Ezelin I da Roman

Ezelin I da Roman

Biografia
Nasimènto	seculo XII Roman d'Ezełin (Itàlia)
Mòrte	1189 (Gregorian)
Atività
Laóro	pułìtego
Fameja
Fiołi	Ezzelino II il Monaco (it)
Pare	Alberico I da Romano (en)

Ezelin I da Roman (A se cata fonti stòreghe co scrito anca Ecelin, Ecelinus, Ezzelin, Azzolin) dito “el Balbo” (tra el 1100 e el 1115 - dopo el 1183) el ze stà un nobiłomo e połìtego veneto, ativo prinsipalmente inte ła vita pùblega de Trevizo.

Biografìa

Fiol de Alberico di Ecelo da Romano e di Cunizza, el ze nasesto probabilmente inte i primi cuìndeze ani de’l XII secoło. El vien cità inte i documenti a partir da’l 1135, cuando che el ga testimonià a ła vendita da na massaricia da parte de do spuzi de Mestre a’l monastero de i Santi Secondo e Erasmo de Venesia; el fato che Ezzelino el sipia cità par secondo, dopo el conte de Trevizo Rambaldo, el ze un senjale de’l prestijo che’l gavéa inte ła sità de ła Marca. El fato el vien confarmà in ocazion de ła paze de Fontaniva inte’l 1147, cuando che el sò nome el conpare tra cuełi de i raprezentanti de’l Comune de Trevizo che i gavéa sotoscrivesto el tratato (i altri i zera el fradeło Olderico Sclavo e Gualperto da Cavaso). Secondo Sante Bortolami, tutavia, i da Romano nn i gavéa jurà in cuałità de dełegài de ła sità, ma “in esclusiva rappresentaza di se stessi” in cuanto siori de un teritorio de granda inportansa, al sboco de’l Brenta in pianura.

Inte i ani sucesivi, pur mantenjendo e raforsando i propri intaresi 'torno a ła pedemontana de’l Grappa, Ezzelin el se gà fazesto senpre de pì coinvòlzere inte ła vita pùblega trevizana. I scriti de l’època i demostra na fita rete de łegami, soratuto de tipo vasałàtego, col vescovado łocałe e el capìtoło de i canòneghi. A se pol donca ipotizar che par i da Romano, cusita come che par altre fameje sioriłi, el poder ecleziàstego el ze stà el mezo che co cueło i ze riusesti a inserirse inte ła połìtega e inte ła vita econòmega de Trevizo.

Inte’l 1164, insenbre a’l conte Schinella, a Gerardino da Canposanpiero e a Gualpertrino da Cavaso, el gà sotoscrivesto el juramento col cuałe i raprezentanti de Caneva, sentro fortifegà situà in teritorio patriarchino, i se inpenjava a vèrzare el sò casteło a i trevizani e a sostenjer in guera el Comun, in partegołar contro el patriarca de Aquileia.

Inte i ani 1159-1160 el ze stà coinvolto inte na vertensa contro el vescovo de Frisinfa atorno aìl poseso de ła curtis de Godego, de ła cuałe ła sò fameja ła zera stà infeudà da l’inisio de’l XII secoło. Ezzelino el zera stà privà de l’investidura no vendo prestà a’l prełato el dovùo omajo, ma pì tardi el ła ga reotenjesta grasie a’l pagamento de sento marche de arzento. Secondo Andrea Castagnetti, 'sto epizodio el demostra come Ezzelino el se tenjese distante da’l poder inperiałe, schieràndose, ansi, con i nemighi de Federico I Barbarossa. El ze deventà cusì uno de i sostenidori de la Lega Lombarda, tanto da deventar un de i protagonisti, acanto a i raprezentanti de łe sità padane, de łe tratative de Montebeło de’l 16 apriłe 1175; l’indoman el ze stà proprio eło, insenbre a Anselmo da Dovara, a conclùdar l’acordo scanbiando el bazo de ła paze co l’inperador. A conferma de’l prestijo rajunto inte 'sto ànbito, Ezzelino el ze stà sità inte’l priviłejo noto come “pace di Costanza” de’l 1183.

El ze morto probabilmente poco dopo el 1183, visto che l’acordo stipułà tra trevizani e cenedesi inte’l 1184 el ze sotoscrito, tra i altri, da un Ezelinellus da indentifegare co el fiol Ezzelino II.

Note

• el detien schemi gràfeghi so