Kim Jong-un

Da Wikipedia, l'ençiclopedia libara.
Jump to navigation Jump to search
Sta pajina xè da wikifegare
Sta pajina o sesion de pułitega no ła xè gnancora formatà secondo i standard
Contribuisi a mijorarla seguendo łe convension de Wikipedia
Sta pajina xè da wikifegare
'Sto artìcoło el 'é scrito doparando ła grafìa dita DECA
Retrato fotoreałìstego de Kim Jong-Un

Kim Jong-un el ze prezidente de'l Partito dei Łaoraduri de ła Corèa e leader supremo de ła Repùblega Democràtega Popołar de Corèa (DPRK), comunemente ciamada Corèa del Nord. Kim ze el segondo fiol de Kim Jong-il e de so mojere Ko Yong-hui. De ła so infansia e de'l parìodo prima de ła so cariera połìtega A se sa molto poco, anca ła data de nàsita ła ze inserta (probabilmente l'8 zenaro o el 5 zunjo 1984).

El ze deventà el leader supremo dopo el funerałe de'l pare el 28 disenbre 2011.

Kim el mantien el tìtoło de prezidente de'l Partito de i Łaoradori de ła Corèa, prezidente de ła Comision Sentrałe Miłitare, prezidente de ła Comision de Defeza Nasionałe, Comandante Supremo de'l Ezèrsito de'l Pòpoło Corean, el ze menbro de'l Politburo de'l Comitato Permanente del Partito dei Łaoraduri de Corèa.

Kim el ze stà promoso maresiało de ła Nord Corèa inte'l Ezèrsito de'l Popoło Corean el 18 zunjo 2012 asegurando el so podere in canpo miłitare. Da i mass media coreani el ze sołito èsar defenìo co 'sto tìtoło.

El 9 marso 2014 Kim el vien eleto inte l'Asenblèa Suprema de'l Pòpoło (l'òrgano łezizlativo unicamerałe nordcorean). Kim el ze inserìo inte ła Forbes List de łe 46 fegure mondiałi pì influenti.

Vita[canbia | canbia el còdexe]

Ła prima parte de ła vita de Kim ze poco conosùa. Ła data de nàsita ła ze dibatùa: el governo nordcoreano el dize che ła sìa 'l 8 zenaro 1982 ma servisi de intelligence sudcoreani i ze convinti che ła data ła sia stada modifegada. Sirca ła prima edugasion tanti i sostìen che Kim gabia studià in do scołe Zvìsare co falso nome, ma A ghe ze chi el che crede el fose so fradeło e njente ze stà uncora provà co sertesa.

Pì tardi el ga otenjesto do łàuree, una in fìzega a ła università Kim II-sung e n'altra come ufisiałe miłitare a ła università miłitare Kim II-sung, A se pensa inte el parìodo 2002-2007.

A ze soło nel 2009 che Kim el deventa noto al'osidente esendo infra i candidài par l'Asenblèa Suprema del Pòpoło. Fin da suito A ze ciaro a i oservaduri osidentài che el pare Kim Jong-il el ło ga sielto come sucesor. A senbra che in zunjo Kim el se gabia prezentà a 'l governo sineze, anca se ła Sina ła ga negà che ła vìzita ła ghe sia stada. Inte 'l setenbre de'l steso ano A vien fata na oparasion de propaganda par pareciarghe ła scałada a'l podere.

El 27 setenbre 2010 el deventa Daejang (o Taejang, on grado sìmiłe a zenarałe o maresiało). El venjarà ełeto vice prezidente de ła Comision Miłitare Sentrałe e menbro de ła Asenblèa Sentrałe de 'l Partito dei Łaoraduri. El 10 otobre el derize ła festa par 'l anivarsaro de i 65 ani de'l Partito de i Łaoraduri. A vien donca destituìi molti parsonaji połìteghi, anca parenti de Kim, par evitar rivałità che łe posa ostacołarlo.

El 17 disenbre 2011 Kim Jong-il el more. Kim el fa da prezidente a'l comitato par el funerałe. Inte i dì seguenti el Partito de i Łaoradori e i media i scomisia sałudare el futuro ditatore come leader supremo. El 24 disenbre el vien proclamà cao supremo de'l ezèrsito. L'11 apriłe el deventa primo segretario de ła Asenblèa de'l Partito de i Łaoraduri. Inte'l 13 apriłe 2012 el deventa prezidente de ła Comision de Defeza Nasionałe. Inte'l łujo 2012 el vien proclamà wonsu, ła pi inportante pozision de asion inte'l ezèrsito.

Ofisialmente Kim'l entra a far parte de on triumvirato insenbre a'l premier Pak Pong-ju, cao de'l governo, e a Kim Yong-nam, cao de'l parlamento responsàbiłe de łe rełasion èstare; Kim el derize'l ezèrsito e co 'sta pozision el ze stà bon a ver on podere major de i altri do.

El 9 marso 2014 Kim Jong-un el ze stà votà a ła Asenblèa Suprema de'l Pòpoło.

De ła vita parsonałe de Kim A se sa poco. Ła gran parte de łe informasion łe vien da'l so cogo giaponeze Kenji Fujimoto che'l ło descrive come guałivo a so pare. Kim el ze partegołarmente apasionà da'l basket e da i videogames.

Par ła prima volta i media inte'l 2012 i ga revełà a'l paeze che Kim el ze spozà co Ri Sol-ju (drio oservadori sudcoreani da'l 2009, e che i gavarìa vuo na fioła inte'l 2010, notisia confarmada da'l zugador de basket ameregan Denis Rodman inte'l 2013).

El ditator el ze speso conpanjà da ła soreła pi ceła Kim Yo-jong che ła ło juta par l'organizasion de eventi pùbleghi.

Połìtega econòmega[canbia | canbia el còdexe]

Ła połìtega econòmega de Kim ła ze simiłe a cueła de ła Sina.

El so programa el prevede na major łibartà a łe aziende, on incremento de ła produsion agricoła, on mejoramento de łe condision de vita dei singołi sitadini, l'introdusion de beni de consumo so'l modeło osidentałe, na vertaura ai marcài intarnasionałi.

Armi nucleari[canbia | canbia el còdexe]

Kim fin da'l 2013 el ga sciarìo ła so intension de continuar e anpliar i projeti de costrusion e mantenimento de mìsiłi atòmeghi. Inte'l 2016 el ga segurà che 'sto programa el ga come soło scopo ła defeza nasionałe.

A par che ła Corèa de'l Nord ła gabia sirca na dozina de bonbe nucleare, che łe ga on rajo de tiro che no'l sùpara el Japon.

Inte'l disenbre 2015 Kim el ga anunsià che el so paeze el ze stà bon de reałizare na bonba a idròzeno, anca se A pararìa poco probabiłe.

Da'l 2016 ła Corèa ła ga subìo uncora sansion par via de i test misiłìsteghi.

Ezecusion e viołasion de i deriti umani[canbia | canbia el còdexe]

Ze stà confarmà l'ezistensa de racuanti canpi de reedugasion par tuti i opoziduri połìteghi de'l rezime prezenti zà inte'l pariodo de Kim Jong-il. Al momento A ze difìsiłe far stime ezate sirca el nùmaro de deportài.

Inte 'l 2013 łe Nasion Unìe łe ga costituìo na comision de inchiesta. El raporto publegà inte 'l 2014 el jùdega Kim colpévołe de crìmeni contro i deriti umani.

Racuanti artìgołi i ze stài scriti so ezecusion ordenàe da Kim contro i so famejari e cołaboraduri, ma serte łe se ga revełà zbajàe o mìa verifegàbiłe.

I media nordcoreani i ga reza pùblega ła ezecusion de'l barba de'l ditador, Jang Sung-taek.