Harry Potter

Da Wikipedia, l'ençiclopedia libara.
Jump to navigation Jump to search
logo del łibro e de ła peicoła de Herry Potter.

Harry Potter el xe na na saga de sete romanzi scriti da l’autora inglese Joanne Kathleen Rowling che i conta łe venture del zovene mago Harry Potter, insenbre a i só amighi Ron Weasley e Hermione Granger. Ła storia ła trascor soratuto drento ła Scoła de Magia e Strigaria de Hogwarts, na cademia par zoveni maghi. Ła storia ła xe inçentrada so ‘l radego de Harry co ‘l malvagio mago Lord Voldemort che ‘l g’ha copà i só zenitori co ła mira de concuistar el mondo magico.

Dal primo romanzo Harry Potter e ła Piera Fiłosofal publicà inte 'l 1997, i łibri i g'ha vuo na popołarità maxenga oltre che el rispeto de ła critega e un suceso comercial in tuto el mondo. De sta saga xe stà fati film, videozoghi e un mucio de marcançia. L'autora Joanne Kathleen Rowling ła xe deventada ła femena pì rica de 'l Regno Unìo e ła parsona co pì schei vadagnài scrivendo łibri.

Trama[canbia | canbia el còdexe]

L'opara ła xe despartìa in sete łibri, tanto fà i ani de studio a Hogwarts. Tuto scominçia co Albus Silente, el preside de Hogwarts che 'l xe costreto fidar el picoło Harry, restà orfano ai só zii maderni Vernon Dusley e Petunia Dursley, no sendoghe altri parenti. Par diese ani Harry el subise małegraçie da i só zii e da só cusin, fin co el capise de esar un mago graçie al Mezozigante Rubeus Hagrid, che 'l ghe conta che i só zenitori i xe stài copài dal pì gran mago scuro de tuti i tenpi, Lord Voldemort. De tuto ciò Harry no 'l savea gnente parché i só zii i ghe g'avea contà che só mare e só pare i jera morti int'un inçidente in machina. Cusita Harry el scominçia frecuentar Hogwarts, ła scoła de Magia e Strigaria del Regno Unìo. Inte l'ultimo ano Harry el se scontra finalmente co Voldemort.

I sete romanzi[canbia | canbia el còdexe]

Ogni łibro de ła serie el rapresenta un ano de vita de Harry, dai undese ai dissete ani. In ogni łibro l'atmosfera ła xe un fià pì scura rispeto a cueło vanti e el fa védar na mauraçion dei personazi. I łibri i xe:

  1. Harry Potter e ła Piera Fiłosofal (1997)
  2. Harry Potter e ła Camara de i segreti (1998)
  3. Harry Potter e el Presonier de Azkaban (1999)
  4. Harry Potter e el Całexe de Fogo (2000)
  5. Harry Potter e l'Ordene de ła Fenixe (2003)
  6. Harry Potter e el Prençipe Mezosangue (2005)
  7. Harry Potter e łe Rełichie de ła Morte (2007)