare i figi. L’oseki el xe l’albaro de la pace. Basta metare on ramo de oseki tra do che i se mena parchè i smeta subito.

Portałi:
• Portałe de Africa
|