MP3

Da Wikipedia, l'ençiclopedia libara.
Va a: navigasion, serca

L'MP3 (dito emepitrè o em-pi-frì a l'inglese) el xe un formà eletrònego par la codífega de l'audio. El dopara l'algoridmo de conpresion MPEG-1 Audio Layer 3 par ciapar un segnal audio e fracarlo zo in maniera che el ciapa manco posto. Sto algoritmo el xe lossy, cioè un pochi de dati i va persi par forza rispeto al segnal originale, però el xe fato in modo da diminuir asè la dimension del segnal e perdar poco asè de qualità (par esenpio vien cavà tute le frequenze che la recia de l'omo no l'e bona de sentir). Quando se conprime na canzon in MP3, se pol doparar vari bit rate, che saria el numaro de bit doparà par rapresentar 1 secondo de musica. Piesè alto l'è el bit rate, e pi alta l'è la qualità e pi grando el file: con un bit rate de 128 kbit/s se riduse ła dimension a circa un decimo del file originale (anca se sto valor el pol dipendar anca da altri fattori).

El formato MP3 el xe inportante asè parché ciapando poco posto, l'è comodo da mandar via in Internet anca par chi che nol ga na conession tanto veloce, e quindi el ga permesso a milioni de persone in tuto el mondo de scanbiarse facilmente la musica uno co l'altro doparando le reti peer-to-peer. Xe partìo quindi tuto un processo che ga portà a la nasita calche anno dopo dei letori MP3, che i se basa apunto su sto formà, e de le boteghe de musica in rete, dove se pol cronpar le canzon a manco schei che no fa cronpando el CD, scaricarsele e scoltarsele dove che se vol.